İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 129 Hüküm no: 70 Orijinal metin no: [14b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sekiz aylık hamile olan Fâtıma Fitnat Hanım’ın boşandığı eşinden nafaka talebi Nafaka-i haml 150 guruş Medîne-i Hazret-i Ebâ Eyüb el-Ensârî radiye anhü rabbühü’l-bârî mahallâtından Cezerî Kâsım Paşa mahallesinde sâkine zâtı ta‘rîf-i şer‘î ile mu‘arrefe olan işbu bâ‘isetü’l-kitâb Fâtıma Fitnat Hanım bt. el-hâzır Mehmed Şakir Efendi meclis-i şer‘-i şerîf-i enverde zevc-i sâbıkı İstanbul’da Aksaray kurbünde Çakır Ağa mahallesinde sakin Mekteb-i Tıbbîye-i Şâhâne meclisi ketebesinden İbrahim Edhem Efendi b. el-hâzır Mühimme Kalemi ketebesinden Mehmed Nuri Efendi mahzarında takrîr-i kelâm ve ta‘bîr ani’l-merâm edip mezbûr İbrahim Edhem Efendi ile mukaddemâ zevciyet beynimizde kāime iken mezbûrun firâşından hâsıl batnımda müstebîn tahminen sekiz aylık hamlim olmağla vaz‘-ı haml ile iddetim münkaziye oluncaya değin nafaka ve kisve-bahâm için mezbûr İbrahim Edhem Efendi üzerine kıbel-i şer‘den kadr-ı ma‘rûf meblağ farz ve takdîr buyurulmak bi’l-hıdâne murâdımdır dedikde gıbbe’t-tasdîk hâkim-i hâsim-i vâlâ-cenâbi’l-muvakki‘ ismuhû fî sadri’l-kitâb tûbâ lehû ve hüsnü me’âb efendi hazretleri dahi mezbûre Fâtıma Fitnat Hanım’ın vaz‘-ı haml ile iddeti munkaziye oluncaya değin nafaka ve kisve-bahâsı için mezbûr İbrahim Edhem Efendi üzerine işbu târih-i kitâbdan i‘tibâren kadr-ı ma‘rûf olan beher şehr yüz ellişer guruşu bi’t-terâzi farz ve takdîr buyurup meblağ-ı mefrûz-ı mezkûr beher şehr yüz ellişer guruşu kendi nafaka ve kisve ve sâir levâzım-ı zarûriyesine harc u sarfa ve lede’l-iktizâ istidâneye ve inde’z-zafer mezbûr İbrahim Edhem Efendi üzerine rucû‘a mezbûre Fâtıma Fitnat Hanım’a izin vermeğin mâ-vaka‘a bi’t-taleb ketb olundu. Fî 6 Muharrem sene 1279 Şuhûdü’l-hâl: Eş-şahidune’s-sabıkūn