İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 134 Hüküm no: 74 Orijinal metin no: [15a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Anadolu Eğin kazası ahalisinden ve kasâb esnâfı ustalarından olup vefât eden Hacı Ömer Ağa b. Osman’ın İstanbul’daki terekesinin tasfiyesi İbrâ Vilâyet-i Anadolu’da Eğin kazâsı kurâsından Kemerkâb karyesinde sâkin iken bundan akdem vefât eden Eğrikapı hâricinde kâin kasâb esnâfı ustalarından el-Hâc Ömer Ağa b. Osman bin Ömer’in verâseti zevce-i menkûha-i metrûkesi Fâtıma Hatun bt. el-Hâc Mustafa ile sulbiye kebîre kızları Hadice ve Âişe ve Emine Hatunlar ve li-ebeveyn er karındaşı kasâb esnâfından el-Hâc Numan Ağa’ya ba‘de inhisâr verese-i merkūmûndan mezbûrât Fâtıma ve Hadice ve Âişe ve Emine Hatunlar taraflarından kaza-i mezkûr mahkemesinin iki kıt‘a hüccet-i şer‘iyyeleri mantûklarınca husûs-ı âti’l-beyânda vekâlet-i âmme-i mutlaka-i sahîha-i şer‘iyye ile vekîlleri olduğu zâtlarını bi’l-ma‘rifeti’ş-şer‘iyye ârifân kazâ-i mezkûr ahâlisinden olup bu esnâda Âsitâne-i aliyyeye gelen tüccârdan Mustafa Ağa b. Veliyyüddin ve mezbûr el-Hâc Numan Ağa şehâdetleriyle ber-nehc -i şer‘î sâbit ve subût-ı vekâletine hükm-i şer‘î lâhık olan mezbûre Âişe Hatun’un zevci İbrahim Efendi b. Mehmed meclis-i şer‘-i münîrde kasâb esnâfı ustalarından işbu bâ‘isü’l-kitâb el-Hâc Abdullah Efendi b. Ali mahzarında mezbûr el-Hâc Numan Ağa hâzır olduğu hâlde ikrâr-ı tâm ve takrîr-i kelâm edip mezbûr el-Hâc Abdullah Efendi müvekkilelerim mezbûrâtın mûrisleri muteveffâ-yı mezbûr el-Hâc Ömer Ağa’nın hîn-i vefâtında Dersaâdet’de mevcûd terekesini vâzı‘u’l-yed olanlardan ahz u kabz ve kendülere irsâl ve teslîme ve husûs-ı mezkûrun mütevakkıf olduğu umûrun küllisine taraflarından vekîlleri olmak hasebiyle tereke-i müteveffâ-yı merkūmdan Dersaâdet’de ancak yirmi bin guruş ahz u kabz ve müvekkilelerim mezbûrâtın emirleriyle müteveffâ-yı merkūmun dâyini olan gāib ani’l-meclis Tarakçıoğlu Poliçeci Bogos’a def‘ u teslîm edip tereke-i müteveffâ-yı mezbûrdan mezbûr el-Hâc Abdullah Efendi’nin yedinde bir akçe ve bir habbe bâkī kalma[ma]ğla tereke-i müteveffâ-yı merkūm husûsuna ve işbu târih-i kitâba gelince sâir cemî‘ hukūk-ı şer‘iyyeye müte‘allika âmme-i de‘âvîden ben müvekkilelerim mezbûrâta izâfetle bi’l-vekâle ve hâzır-ı mezbûr el-Hâc Numan Ağa dahî bi’l-asâle mezbûr el-Hâc Abdullah Efendi’nin zimmetlerini ibrâ-yı âmm-ı sahîh-i şer‘î ile ibrâ vü ıskāt eylediğimde mezbûr el-Hâc Abdullah Efendi dahî kezâli’k-bi’l-cümle husûs-ı mezkûra ve işbu târihe gelince sâir cemî‘-i hukūk-ı şer‘iyyeye müte‘allika âmme-i de‘âvîden hâzır-ı mezbûr el-Hâc Numan Ağa’nın ve müvekkilelerim mezbûrât Fâtıma ve Hadice ve Âişe ve Emine Hatunlar’ın zimmetlerini ibrây-ı âmm-ı sahîh-i şer‘î ile ibrâ vü ıskāt ve tarafeynden her birimiz [15b] ber-minvâl-i muharrer âharın ibrâsını asâleten ve vekâleten kabûl eyledik, deyu mukırr-ı vekîl-i mezbûr İbrahim Efendi’nin sâdır olan bi’l-cümle takrîr-i meşrûhunu mezbûr el-Hâc Abdullah Efendi ile hâzır-ı mezbûrdan her biri vicâhen tahkîk ve şifâhen bi’t-tasdîk etmeğin mâ-vaka‘a bi’t-taleb ketb olundu. Fî Gurre-i Zilhicce sene 1278 Şuhûdü’l-hâl: Kasâb esnâfından Mehmed Ağa b. Hüseyin yine esnâf-ı merkūmeden Eğrikapı ustalarından Mahmud Efendi b. İbrahim, yine esnâf-ı merkūmeden Kumkapılı Ömer Efendi b. el-Hâc İsmail ve esnâf-ı merkūme kethüdâsı el-Hâc Ebubekir Ağa b. Ahmed ve Mehmed Ağa b. Osmanve Osman Efendi b. Mehmed Said ve Köle Mustafa Ağa b. Abdullah ve Mehmed Emin Efendi [b.] el-Hâc Halil ve Hâncı Yusuf Ağa b. Mehmed ve Teba‘adan Ahmed Ağa b. İsmail ve Mehmed Latif Efendi b. Abdullah ve gayruhum