İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 125 Hüküm no: 64 Orijinal metin no: [13b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çukacı Dimitraki v. Panayot’un annesine 2.500 ve kardeşine 500 kuruş hibe etmesi Tahakkuk-ı özr-i şer‘îye binâen husûs-ı âti’l-beyânın mahallinde ketb ü tahrîri için cânib-i şerî‘at-ı garrâdan bi’l-iltimâs me’zuzûnen irsâl olunan Kâtib es-Seyyid Hafız Osman Nuri Efendi İstanbul hısnı ebbvâbından Fenar kapısı dâhilinde Tahtaminare mahallesinde vâki‘ teba‘a-i Devlet-i aliyye’nin Rum milletinden Çukacı Dimitraki v. Panayot’un sâkin olduğu menzile varıp zeyl-i kitâbda muharrerü’l-esâmî kimesneler huzûrlarında akd-i meclis-i şer‘-i nebevî etdikde merkūm Dimitraki meclis-i ma‘kūd-ı mezkûrda her biri teba‘a-i Devlet-i aliyye’den ve millet-i merkūmeden olup merkūm Dimitraki’nin anası olan şahsı mu‘arrefe Eleniko bt. Yamandi ve li-ebeveyn er karındaşı Bahçıvan Andon v. el-merkūm Panayot taraflarından husûs-ı âti’l-beyânda tasdîka vekîl-i şer‘îleri merkūm Dimitraki’nin bacanağı teba‘a-i Devlet-i aliyye’den ve millet-i merkūmeden Sarraf Petraki v. Yamandi muvâcehesinde ikrâr-ı tâm ve takrîr-i kelâm edip ben mâlımdan iki bin beşyüz guruşu bi’l-ifrâz anam müvekkile-i merkūme Eleniko’ya ve beş yüz guruşu dahi kezâlik bi’l-ifrâz karındaşım müvekkil-i merkūm Andon’a hibe-i sahîha-i şer‘iyye ile hibe ve temlîk ve vekîlleri olan merkūm Petraki’ye teslîm eylediğimde ol dahi bi’l-vekâle meclis-i hibede bilâ mâni‘ ittihâb ve temellük ve tesellüm ve kabz u kabûl etmekle ba‘de’l-yevm meblağ-ı mezkûr iki bin beş yüz guruş anam müvekkile-i merkūme Eleniko’nun ve beş yüz guruş dahi karındaşım müvekkil-i merkūm Andon’un mâl-ı mevhûbları olup benim aslâ ve kat‘â alâka ve medhalim kalmamışdır dedikde gıbbe’t-tasdîki’ş-şer‘î vâki‘ hâli kâtib-i mûmâ-ileyh mahallinde ketb ü tahrîr ve ma‘ân meb‘ûs ümenâ-i şer‘le meclis-i şer‘e gelip alâ vukū‘ihi inhâ ve takrîr etmeğin mâ-vaka‘a bi’t-taleb ketb olundu. Fî 8 Safer sene 1279 Şuhûdü’l-hâl: Eş-şahidune’s-sabıkūn ve gayruhum