İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 126 Hüküm no: 65 Orijinal metin no: [14a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çukacı Dimitraki v. Panayot’un iki ve altı yaşındaki kızlarının her birine 15.000 kuruş hibe etmesi Tahakkuk-ı özr-i şer‘îye binâen husûs-ı âti’l-beyânın mahallinde ketb ü tahrîri için cânib-i şerî‘at-ı garrâdan me’zûnen irsâl olunan Kâtib es-Seyyid Hafız Osman Nuri Efendi İstanbul hısnı ebvâbından Fenar kapısı dâhilinde Tahtaminare mahallesinde vâki‘ teba‘a-i Devlet-i aliyye’nin Rum milletinden Çukacı Dimitraki v. Panayot’un sâkin olduğu menzile varıp zeyl-i kitâbda muharrerü’l-esâmî kimesneler huzûrlarında akd-i meclis-i şer‘-i Nebevî etdikde zikr-i atî sagīrelerin babaları ve velîleri olan işbu bâ‘isü’r-rakīm merkūm Dimitraki meclis-i ma‘kūd-ı mezkûrde ikrâr-ı tâm ve takrîr-i kelâm edip ben mâlımdan sulbiye sagīre kızım tahminen altı yaşında Meltomini’ye on beş bin guruş ve diğer sulbiye sagīre kızım tahminen iki yaşında Saltana’ya dahi on beş bin guruş ki cem‘an kavâ’im-i nakdiye olan otuz bin guruşu hibe-i sahîha-i şer‘iyye ile bi’l-ifrâz hibe ve temlîk ve yine meclis-i hibede bilâ mâni‘ ittihâb ve temellük ve tesellüm ve kabz u kabûl etmemle ol vechile meblağ-ı mecmû‘-ı mezkûr otuz bin guruşda benim kat‘â hakkım ve alâkam kalmayıp kızlarım sagīretân-ı merkūmetânın vech-i meşrûh üzere emvâl-ı mevhûbeleri ve hakk-ı sırfları olmuşdur dedikde, gıbbe’t-tasdîki’ş-şer‘î vâki‘ hâli kâtib-i mûmâ-ileyh mahallinde ketb ü tahrîr ve ma‘ân meb‘ûs ümenâ-i şer‘le meclis-i şer‘e gelip alâ vukū‘ihi inhâ ve takrîr etmeğin mâ-vaka‘a bi’t-taleb ketb olundu. Fî 8 Safer sene 1279 Şuhûdü’l-hâl: Eş-şahidune’s-sabıkūn