İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 122 Hüküm no: 62 Orijinal metin no: [13a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Mehmed Ağa b. Ömer’in mirasçılarına kalan oturakçı dükkânındaki hisselerinin satılması Oturakçı mübâya‘ası Galata’da 6000 guruş Kezâlik mahrûse-i Galata Emekyemez mahallesinde sâkin iken sene-i sâbıka yani bin iki yüz yetmiş sekiz senesi Şevvalü’l-mükerreminin beşinci günü vefât eden oturakçı esnâfından el-Hâc Mehmed Ağa b. Ömer bin Abdullah’ın verâseti zevce-i menkûha-i metrûkeleri Esma Hatun bt. Ahmed ve Behiye Hatun bt. Abdullah ile li-eb er karındaşı oğlunun oğlu Mustafa Efendi b. Ahmed bin Mustafa b. el-mezbûr Ömer’e münhasıra olup müteveffâ-yı mezbûrun sülüs vesâyâsı olmağla ol-vechile mes’ele-i mirâsları on iki sehimden olup sihâm-ı mezkûreden birer sehimden iki sehmi zevcetân-ı mezbûretân Esma Hatun ve Behiye Hatun’a ve altı sehmi mezbûr Mustafa Efendi’ye ve dört sehmi dahi vesâyâ-yı mezkûreye âid ve râci‘ olduğu lede’ş-şer‘i’l-enver zâhir ve mütehakkık oldukdan sonra vesâyâ-yı mezkûreyi tenfîze bâ-hüccet-i şer‘iyye vasiyy-i muhtârı mezbûre Esma Hatun ve nâzırı mezbûre Behiye Hatun taraflarından husûs-ı âti’l-beyânda vekîlleri olduğu zâtlarını ârifân mahrûse-i merkūme mahkemesi muhzırânından İbrahim Edhem Ağa b. Mustafa ve Hüseyin Ağa b. Mehmed şehâdetleriyle ber-nehc -i şer‘î sâbit olan mahmiye-i İstanbul hısnı ebvâbından Kapan-ı Dakîk kapısı dâhilinde Yavuzer Sinan mahallesi imâmı es-Seyyid el-Hâc Hâfız Mehmed Raşid Efendi b. Mehmed mezbûr Mustafa Efendi tarafından kezâlik husûs-ı âti’l-beyânda vekîl olduğu şâhidân-ı mezbûrân şehâdetleriyle ber-nehc -i şer‘î sâbit olan Osman Ağa b. Hüseyin hâzır olduğu hâlde meclis-i şer‘-i şerîf-i enverde teberdârân-ı hâssadan muhrec el-Hâc İbrahim Efendi b. Mustafa mahzarında mahrûse-i merkūmede vâki‘ oturakçı esnâfının kethüdâsı İdris Ağa b. Mehmed tarafından mürsel vekîli Abacı Said Ağa b. Abdullah hâzır olduğu hâlde bi’l-vekâle ikrâr-ı tâm ve takrîr-i kelâm edip mahrûse-i mezkûrede Bât pazarı nâm mahalde Tulumba sûkunda köşe başında vâki‘ bir tarafdan Abdülkadir Ağa dükkânı ve bir tarafdan Celeb Pavli dükkânı ve ba‘zen Âişe Hanım dükkânı ve bir tarafdan tarîk-i hâs ve taraf-ı râbi‘i tarîk-i âm ile mahdûd ve bâ-irâde-i seniye Hazine-i Evkāf-ı hümâyûn tarafından nezâret olunan evkāfdan merhûm Efdalzâde [13b] Hamideddin Efendi Vakfı müsakkafâtından beher şehr iki para icâreli hâzır-ı mezbûr Said Ağa’nın bâ-temessük-i mütevelli bi’l-icâreteyn taht-ı tasarrufunda olan şehriye yüz yirmi para kirâ-yı kadîmelü fevkinde bir bâb odayı müştemil bir bâb oturakçı dükkânı derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûme müteveffâ-yı mezbûr Mehmed Ağa’nın hayâtında yedinde olup bin iki yüz kırk iki senesi şehr-i Rebî‘ülevveli’nin yirmi dördüncü günü târihiyle müverraha ve ol târihde mahrûse-i Galata kādısı olan Aşir Efendizâde Mehmed Taceddin Efendi merhûmun imzâ ve hateminihâviye işbu bir kıt‘a mübâya‘a hücceti ve kethüdâ-yı mezbûrun takdîm eylediği bir kıt‘a ilmühaber nâtıklar olduğu üzere yedinde olup müstakillen mülk ve hakkı iken müteveffâ-yı mezbûr Mehmed Ağa hayâtında ber-minvâl-i muharrer mâlik olduğu âlât-ı gedik-i mezkûru dört sehm i‘tibârıyla üç sehm hisse-i şâyi‘asını yedinde bi’l-ibkā mâ‘adâ bir sehm hisse-i şâyi‘asını sene-i sâbıka-i merkūme Cumâdelûlâsının on dördüncü günü târihiyle müverraha İstanbul Mahkemesi’nden verilen işbu bir kıt‘a hüccet-i şer‘iyye mantûkunca hâzır-ı mezbûr Said Ağa’ya semen-i ma‘lûm ve makbûza bey‘ ve teslîm etmekle mâ‘adâ üç sehm hisse-i şâyi‘ası yedinde mülkü olduğu hâlde mezbûr Mehmed Ağa vefât etdikde âlât-ı gedik-i mezkûrun üç sehm hisse-i şâyi‘a-i merkūmesi ber tashîh-i mezkûr veresesi müvekkilelerim merkūmetân Esma Hatun ve Behiye Hatun ve müvekkil-i mezbûr Mustafa Efendi ile vesâyâ-yı mezkûresine âid ve râci‘ oldukdan sonra ben müvekkilelerim vasi ve nâzır-ı merkūmetân Esma Hatun ve Behiye Hatun’a izâfetle bi’l-vekâle ve vekîl-i hâzır-ı mezbûr Osman Ağa dahi müvekkil-i mezbûr Mustafa Efendi’ye izâfetle bi’l-vekâle üç sehm hisse-i şâyi‘a-i âlât-ı gedik-i mezkûru işbu şehr-i hâlin yedinci günü târihiyle müverrah mahkeme-i mezkûreden verilen bir kıt‘a ilmühaber mantûkunca lede’l-müzâyede ve gıbbe inkıtâ‘ı’r-rağbe el-yevm semen-i misli idüğü bi’l-ihbâr mütehakkık olan altı bin guruşa tarafeynden îcâb ve ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile hâzır-ı mezbûr Said Ağa’nın izniyle mezbûr el-Hâc İbrahim Efendi’ye bey‘ ve temlîk ve vech-i lâyıkıyla teslîm eylediğimizde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semeni olan meblağ-ı merkūm altı bin guruşu tamâmen bize def‘ u teslîm biz dahi yedinden bi’t-tamâm ve’l-kemâl ahz u kabz edip mebî‘-i mezkûrun tağrîr ve gabnine müte‘allika da‘vâdan mezbûr el-Hâc İbrahim Efendi’nin zimmetini ibrâ-yı sahîh-i şer‘î ile ben müvekkilelerim merkūmetân Esma Hatun ve Behiye Hatun’un ancak nefislerine izâfetle bi’l-vekâle vekîl-i mezbûr Osman Ağa dahi müvekkil-i mezbûr Mustafa Efendi’ye izâfetle bi’l-vekâle ibrâ vü ıskāt eylediğimizde mezbûr el-Hâc İbrahim Efendi dahi kezâlik mebî‘-i mezkûrun tağrîr ve gabnine müte‘allika da‘vâdan müvekkilelerim merkūmetân Esma Hatun ve Behiye Hatun’un ve müvekkil-i mezbûr Mustafa Efendi’nin zimmetlerini ibrâ-yı sahîh-i şer‘î ile ibrâ vü ıskāt ve tarafeynden her birimiz ber-minvâl-i muharrer âharın ibrâsını asâleten ve vekâleten kabûl eyledik, ba‘de’l-yevm âlât-ı gedik-i mezkûrun üç sehm hisse-i şâyi‘a-i merkūmesinde müvekkilelerim mezbûretân Esma Hatun ve Behiye Hatun’un ve müvekkil-i mezbûr Mustafa Efendi’nin aslâ ve kat‘â alâka ve medhalleri kalmayıp mezbûr el-Hâc İbrahim Efendi’nin mülk-i müşterâsı ve hakk-ı sırfı olmuşdur dedikde gıbbe’t-tasaduki’ş-şer‘î mezbûr el-Hâc İbrahim Efendi meclis-i şer‘-i münîrde bâ‘isetü’l-kitâb mezbûretân Esma ve Behiye Hatunlar taraflarından vekîl-i şer‘îleri mezbûr es-Seyyid el-Hâc Hafız Mehmed Raşid Efendi mahzarında takrîr-i kelâm edip ben dahi ber-minvâl-i muharrer ânifen şirâen mâlik olduğum üç sehm hisse-i şâyi‘a-i âlât-ı gedik-i mezkûru tarafeynden bi’l-îcâb ve’l-kabûl bâtten ve sahîhan be-safka-i vâhide mezbûr Said Ağa’nın izniyle altı bin guruş semen-i makbûza müvekkiletân-ı mezbûretân Esma ve Behiye Hatunlar için seviyyen vekil-i mezbûr es-Seyyid el-Hâc Mehmed Raşid Efendi’ye bey‘ ve temlîk ve vech-i lâyıkıyla teslîm eylediğimde ol dahi ber-vech-i muharrer müvekkileleri mezbûretân Esma ve Behiye Hatunlar için bi’l-vekâle iştirâ ve temellük ve tesellüm ve kabz u kabûl edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile kabûlümüzü hâvî bi’l-asâle ve izâfetle bi’l-vekâle ibrâ vü ıskāt eyledik ba‘de’l-yevm üç sehm hisse-i şâyi‘a-i âlât-ı gedik-i mezkûr müvekkiletân-ı merkūmetân Esma ve Behiye Hatunların seviyyen mülk-i müşterâları ve hakk-ı sırfları olup benim aslâ ve kat‘â alâka ve medhalim kalmamışdır dedikde gıbbe’t-tasaduki’ş-şer‘î mâ-vaka‘a bi’t-taleb ketb olundu. Fî 12 Muharrem sene 1279 Şuhûdü’l-hâl Muhzır Süleyman Ağa b. ( ), Muhzır İsmail Ağa b. ( ), Muhzır Mustafa Ağa b. ( ), Muhzır Feyzullah Ağa b. ( ), ve gayruhum