İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 128 Hüküm no: 68 Orijinal metin no: [14a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Sabire Hanım bt. Yusuf Ağa’nın boşandığı eşinden çocuğuna nafaka bağlattırması Nafaka-i sagīr 75 guruş Mahmiye-i İstanbul hısnı ebvâbından Eğrikapı dâhilinde Molla Aşkî mahallesinde sâkine zâtı ta‘rîf-i şer‘î ile mu‘arrefe olan işbu bâ‘isetü’l-vesîka Âişe Sabire Hanım bt. el-hâzır kurukahveci esnâfından Yusuf Ağa b. Ali meclis-i şer‘-i şerîf-i lâzımü’t-teşrîfde zevc-i sâbıkı kurukahveci esnâfından Ali Rıza Efendi b. el-hâzır Ahmed Ağa mahzarında takrîr-i kelâm ve ta‘bîr ani’l-merâm edip mezbûr Ali Rıza Efendi ile mukaddemâ hâl-i zevciyet beynimizde kāime iken mezbûrun firâşından hâsıl ve benden mütevellid ve bi-hakkı’l-hıdâne hâlâ hacr ve terbiyemde olan sulbî oğlu tahmînen iki buçuk yaşında Ahmed Agah nâm sagīrin aslâ mâlı olmayıp nafaka ve kisveye eşedd-i ihtiyâc ile muhtâc olmağla sagīr-i mezbûrun nafaka ve kisve-bahâsı için pederi mezbûr Ali Rıza Efendi üzerine kıbel-i şer‘den kadr-ı ma‘rûf meblağ farz ve takdîr olunmak bi’l-hıdâne matlûbumdur dedikde gıbbe’t-tasdîki’ş-şer‘î hâsim-i vâlâ-cenâbi’l-muvakki‘ ismuhu fî sadri’l-kitâb tûbâ lehû ve hüsnü me’âb efendi hazretleri dahi sagīr-i mezbûrun nafaka ve kisve-bahâsı için pederi mezbûr Ali Rıza Efendi üzerine işbu târih-i vesîkadan bi’t-terâzi beher şehr yetmiş beş guruş farz ve takdîr buyurup meblağ-ı mefrûz-ı mezkûru sagīr-i mezbûrun nafaka ve kisve ve sâir levâzım-ı zarûriyesine harc u sarfa ve lede’l-iktizâ istidâneye ve inde’z-zafer pederi mezbûr Ali Rıza Efendi üzerine rucû‘a vâlidesi ve hâdinesi mezbûre Âişe Sabire Hanım’a izin vermeğin mâ-vaka‘a bi’t-taleb ketb olundu. Fi’l-yevmi’r-râbi‘ min Saferi’l-hayr sene tis‘a ve seb‘în ve mi’eteyn ve elf. Şuhûdü’l-hâl: Muhzır Süleyman Ağa b. ( ), Muhzır Mehmed Ağa b. ( ), Muhzır el-Hâc Salih Ağa b. ( ), ve gayruhum