İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 124 Hüküm no: 63 Orijinal metin no: [13b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çukacı Dimitraki v. Panayot’un eşine 5.000 kuruş hibe etmesi Husûs kıt‘a - 5 Tahakkuk-ı özr-i şer‘îye binâen husûs-ı âti’l-beyânın mahallinde ketb ü tahrîri için cânib-i şerî‘at-ı garrâdan bi’l-iltimâs me’uzûnen irsâl olunan Kâtib es-Seyyid Hafız Osman Nuri Efendi İstanbul hısnı ebbvâbından Fenar kapısı dâhilinde Tahtaminare mahallesinde vâki‘ teba‘a-i Devlet-i aliyye’nin Rum milletinden Çukacı Dimitraki v. Panayot’un sâkin olduğu menzile varıp zeyl-i kitâbda muharrerü’l-esâmî kimesneler huzûrlarında akd-i meclis-i şer‘-i nebevî etdikde merkūm Dimitraki meclis-i ma‘kūd-ı mezkûrde hâlâ zevcesi olup şahsı kesân-ı merkūmûn ta‘rîfleriyle mu‘arrefe olan işbu bâ‘isetü’r-rakīm Zobiçe bt. Tanaş mahzarında ikrâr-ı tâm ve takrîr-i kelâm edip hibe-i atîyetü’z-zikrin sudûruna değin yedimde mâlım olup eyâdî-i nâsda nakd hükmünde mütedâvil olan beş bin guruşu ben zevcem merkūme Zoyiçe’ye işbu meclis-i şer‘de hibe-i sahîha-i şer‘iyye ile hibe ve temlîk ve teslîm eylediğimde ol dahi meclis-i hibede bilâ mâni‘ ittihâb ve temellük ve tesellüm ve kabz u kabûl etmekle ol-vechile meblağ-ı mezkûr beş bin guruş merkūme Zobiçe’nin mevhûbeten mâlı olup benim hakkım ve medhalim kalmamışdır deyu mukırr-ı merkūm Dimitraki’nin sâdır olan bi’l-cümle takrîr-i meşrûhunu zevcesi merkūme Zobiçe tasdîk ve tahkîk eylediğini kâtib-i mûmâ-ileyh mahallinde ketb ü tahrîr ve ma‘ân meb‘ûs ümenâ-i şer‘le meclis-i şer‘e gelip alâ vukū‘ihi inhâ ve takrîr etmeğin mâ-vaka‘a bi’t-taleb ketb olundu. Fî 8 Safer sene 1279 Şuhûdü’l-hâl: Muhzır Ahmed Ağa b. ( ), Çukadâr Ahmed Ağa b. ( ), Ahâlisinden Kömürcü Osman Ağa b. Mustafa ve Muhtâr-ı sânîsi Ahmed Efendi b. Mustafa ve mahalle-i merkūme imâmı Hafız Hüseyin Efendi b. Hüseyin, Mahalle-i merkūme Rum milleti kahyâsı Dimitraki v. Yani, mahalle-i merkūme ahâlisinden mîrî kasâbı Dimitraki v. Aleksi, yine ahâli-i merkūmeden Tuhafcı Yorgi v. İspiro, yine ahâli-i merkūmeden Berber Yorgi v. Yamandi ve gayruhum