İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 102 Hüküm no: 48 Orijinal metin no: [10a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Simidçi Dimitri v. Yorgi’nin simidçi fırınındaki hisselerinin bir kısmını ortağı kaymakçı esnâfından Potkaoğlu Nikola v. Manol’a satması Simidçi mübâya‘ası 4000 guruş Âsitâne-i sa‘âdet-âşiyâne ve bilâd-ı selâse mahkemelerine bâ-fermân-ı âlî mine’l-kadîm merbût olan duhâncı gediklerinden mâ‘adâ gerek Dersaâdet ve gerek bilâd-ı selâse-i mezkûrede kâin ber-vech-i mülkiyet tasarruf olunmakda bulunan her nev‘ gediklerin mübâya‘a ve ikrâr-ı mülk ve hibe ve irsen intikāl misillü kâffe-i mu‘âmelâtı ve vukū‘ bulan muhâkemâtı münhasıran ve mahsûsan İstanbul Mahkemesi’nden icrâ ve iktizâ eden i‘lâm ve hüccet-i şer‘iyyeleri ancak mahkeme-i mezkûre tarafından i‘tâ olunmak ve gedikât ashâbının rızâ ve muvâfakatları olmadıkça kadîm mülk kirâları tezyîd olunmamak ve senedât-ı sahîha ve mu‘tebere ile ber-vech-i mülkiyet tasarruf olunmakda bulunan gediklerin müstakır oldukları mahalden ihrâc ve imhâsı zımnında mülk sâhibleri tarafından da‘vâya tasaddî olunur ise hükkâm-ı şer‘-i şerîf cânibinden istimâ‘ olunmaması bâlâsı tuğrâ-yı garrâ-yı hazret-i cihân-bânî ile muvaşşah ve müzeyyen bir kıt‘a nizâmnâme ve bâ-fermân-ı âlî müesses olan nizâm-ı müstahsene iktizâsından bulunduğuna binâen vilâyet-i Rumeli’de Gölükesri ahâlisinden ve teba‘a-i Devlet-i aliyye’nin Rum milletinden simidçi Dimitri v. Yorgi meclis-i şer‘i hatîr-i lâzımü’t-tevkīrde yine kazâ-i mezkûr ahâlisinden ve teba‘a-i Devlet-i aliyye’nin Rum milletinden olduğu bâ-ilmühaber mütehakkık olan kaymakçı esnâfından işbu bâ‘isü’r-rakīm Potkaoğlu Nikola v. Manol muvâcehesinde ikrâr-ı tâm ve takrîr-i kelâm edip mahmiye-i İstanbul hısnı ebvâbından Yedikule kapısı dâhilinde Mirahor mahallesinde vâki‘ bir tarafdan ekmekçi fırını ve bir tarafdan değirmen ve bir tarafdan menzil ve taraf-ı râbi‘i tarîk-i âm ile mahdûd terbî‘an yüz seksen zirâ‘ mülk arsa üzerine mebni bir bâb mülk kârgîr simidçi fırını yedimde olup bin iki yüz yetmiş bir senesi Şa‘banü’l-muazzamının yirmi üçüncü günü târihiyle müverraha ve ol târihde Dârü’l-hilâfeti’l-aliyye kādısı bulunan sudûr-ı izâmdan el-Hâc Ahmed Şükrü Efendi merhûmun imzâ ve hatemini hâviye işbu bir kıt‘a hâmiş-i hüccet mantûkunca müstakillen yedimde mülk ve hakkım ve fırın-ı mezkûr derûnunda mevcûde beyne’l-esnâf gedik ta‘bîr olunur vakf âlât-ı lâzime-i ma‘lûme dahi bâ-temessük-i mütevelli merkūm Nikola ile bi’l-icâreteyn münâsefeten taht-ı tasarrufumuzda olmağla el-hâletü hâzihî ben akd-i âti’z-zikrin sudûruna değin ber-minvâl-i muharrer müstakillen mâlik olduğum fırın-ı mahdûd-ı mezkûrun nısf hisse-i şâyi‘asını yedimde ibkā ve âhar nısf hisse-i şâyi‘asını tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ile müşterekim merkūm Nikola’ya dört bin guruşa bey‘ ve temlîk ve vech-i lâyıkıyla teslîm eylediğimde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semeni olan meblağ-ı mezkûr dört bin guruşu bana tamâmen def‘ u teslîm ben dahi yedinden bi’t-tamâm ve’l-kemâl ahz u kabz edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile ibrâ vü ıskāt ve her birimiz ber-vech-i muharrer âharın ibrâsını kabûl eyledik, fırın-ı mahdûd-ı mezkûrun nısf hisse-i şâyi‘asında benim aslâ ve kat‘â alâka ve medhalim kalmayıp müşterekim merkūm Nikola’nın mülk-i müşterâsı ve hakk-ı sırfı olmuşdur dedikde gıbbe’t-tasdîk. 23 Zilka‘de sene 1278 Şuhûdü’l-hâl: Muhzır Mustafa Ağa b. ( ), Muhzır Ahmed Ağa b. ( ), Muhzır Mehmed âğa ( ), Feyzullah Ağa b. ( ), Simidçi esnâfından Yorgi v. Manol, Esnâf-ı merkūmeden Dimitri v. Yani, Esnâf-ı merkūmeden İstefan v. Yorgi, ve gayruhum