İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 119 Hüküm no: 60 Orijinal metin no: [13a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yanmış ekmek fırınının Simidçi Ergirili Nikola v. İspiro ve Ekmekçi Ergirili Valamalkaoğlu Yorgi v. Bantumo’ya satılması Nushateyn, Mübâya‘a-i mühterik habbâz fırını 24000 guruş. Âsitâne-i sa‘âdet âşiyâne ve bilâd-ı selâse mahkemelerine bâ-fermân-ı âlî mine’l-kadîm merbût olan duhâncı gediklerinden mâ‘adâ gerek Dersaâdet ve gerek bilâd-ı selâse-i mezkûrede kâin ber-vech-i mülkiyet tasarruf olunmakda bulunan her nev‘ gediklerin mübâya‘a ve ikrâr-ı mülk ve hibe ve irsen intikāl misillü kâffe-i mu‘âmelâtı ve vukū‘ bulan muhâkemâtı münhasıran ve mahsûsan İstanbul Mahkemesi’nden icrâ ve iktizâ eden i‘lâm ve hüccet-i şer‘iyyeleri ancak mahkeme-i mezkûre tarafından i‘tâ olunmak ve gedikât ashâbının rızâ ve muvâfakatları olmadıkça kadîm mülk kirâları tezyîd olunmamak ve senedât-ı sahîha ve mu‘tebere ile ber-vech-i mülkiyet tasarruf olunmakda bulunan gediklerin müstakır oldukları mahalden ihrâc ve imhâsı zımnında mülk sâhibleri tarafından da‘vâya tasaddî olunur ise hükkâm-ı şer‘-i şerîf cânibinden istimâ‘ olunmaması bâlâsı tuğrâ-yı garrâ-yı hazret-i cihân-bânî ile muvaşşah ve müzeyyen bir kıt‘a nizâmnâme ve bâ-fermân-ı âlî müesses olan nizâm-ı müstahsene iktizâsından bulunduğuna binâen teba‘a-i Devlet-i aliyye’nin Rum milletinden ve kasâb esnâfından Panayot ve Nikola veledey Dimitri ve diğer Panayot ve Kosta veledey Vasil meclis-i şer‘-i şerîf-i hatîrde her biri teba‘a-i Devlet-i aliyye’nin Rum milletinden olduğu bâ-ilmühaber mütehakkık olan bâ‘isü’r-rakīm Simidçi Ergirili Nikola v. İspiro ve Ekmekçi Ergirili Valamalkaoğlu Yorgi v. Bantumo muvâcehelerinde Âsitâne-i aliyye ve bilâd-ı selâsede vâki‘ ekmekçi ve uncu ve françalacı esnâfının kethüdâsı İbrahim Ağa b. Ahmed ile mazbûtü’l-esâmî nizâm ustaları taraflarından mürsel vekîlleri esnâf-ı merkūme yiğitbaşısı es-Seyyid İsmail Efendi b. es-Seyyid Mehmed Emin hâzır olduğu hâlde her biri ikrâr-ı tâm ve takrîr-i kelâm edip mahrûse-i Galata’ya muzâfe İstinye karyesinde İskelebaşı nâm mahalde vâki‘ bir tarafdan tarîk-i hâs ve bir tarafdan Abraham menzili ve bahçesi ve tarafeyni tarîk-i âm ile mahdûd Şeyhülislâm-ı esbak merhûm Yahya Efendi Vakfı müsakkafâtından merkūmân Nikola ve Yorgi’nin bâ-temessük-i mütevelli bi’l-icâreteyn taht-ı tasarruflarında olan şehriye yirmi guruş kirâlı bir bâb muhterik habbâz fırını derûnunda müstahlas ve mevcûd beyne’l-esnâf gedik ta‘bîr olunur âlât-ı lâzime-i ma‘lûme akd-i âti’z-zikrin sudûruna değin yedimizde olup bin iki yüz yetmiş beş senesi Zilka‘deti’ş-şerîfesinin yirmi ikinci günü târihiyle müverraha ve ol târihde Dârü’l-hilâfeti’l-aliyye kādısı olan es-Seyyid Hüseyin Hulusi Efendi merhûmun imzâ ve hatemini hâviye işbu bir kıt‘a mübâya‘a hücceti ve kethüdâ-yı mezbûrun takdîm eylediği bir kıt‘a ilmühaber mantûklarınca yedimizde seviyyen mülk ve hakkımız olmağla biz ber-minvâl-i muharrer mâlik olduğumuzâlât-ı gedik-i mezkûru tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile yirmi dört bin guruşa merkūmân Nikola ve Yorgi’ye bey‘ ve temlîk ve teslîm eylediğimizde onlar dahi ber-vech-i muharrer seviyyen iştirâ ve temellük ve tesellüm ve kabz u kabûl eylediklerinden sonra semeni olan meblağ-ı merkūm yirmi dört bin guruşu tamâmen bize def‘ u teslîm biz dahi yedlerinden tamâmen ve kâmilen ahz u kabz edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile kabûlümüzü hâvî ibrâ vü ıskāt eyledik ba‘de’l-yevm âlât-ı gedik-i mezkûrde bizim aslâ ve kat‘â alâka ve medhalimiz kalmayıp merkūmân Nikola ve Yorgi’nin ale’l-iştirâki’s-seviy mülk-i müşterâları ve hakk-ı sırfları olmuşdur dediklerinde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 19 Zilka‘de sene 1278 Şuhûdü’l-hâl: Muhzır Ahmed Ağa b. ( ), Muhzır Mehmed Ağa b. ( ), Muhzır Şakir Ağa b. ( ), Muhzır Feyzullah Ağa b. ( ), ve gayruhum