İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 130 Hüküm no: 71 Orijinal metin no: [14b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Turşucu esnâfından Mehmed Efendi’nin vefât eden kızkardeşinden kendisine kalan turşucu dükkânı hisselerini satışı Turşucu gediği mübâya‘ası 2000 guruş Âsitâne-i sa‘âdet âşiyâne ve bilâd-ı selâse mahkemelerine bâ-fermân-ı âlî mine’l-kadîm merbût olan duhâncı gediklerinden mâ‘adâ gerek Dersaâdet ve gerek bilâd-ı selâse-i mezkûrede kâin ber-vech-i mülkiyet tasarruf olunmakda bulunan her nev‘ gediklerin mübâya‘a ve ikrâr-ı mülk ve hibe ve irsen intikāl misillü kâffe-i mu‘âmelâtı ve vukū‘ bulan muhâkemâtı münhasıran ve mahsûsan İstanbul Mahkemesi’nden icrâ ve iktizâ eden i‘lâm ve hüccet-i şer‘iyyeleri ancak mahkeme-i mezkûre tarafından i‘tâ olunmak ve gedikât ashâbının rızâ ve muvâfakatları olmadıkça kadîm mülk kirâları tezyîd olunmamak ve senedât-ı sahîha ve mu‘tebere ile ber-vech-i mülkiyet tasarruf olunmakda bulunan gediklerin müstakır oldukları mahalden ihrâc ve imhâsı zımnında mülk sâhibleri tarafından da‘vâya tasaddî olunur ise hükkâm-ı şer‘-i şerîf cânibinden istimâ‘ olunmaması bâlâsı tuğrâ-yı garrâ-yı hazret-i cihân-bânî ile muvaşşah ve müzeyyen bir kıt‘a nizâmnâme ve bâ-fermân-ı âlî müesses olan nizâm-ı müstahsene iktizâsından bulunduğuna binâen mahmiye-i İstanbul hısnı ebvâbından Langa yeni kapısı dâhilinde Eyne Bey mahallesinde sâkin iken bin iki yüz yetmiş üç senesi Recebü’l-ferdinin onuncu günü vefât eden Ümmügülsüm Hatun bt. Ahmed bin Abdullah’ın verâseti zevc-i metrûku turşucu esnâfından Halil Ağa b. İbrahim ile li-ebeveyn er karındaşı esnâf-ı merkūmeden Mehmed Efendi’ye münhasıra ve tashîh-i mesele-i mirâsları iki sehimden olup sihâm-ı mezkûreden bir sehmi zevc-i mezbûr Halil Ağa’ya ve bir sehmi dahi ah-i mezbûr Mehmed Efendi’ye isâbeti lede’ş-şer‘i’l-enver zâhir ve mütehakkık oldukdan sonra mezbûr Mehmed Efendi meclis-i şer‘-i şerîf-i enverde bâ‘isü’l-kitâb esnâf-ı merkūmeden Mehmed Ağa b. Ahmed mahzarında esnâf-ı merkūme kethüdâsı Ahmed Ağa b. İbrahim ve yiğitbaşısı İbrahim Ağa b. Veliyyüddin ve esnâfından Hacekadınlı Ali Ağa b. Osman ve Kıztaşlı Mustafa Ağa b. Hüseyin ve Küçükpazarlı Ahmed Ağa b. Hüseyin ve Kulaksızlı Ahmed Ağa b. İsmail hâzır oldukları hâlde ikrâr-ı tâm ve takrîr-i kelâm edip mahmiye-i mezkûrede Kaliçeciler Köşkü kurbünde Molla Şeref mahallesinde vâki‘ bir tarafdan mukaddemâ tütüncü esnâfından el-Hâc Halil Ağa ve hâlâ Aşçı el-Hâc Ahmed Ağa’nın tütüncü dükkânı ve bir tarafdan bostan ve bir tarafdan Ebubekir Ağa b. el-Hâc Mehmed Ağa’nın berber dükkânı ve taraf-ı râbi‘i tarîk-i âm ile mahdûd merhûm Kara Abalı Mehmed Efendi Vakfı müsakkafâtından turşucu esnâfından Mercanlı Mehmed Efendi’nin bi’l-icâreteyn taht-ı tasarrufunda olan şehriye üç guruş kirâ-yı kadîmelü iki kepenkli bir bâb turşucu dükkânı derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûme yedimde olup bin iki yüz otuz beş senesi Recebü’l-ferdinin yirmi altıncı günü târihiyle müverraha İstanbul Bâb mahkemesi sicillinden muhrece işbu bir kıt‘a mübâya‘a hücceti kaydı mantûkunca mezbûr Halil Ağa ile zevcesi müteveffât-ı mezbûre Ümmügülsüm Hatun’un hayâtında ile’l-fevt yedlerinde münâsefeten mülkleri iken kız karındaşım mezbûre Ümmügülsüm Hatun vefât etdikde âlât-ı gedik-i mezkûrdan ber-minvâl-i muharrer mâlike olduğu nısf hisse-i şâyi‘a-i âlât-ı gedik-i mezkûresi benimle zevci Halil Ağa’ya ber tashîh-i mezkûr mevrûs olup ol-vechile nısf hisse-i şâyi‘a-i âlât-ı gedik-i mezkûr müteveffât-ı mezbûre Ümmügülsüm Hatun’dan benimle mezbûr Halil Ağa’ya ber tashîh-i merkūm mevrûs olduğunu esnâf-ı hâzırun-ı mezbûrun alâ tarîki’ş-şehâde ihbâr ve kethüdâ-yı mezbûr dahi bir kıt‘a ilmühaber takdîm etmekle ben nısf hisse-i şâyi‘a-i mezkûreden ber tashîh-i mezkûr mâlik olduğum bir sehm hisse-i şâyi‘amı tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile bâ-izn-i şerîk-i merkūm iki bin guruşa mezbûr Mehmed Ağa’ya bey‘ ve temlîk ve vech-i lâyıkı üzere teslîm eylediğimizde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semeni olan meblağ-ı merkūm iki bin guruşu tamâmen bana def‘ u teslîm ben dahi yedinden bi’t-tamâm ve’l-kemâl ahz u kabz edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile kabûlümüzü hâvî ibrâ vü ıskāt eyledik, ba‘de’l-yevm nısf hisse-i şâyi‘a-i âlât-ı gedik-i mezkûre ber tashîh-i merkūm birer sehm hisse-i şâyi‘a-i mezkûresinde benim aslâ ve kat‘â [15a] alâka ve medhalim kalmayıp mezbûr Mehmed Ağa’nın mülk-i müşterâsı ve hakk-ı sırfı olmuşdur dedikde gıbbe’t-tasaduki’ş-şer‘î mâ-vaka‘a bi’t-taleb ketb olundu. Fi’l-yevmi’s-sâdis ve’l ışrin min Muharremi’l-harâm li-sene tis’a ve seb‘în ve mi’eteyn ve elf. Şuhûdü’l-hâl: Muhzır İsmail Ağa b. ( ), Muhzır Mustafa Ağa b. ( ), Muhzır Şakir Ağa b. ( ), Muhzır Feyzullah Ağa b. ( ), ve gayruhum