İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 133 Hüküm no: 73 Orijinal metin no: [15a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Reis Vasil v. Kokozoğlu Kostandi ile Sakızlıoğlu Dimitri v. Yorgi’nin sahip oldukları şerbethâne hisselerini Kilârcı Hıristo v. İlyasko’ya satması Arnavud karyesinde şerbethâne mübâya‘ası 8000 guruş Kezâlik mahrûse-i Galata’ya muzâfe Arnavud karyesinde sâkine bundan mukaddem fevt olan teba‘a-i Devlet-i aliyye’nin Rum milleti nisvânından Saltane bt. Tanaş v. Adam’ın sadrî kebîr oğlu ve hasren vârisi olup teba‘a-i Devlet-i aliyye’den olduğu mütehakkık olan Reis Vasil v. el-müteveffâ Kokozoğlu Kostandi teba‘a-i Devlet-i aliyye’nin Rum milletinden ve şerbethâneci esnâfından Sakızlıoğlu Dimitri v. Yorgi hâzır olduğu hâlde meclis-i şer‘-i şerîf-i hatîrde karye-i mezkûrede sâkin teba‘a-i Devlet-i aliyye’nin Rum milletinden olduğu bâ-ilmühaber mütehakkık olan bâ‘isü’r-rakīm Kilârcı Hıristo v. İlyasko muvâcehesinde esnâf-ı merkūmenin karye-i mezkûre kolu ustabaşısı Mihal v. Dimitri hâzır olduğu hâlde ikrâr-ı tâm ve takrîr-i kelâm edip sâlifü’l-beyân Arnavud karyesinde Aşçı sokağında vâki‘ bir tarafdan Şalcı Kostaki menzili ve bir tarafdan Ayafanice menzili ve ba‘zen Duvarcı Dimitri menzili ve bir tarafdan tarîk-i hâs ve taraf-ı râbi‘i tarîk-i âm ile mahdûd karye-i mezkûrede vâki‘ Rum kenisesi fukârasına meşrûta vakf müsakkafâtından diğer Saltane bt. Tanaş ve Hekimoğlu Corci v. İstavri’nin bi’l-icâreteyn taht-ı tasarruflarında olan şehriye yirmi guruş kirâlı Küçük Kostantin koltuğu demekle arîf bir bâb şerbethâne derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûmenin nısf hisse-i şâyi‘ası bin iki yüz yetmiş altı senesi Zilhicceti’ş-şerîfesinin ikinci günü târihiyle müverrah ve ol târihde rüsûm-i zecriye nâzırı olan sa‘âdetlü Nazif Beyefendi’nin mührüyle memhûr işbu bir kıt‘a sûret ve hâlâ Zecriye Nâzırı izzetlü Hüseyin Efendi’nin bir kıt‘a ilmühaber mantûklarınca hâzır-ı merkūm Dimitri’nin yedinde mülkü olup mâ‘adâ âhar nısf hisse-i şâyi‘ası dahi yedimde olup sene-i sâbıka yani bin iki yüz yetmiş sekiz senesi Zilka‘deti’ş-şerîfesinin on beşinci günü târihiyle müverrah hâlâ nâzır-ı mûmâ-ileyh Hüseyin Efendi’nin mührüyle memhûr bir kıt‘a i‘lâmı mantûkunca anam müteveffât-ı merkūme Saltane’nin hayâtında ile’l-fevt yedinde mülkü ba‘de vefâtihâ âhar nısf hisse-i şâyi‘a-i âlât-ı gedik-i mezkûr ancak bana mevrûs olmağla ben âlât-ı gedik-i mezkûrdan akd-i âti’z-zikrin sudûruna değin ber-minvâl-i muharrer mâlik olduğum âhar nısf hisse-i şâyi‘a-i mezkûreyi bi-safkatin vâhidetin dört bin guruşa ve hâzır-ı merkūm Dimitri dahi âlât-ı gedik-i mezkûrdan akd-i âti’z-zikrin sudûruna değin ber-minvâl-i muharrer mâlik olduğum âhar nısf hisse-i şâyi‘a-i mezkûreyi kezâlik bi-safkatin vâhidetin dört bin guruşa merkūm Hıristo’ya tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ile bey‘ ve temlîk ve teslîm eylediğimizde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semenleri olan cem‘an sekiz bin guruşu tamâmen bize def‘ u teslîm biz dahi yedinden bi’t-tamâm ve’l-kemâl ahz u kabz eyledik fîmâ-ba’d âlât-ı gedik-i mezkûrde benimle hâzır-ı merkūm Dimitri’nin aslâ ve kat‘â alâka ve medhalimiz kalmayıp merkūm Hıristo’nun mülk-i müşterâsı ve hakk-ı sırfı olmağla mebî‘-i mezkûrların tağrîr ve gabnlarına müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile kabûlümüzü hâvî ibrâ vü ıskāt eyledik dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 22 Muharrem sene 1279 Şuhûdü’l-hâl: Muhzır İsmail Ağa b. ( ), Muhzır Mustafa Ağa b. ( ), Muhzır el-Hâc Salih Ağa b. ( ), Muhzır Feyzullah Ağa b. ( ), ve gayruhum