İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 128 Hüküm no: 69 Orijinal metin no: [14b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma Fitnat Hanım bt. Mehmed Şakir Efendi’nin boşandığı eşinden çocuğuna nafaka bağlattırması Nafaka-i sagīre 120 guruş Medîne-i Hazret-i Ebâ Eyüb el-Ensârî radiye anhü’l-bârî mahallâtından Cezerî Kâsım Paşa mahallesinde sâkine zâtı ta‘rîf-i şer‘î ile mu‘arrefe olan işbu bâ‘isetü’l-kitâb Fâtıma Fitnat Hanım bt. el-hâzır Mehmed Şakir Efendi meclis-i şer‘-i şerîf-i lâzımü’t-teşrîfde zevc-i sâbıkı İstanbul’da Aksaray kurbünde Çakır Ağa mahallesinde sakin Mekteb-i Tıbbîye-i Şâhâne meclisi ketebesinden İbrahim Edhem Efendi b. el-hâzır Mühimme Kalemi ketebesinden Mehmed Nuri Efendi mahzarında takrîr-i kelâm ve ta‘bîr ani’l-merâm edip mezbûr İbrahim Edhem Efendi ile mukaddemâ zevciyet beynimizde kāime iken mezbûrun firâşından hâsıla ve benden mütevellide ve bi-hakkı’l-hıdâne hâlâ hacr ve terbiyemde olan sulbiye kızı tahmînen üç yaşında Âişe Hayriye nâm sagīrenin aslâ mâlı olmayıp nafaka ve kisveye eşedd-i ihtiyâc ile muhtâce olmağla sagīre-i mezbûrenin nafaka ve kisve ve sâir levâzım-ı zarûriyesi için pederi mezbûr İbrahim Edhem Efendi üzerine kıbel-i şer‘den kadr-ı ma‘rûf meblağ farz ve takdîr buyurulmak bi’l-hıdâne matlûbumdur dedikde, gıbbe’t-tasdîk hâkim-i hâsim-i vâlâ-cenâbi’l-muvakki‘ ismuhu fî sadri’l-kitâb tûbâ lehû ve hüsnü me’âb efendi hazretleri dahi sagīre-i mezbûrenin nafaka ve kisve ve sâir levâzım-ı zarûriyesi için pederi mezbûr İbrahim Edhem Efendi üzerine işbu târih-i kitâbdan i‘tibâren bi’t-terâzi beher şehr yüz yirmişer guruş nafaka farz ve takdîr buyurup meblağ-ı mefrûz-ı mezkûr beher şehr yüz yirmişer guruşu sagīre-i mezbûrenin nafaka ve kisve ve sâir levâzım-ı zarûriyesine harc u sarfa ve lede’l-iktizâ istidâneye ve inde’z-zafer pederi mezbûr İbrahim Edhem Efendi üzerine rucû‘a vâlidesi ve hâdinesi mezbûre Fâtıma Fitnat Hanım’a izin vermeğin mâ-vaka‘a bi’t-taleb ketb olundu. Fî 6 Muharrem sene 1279 Şuhûdü’l-hâl: Muhzır Süleyman Ağa b. ( ), Muhzır Ahmed Ağa b. ( ), Muhzır Mustafa Ağa b. ( ), Muhzır Salih Ağa b. ( ),