İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 126 Hüküm no: 66 Orijinal metin no: [14a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çukacı Dimitraki v. Panayot’un iki ve altı yaşındaki kızlarına annelerini vasi, ortağı Dimitraki v. Yosef’i de onun üzerine nâzır tayin etmesi Tahakkuk-ı özr-i şer‘îye binâen husûs-ı âti’l-beyânın mahallinde ketb ü tahrîri için cânib-i şerî‘at-ı garrâdan me’zûnen irsâl olunan Kâtib es-Seyyid Hafız Osman Nuri Efendi İstanbul hısnı ebvâbından Fenar kapısı dâhilinde Tahtaminare mahallesinde vâki‘ teba‘a-i Devlet-i aliyye’nin Rum milletinden Çukacı Dimitraki v. Panayot’un sâkin olduğu menzile varıp zeyl-i kitâbda muharrerü’l-esâmî kimesneler huzûrlarında akd-i meclis-i şer‘-i Nebevî etdikde merkūm Dimitraki meclis-i ma‘kūd-ı mezkûrda hâlâ zevcesi şahsı kesân-ı merkūmûn ta‘rîfleriyle mu‘arrefe olan işbu bâ‘isetül-vesika Zobiçe bt. Tanaş muvâcehesinde ikrâr-ı tâm ve takrîr-i kelâm edip benim firâşımdan hâsılalar ve zevcem merkūmeden mütevellideler sulbiye sahîha kızlarım Meltomini ve Saltana nâm sagīretânın vakt-i rüşd ve sedâdlarına değin tesviye-i emirlerine zevcem hâzıra-i merkūme Zobiçe’yi mâba‘d-ı mevtime izâfetle vasiyy-i muhtâr nasb ve ihtiyâr eyledim ve mukaddemâ şerîkim gāib ani’l-meclis Dimitraki v. Yosef’i dahi kabûlüne mevkûfe nâzır nasb ve ta‘yîn eylediğimde merkūme Zobiçe vesâyet-i mezkûreyi kabûl ve hizmet-i lâzimesini vaktinde kemâ yenbagī edâya ta‘ahhüd ve iltizâm eyledi dedikde gıbbe’t-tasdîki’ş-şer‘î vak‘-i hâli kâtib-i mûmâ-ileyh mahallinde ketb ü tahrîr ve ma‘ân meb‘ûs ümenâ-i şer‘le meclis-i şer‘e gelip alâ vukū‘ihi inhâ ve takrîr etmeğin mâ-vaka‘a bi’t-taleb ketb olundu. Fî 8 Safer sene 1279 Şuhûdü’l-hâl: Eş-şahidune’s-sabıkūn