İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 118 Hüküm no: 59 Orijinal metin no: [12b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Despina ve Katerina kardeşlerin havyarcı dükkânındaki hisselerini Elisavet bt. Yani Vangelis’e satmaları Havyarcı mübâya‘ası Galata balık pazarı hâricinde 11000 guruş Kezâlik vilâyet-i Anadolu’da Arabsun kazasına tâbi‘ Sineson karyesinde sakinler teba‘a-i Devlet-i aliyye’nin Rum milleti nisvânından Despina ve Katerina binteyi’l-müteveffâ havyarcı bakkalı esnâfından Yuvan v. Markooğlu Tagofilos taraflarından husûs-ı âti’l-beyânda bâ-hüccet-i şer‘iyye vekîlleri oldukları şahıslarını bilirler her biri teba‘a-i Devlet-i aliyye’nin Rum milletinden ve esnâf-ı merkūmeden Yorgi v. Polinçeron ve Hıristo v. Moyis şehâdetleriyle ber-nehc -i şer‘i sâbit olan teba‘a-i Devlet-i aliyye’nin Rum milletinden Yorgi v. İlya meclis-i şer‘-i şerîf-i hatîrde mahrûse-i Galata’ya muzâfe kasaba-i Kasımpaşa’ya tâbi‘ Tatavla karyesinde sâkine teba‘a-i Devlet-i aliyye’nin Latin tâifesi nisvânından olduğu bâ-ilmühaber mütehakkık olan bâ‘isetü’r-rakīm Elisavet bt. Yani Vangelisi muvâcehesinde her biri teba‘a-i Devlet-i aliyye’den esnâf-ı merkūme kahyâsı Yuvan v. Paskal tarafından mürsel Sarafim v. Yorgi ve esnâfından Vasil v. Sarafim ve Aleksi v. Adam ve Gavril v. Yorgi ve Kilimandos v. Nikola hâzır oldukları hâlde bi’l-vekâle ikrâr-ı tâm ve takrîr-i kelâm edip mahrûse-i mezkûre hısnı ebvâbından Balık Pazarı kapısı hâricinde kâin bir tarafdan Kazdağlı dükkânı demekle arîf Mustafa Ağa’nın havyarcı bakkalı dükkânı ve bir tarafdan Anderya’nın Tenevvürcüoğlu dükkânı demekle arîf balıkçı dükkânı ve bir tarafdan leb-i deryâ ve taraf-ı râbi‘i tarîk-i âm ile mahdûd merhûm İbrahim Paşa Vakfı müsakkafâtından esnâf-ı merkūmeden gāib ani’l-meclis Yuvan v. Paskal’ın bâ-temessük-i mütevelli bi’l-icâreteyn taht-ı tasarrufunda olan senevî üç yüz on sekiz guruş kirâ-yı kadîmelü Angeli dükkânı demekle arîf bir bâb havyarcı bakkalı dükkânı derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûmenin yüz yirmi sehm i‘tibârıyla yetmiş beş sehm hisse-i şâyi‘ası cennet-mekân adn-âşiyân merhûm ve mağfiret-nişân Sultan Mahmud Hân-ı Sânî aleyhi rahmetü men enzele seb‘a’l-mesânî hazretlerinin evkāf-ı celîleleri müstagallâtından olarak kırk sehm hisse-i şâyi‘ası Anderya v. Tanaş’ın ve on sehm hisse-i şâyi‘ası merkūm Yuvan’ın ve yedi sehm hisse-i şâyi‘ası Papas Hırisantos v. Yuvan’ın ve on sekiz sehm hisse-i şâyi‘ası Paskal v. Yuvan’ın derdest olan bir kıt‘a arzuhâl hâmişinde mukayyed defter-i evkāf-ı celîle-i müşârün-ileyhadan muhrec derkenâr mantûkunca bi’l-icâreteyn taht-ı tasarruflarında ve on üç sehm hisse-i şâyi‘ası merkūm Hırisantos’un ve beş sehm hisse-i şâyi‘ası Ligor’un ve on sehm hisse-i şâyi‘ası Ohannes v. Serkiz’in ve yedi sehm hisse-i şâyi‘ası Nikola v. Tanaş’ın ve beş sehm hisse-i şâyi‘ası müvekkilerim merkūmetânın li-ebeveyn er karındaşı Mina’nın bey‘inden Aleksi v. Yani’nin yedlerinde mülkleri olup [mâ]‘adâ beş sehm hisse-i şâyi‘ası dahi akd-i âti’z-zikrin sudûruna değin yedimde olup şehr-i sâbık yani Zilka‘deti’ş-şerîfesinin yirmi ikinci günü târihiyle müverraha İstanbul Mahkemesi’nden verilen işbu bir kıt‘a hüccet-i şer‘iyye ve kahyâ-i merkūmun takdîm eylediği bir kıt‘a ilmühaber mantûklarınca müvekkilelerim merkūmetân Despina ve Katerina’nın bi’l-münâsafa yedlerinde irsen mülk ve hakları olmağla ben müvekkilelerim merkūmetân Despina ve Katerina’nın âlât-ı gedik-i mezkûrdan ber-minvâl-i muharrer mâlike oldukları beş sehm hisse-i şâyi‘a-i mezkûreyi tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile bâ-izn-i şürekâ on bir bin guruşa merkūme Elisavet’e bi’l-vekâle bey‘ ve temlîk ve vech-i lâyıkıyla teslîm eylediğimde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semeni olan meblağ-ı merkūm on bir bin guruşu tamâmen bana def‘ u teslîm ben dahi yedinden bi’l-vekâle kâmilen ahz u kabz edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-ı âmm-ı sahîh-i şer‘î ile kabûlümüzü hâvî bi’l-asâle ve izâfetle bi’l-vekâle ibrâ vü ıskāt eyledik ba‘de’l-yevm âlât-ı gedik mezkûrun beş sehm hisse-i mezkûresinde müvekkillerim merkūmetân Despina ve Katerina’nın aslâ ve kat‘â alâka ve medhalleri kalmayıp merkūme Elisaviye’nin mülk-i müşterâsı ve hakk-ı sırfı olmuşdur dedikde gıbbe’t-tasdîki’ş-şer‘î mâ-hüve’l-vak‘bi’t-taleb ketb olundu. Fî 17 Zilhicce sene 1278 Şuhûdü’l-hâl: Muhzır Süleyman Ağab. ( ), Muhzır İsmail Ağab. ( ), Muhzır Mustafa Ağab. ( ), Muhzır Feyzullah Ağa b. ( ), ve gayruhum