İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 102 Hüküm no: 47 Orijinal metin no: [10a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Feride Hanım bt. Rıza Efendi’nin boşandığı eşinden çocuğu için aylık 150 kuruş nafaka bağlattırması Nafaka-i sagīr 150 guruş Medîne-i Hazret-i Ebâ Eyüb el-Ensârî radıye anhu’l-bârî mahallâtından Şah Sultan mahallesinde sâkine zâtı ta‘rîf-i şer‘î ile mu‘arrefe olan işbu bâ‘isetü’l-kitâb Feride Hanım bt. Rıza Efendi meclis-i şer‘-i şerîf-i lâzımü’t-teşrîfde zevc-i sâbıkı olup İstanbul’da Kadı Çeşmesi civârında Yarhisar Muslihiddin mahallesinde sakin Zahîre Gümrüğü ketebesinden Mehmed Fehim Efendi b. Halil mahzarında takrîr-i kelâm ve ta‘bîr ani’l-merâm edip mezbûr Mehmed Fehim Efendi ile mukaddemâ zevciyet beynimizde kāime iken mezbûrun firâşından hâsıl ve benden mütevellid ve bi-hakkı’l-hıdâne hâlâ hacr ve terbiyemde olan oğlu tahmînen otuz iki aylık Mehmed İhsan nâm sagīrin aslâ mâlı olmayıp nafaka ve kisveye eşedd-i ihtiyâc ile muhtâc olmağla sagīr-i mezbûrun nafaka ve kisve-bahâsı için pederi mezbûr Mehmed Fehim Efendi üzerine kıbel-i şer‘den kadr-ı ma‘rûf meblağ farz ve takdîr olunmak bi’l-hıdâne matlûbumdur dedikde gıbbe’t-tasdîki’ş-şer‘î hâkim-i hâsim-i vâlâ-cenâbi’l-muvakki‘ ismuhu fî sadri’l-kitâb tûbâ lehû ve hüsnü me’âb efendi hazretleri dahi sagīr-i mezbûrun nafaka ve kisve-bahâsı için pederi mezbûr Mehmed Fehim Efendi üzerine işbu târih-i kitâbdan i‘tibâren bi’t-terâzi beher şehir yüz ellişer guruş farz ve takdîr buyurup meblağ-ı mefrûz-ı mezkûru sagīr-i mezbûrun nafaka ve kisve ve sâir levâzım-ı zarûriyesine harc u sarfa ve lede’l-iktizâ istidâneye ve inde’z-zafer pederi mezbûr Mehmed Fehim Efendi üzerine rucû‘a vâlidesi ve hâdinesi mezbûre Feride Hanım’a izin vermeğin mâ-vaka‘a bi’t-taleb ketb olundu. Fî 21 Zilhicce sene 1278 Şuhûdü’l-hâl: Eş-Şâhidûn es-sâbıkūn