İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 127 Hüküm no: 67 Orijinal metin no: [14a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zobiçe bt. Tanaş’ın eşi Çukacı Dimitraki v. Panayot’ta bulunan 12.500 kuruşunu alması Tahakkuk-ı özr-i şer‘îye binâen husûs-ı âti’l-beyânın mahallinde ketb ü tahrîri için cânib-i şerî‘at-ı garrâdan bi’l-iltimâs me’zûnen irsâl olunan Kâtib es-Seyyid Hafız Osman Nuri Efendi İstanbul hısnı ebvâbından Fenar kapısı dâhilinde Tahtaminare mahallesinde vâki‘ teba‘a-i Devlet-i aliyye’nin Rum milletinden Çukacı Dimitraki v. Panayot’un sâkin olduğu menzile varıp zeyl-i kitâbda muharrerü’l-esâmî kimesneler huzûrlarında akd-i meclis-i şer‘-i Nebevî etdikde merkūm Dimitraki’nin hâlâ zevcesi olup şahsı kesân-ı merkūmûn ta‘rîfleriyle mu‘arrefe olan Zobiçe bt. Tanaş meclis-i ma‘kūd-ı mezkûrde işbu bâ‘isü’r-rakīm merkūm Dimitraki mahzarında ikrâr-ı tâm ve takrîr-i kelâm edip zevcim merkūm Dimitraki zimmetinde cihet-i karzdan alacak hakkım olan on iki bin beş yüz guruşu zevcim merkūm Dimitraki işbu meclis-i şer‘de bana def‘ u teslîm eylediğinde ben dahi yedinden bi’t-tamâm ve’l-kemâl ahz u kabz edip meblağ-ı mezkûrdan merkūm Dimitraki yed ve zimmetinde bir akçe ve bir habbe hakkım ve alacağım kalmamışdır deyu mukırra-i zevce-i merkūme Zobiçe’nin sâdır olan bi’l-cümle takrîr-i meşrûhunu merkūm Dimitraki tasdîk ve tahkîk eylediğini kâtib-i mûmâ-ileyh mahallinde ketb ü tahrîr ve ma‘ân meb‘ûs ümenâ-i şer‘le meclis-i şer‘a gelip alâ vukū‘ihi inhâ ve takrîr etmeğin mâ-vaka‘a bi’t-taleb ketb olundu. Fî yevmi’l-sâmin min Saferi’l-hayr sene tis’a ve seb‘în ve mi’eteyn ve elf. Şuhûdü’l-hâl: Muhzır Ahmed Ağa b. ( ), Çukadâr Ahmed Ağa b. ( ), Ahâlisinden Kömürcü Osman Ağa b. Mustafa ve Muhtâr-ı sânîsi Ahmed Efendi b. Mustafa, mahalle-i merkūme imâmı Hafız Hüseyin Efendi b. Hüseyin, mahalle-i merkūme kahyâsı Dimitraki v. Yani, mahalle-i merkūme ahâlisinden mîrî kasâbı Dimitraki v. Aleksi, yine ahâli-i merkūmeden Tuhafçı Yorgi v. İspiro, yine ahâli-i mahalleden Berber Yorgi v. Yamandi ve gayruhum