İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 121 Hüküm no: 61 Orijinal metin no: [13a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hayriye tüccârı Osman Efend b. İbrahim’in uncu değirmenindeki hisselerini Serkiz v. Mıgırdıç ve Margos v. Sahak’a satması Nushateyn, Mübâya‘a-i değirmen 16000 guruş.. Sonradan tashîh olunmuşdur. Kaydı ihrâc şüd fî 12 Ca sene 1324 Kezâlik mahmiye-i İstanbul’da Çırçır kurbünde Haydar mahallesinde sâkin Hayriye tüccârından Osman Efendi b. İbrahim meclis-i şer‘-i şerîf-i enverde teba‘a-i Devlet-i aliyye’nin Ermeni milletinden olduğu bâ-ilmühaber mütehakkık olan bâ‘isü’r-rakīm Serkiz v. Mıgırdıç ve Margos v. Sahak muvâcehelerinde ekmekçi ve uncu ve françalacı esnâfının kethüdâsı İbrahim Ağa b. Ahmed ile mazbûtü’l-esâmî nizâm ustaları taraflarından mürsel vekîlleri Yiğitbaşı es-Seyyid İsmail Efendi b. es-Seyyid Mehmed Emin hâzır olduğu hâlde mahmiye-i mezkûre hısnı ebvâbından Balat kapısı dâhilinde Hisartepesi nâm mahalde vâki‘ bir tarafdan Makremeci Yahudihânesi ve bir tarafdan cidâr-ı hısn ve bir tarafdan Avram Yahudihânesi ve taraf-ı râbi‘i tarîk-i âm ile mahdûd Neslişah Sultan Vakfı müsakkafâtından merkūm Markos ile gāib ani’l-meclis Kozmoz v. Mıgırdıç’ın bi’l-icâreteyn taht-ı tasarruflarında olan şehriye on guruş kirâlı Köprübaşı değirmeni demekle arîf iki horoslu bir bâb uncu değirmeni derûnunda mevcûde beyne’l-esnâf gedik ta‘bîr olunur sekiz re’s bârgir ve onlara tâbi‘ sâir âlât-ı lâzime-i ma‘lûmenin yedimde olan bin iki yüz yetmiş dört senesi Zilhicceti’ş-şerîfesinin yirmi üçüncü günü târihiyle müverraha ve ol târihde Dârü’l-hilâfeti’l-aliyye kādısı olan sudûr-ı izâmdan semâhatlü Mustafa Asım Efendi hazretlerinin imzâ ve hatemleriyle mahtûme işbu bir kıt‘a mübâya‘a hücceti ve kethüdâ-yı mezbûrun takdîm eylediği bir kıt‘a ilmühaber mantûkunca akd-i âti’z-zikrin sudûruna değin dört re’s bârgir ve onlara tâbi‘ sâir âlât-ı lâzime-i ma‘lûme benim ve dört re’s bârgir ve onlara isâbet eden âlât-ı sâiresi merkūm Kozmoz’un yedimizde mülkümüz olup ben dört re’s bârgir ve onlara îcâb eden âlât-ı sâirenin iki re’s bârgir ve onlara iktizâ eden âlât-ı sâiresi be-safka-i vâhide merkūm Serkiz’e sekiz bin guruşa ve iki re’s bârgir ve onlara îcâb eden âlât-ı sâiresini dahi kezâlik be-safka-i vâhide merkūm Margos’a sekiz bin guruşa tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ile bey‘ ve temlîk ve vech-i lâyıkıyla teslîm eylediğimde onlar dahi ber-vech-i muharrer iştirâ ve temellük ve tesellüm ve kabz u kabûl eylediklerinden sonra semenleri olan cem‘an on altı bin guruşu tamâmen bana def‘ u teslîm ben dahi yedlerinden bi’t-tamâm ve’l-kemâl ahz u kabz edip mebî‘-i mezkûrların tağrîr ve gabnlarına müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile kabûlümüzü hâvî ibrâ vü ıskāt eyledik ba‘de’l-yevm âlât-ı gedik-i mezkûrun dört re’s bârgir ve onlara îcâb eden âlât-ı sâiresinde benim aslâ ve kat‘â alâka ve medhalim kalmayıp iki re’s bârgir ve onlara iktizâ eden âlât-ı sâiresi merkūm Serkiz’in ve iki re’s bârgir ve onlara îcâb eden âlât-ı sâiresi dahi merkūm Margos’un mülk-i müşterâları ve hakk-ı sırfları olmuşdur dedikde gıbbe’t-tasaduki’ş-şer‘î. Fî 28 Zilhicce sene 1278 Şuhûdü’l-hâl: Muhzır Ahmed Ağa b. ( ), Muhzır Mustafa Ağa b. ( ), Muhzır el-Hâc Yusuf Ağa b. ( ), Muhzır Feyzullah Ağa b. ( ), ve gayruhum