İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 131 Hüküm no: 72 Orijinal metin no: [15a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Artin v. Kirkor’un uncu değirmenindeki hisselerini Kirkor v. Kigork’a satması Kasımpaşa’da uncu değirmeni 8250 guruş Kezâlik teba‘a-i Devlet-i aliyye’nin Ermeni milletinden ve uncu esnâfından Artin v. Kirkor meclis-i şer‘-i şerîf-i hatîrde teba‘a-i Devlet-i aliyye’nin Ermeni milletinden olduğu bâ-ilmühaber mütehakkık olan esnâf-ı merkūmeden bâ‘isü’r-rakīm Kirkor v. Kigork muvâcehesinde ekmekçi ve uncu esnâfının kethüdâsı İbrahim Ağa b. Ahmed ile mazbûtü’l-esâmî nizâm ustaları taraflarından mürsel vekîlleri esnâf-ı merkūme yiğitbaşısı es-Seyyid İsmail Efendi b. es-Seyyid Mehmed Emin hâzır olduğu hâlde ikrâr-ı tâm ve takrîr-i kelâm edip mahrûse-i Galata’ya muzâfe kasaba-i Kasımpaşa’da Matbahardı nâm mahalde kâin bir tarafdan Mihak değirmeni demekle arîf bir bâb uncu değirmeni ve bir tarafdan sığır kasâbı selhânesi ve tarafeyni tarîk-i âm ile mahdûd şehriye on beş guruş kirâlı üç horoslu bir bâb uncu değirmeni merhûm Kasımpaşa Vakfı müsakkafâtından olarak altı hisse i‘tibârıyla beş hissesi esnâf-ı merkūmeden Kaspar’ın ve bir hissesi dahi Arakil’in bâ-temessük-i mütevelli bi’l-icâreteyn taht-ı tasarruflarında olup ve sâlifü’l-beyân değirmen derûnunda mevcûde beyne’l-esnâf gedik ta‘bîr olunur on iki re’s bârgir ve onlara tâbi‘ sâir âlât-ı lâzime-i ma‘lûmenin iki re’s bârgir ve onlara isâbet eden âlât-ı sâiresi Ağya v. Hazer’in yedlerinde mülkleri olup mâ‘adâ dört re’s bârgir ve onlara îcâb eden âlât-ı sâiresi bin iki yüz yetmiş iki senesi Zilhicceti’ş-şerîfesinin yirminci günü tarihiyle müverraha ve ol târihde Dârü’l-hilâfeti’l-aliyye kādısı olan Osman Efendizâde Mehmed Emin Efendi merhûmun imzâ ve hatemini hâviye bir kıt‘a hâmiş-i hüccet ve altı re’s bârgir ve onlara iktizâ eden âlât-ı sâiresi dahi sene-i sâbıka yani bin iki yüz yetmiş sekiz senesi Cumâdelûlâsının on altıncı günü târihiyle müverraha ve ol târihde Dârü’l-hilâfeti’l-aliyye kādısı olan sudûr-ı izâmdan semâhatlü Mehmed Arif Hilmi Efendi hazretlerinin imzâ ve hatmlarını hâviye işbu bir kıt‘a mübâya‘a hücceti ve kethüdâ-yı mezbûrun takdîm eylediği bir kıt‘a ilmühaber mantûklarınca akd-i âti’z-zikrin sudûruna değin yedimde mülk ve hakkım olmağla ben âlât-ı gedik-i mezkûrdan ber minvâ-i muharrer mâlik olduğum cem‘an on re’s bârgir ve onlara îcâb eden âlât-ı sâirenin beş re’s bârgir ve onlara iktizâ eden âlât-ı sâiresini yedimde bi’l-ibkā mâ‘adâ âhar beş re’s bârgir ve onlara îcâb eden âlât-ı sâiresini tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile bâ-izn-i şerîk sekiz bin iki yüz elli guruşa merkūm Kirkor’a bey‘ ve temlîk ve vech-i lâyıkıyla teslîm eylediğimde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semeni olan meblağ-ı merkūm sekiz bin iki yüz elli guruşu tamâmen bana def‘ u teslîm ben dahi yedinden bi’t-tamâm ve’l-kemâl ahz u kabz edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile kabûlümüzü hâvî ibrâ vü ıskāt eyledik ba‘de’l-yevm sâlifü’l-beyân âhar beş re’s bârgir ve onlara îcâb eden âlât-ı sâirede benim aslâ ve kat‘â alâka ve medhalim kalmayıp merkūm Kirkor’un mülk-i müşterâsı ve hakk-ı sırfı olmuşdur dedikde gıbbe. Fî 5 Muharrem sene 1279 Şuhûdü’l-hâl: Muhzır İsmail Ağa b. ( ), Muhzır Mehmed Ağa b. ( ), Muhzır Şakir Ağa b. ( ), Muhzır Feyzullah Ağa b. ( ), ve gayruhum