İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 135 Hüküm no: 75 Orijinal metin no: [15b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Behiye Hanım bt. Abdullah ile Esma Hatun bt. Ahmed’in oturakçı dükkânındaki hisselerini Abacı Said Ağa b. Abdullah’a satmaları Galata’da oturakçı mübâya‘ası 6000 guruş. İşbu hüccet fî 18 Ramazan sene [12]82 ve fîi 26 Zilka‘de sene [12]83 târihleriyle müverrah iki kıt‘a hâmiş ile kaydı ihrâc şüd. Fî 19 Zilka‘de sene 1315 Âsitâne-i sa‘âdet âşiyâne ve bilâd-ı selâse mahkemelerine bâ-fermân-ı âlî mine’l-kadîm merbût olan duhâncı gediklerinden mâ‘adâ gerek Dersaâdet ve gerek bilâd-ı selâse-i mezkûrda kâin ber-vech-i mülkiyet tasarruf olunmakda bulunan her nev‘ gediklerin mübâya‘a ve ikrâr-ı mülk ve hibe ve irsen intikāl misillü kâffe-i mu‘âmelâtı ve vukū‘ bulan muhâkemâtı münhasıran ve mahsûsan İstanbul Mahkemesi’nden icrâ ve iktizâ eden i‘lâm ve hüccet-i şer‘iyyeleri ancak mahkeme-i mezkûre tarafından i‘tâ olunmak ve gedikât ashâbının rızâ ve muvâfakatları olmadıkça kadîm mülk kirâları tezyîd olunmamak ve senedât-ı sahîha ve mu‘tebere ile ber-vech-i mülkiyet tasarruf olunmakda bulunan gediklerin müstakır oldukları mahalden ihrâc ve imhâsı zımnında mülk sâhibleri tarafından da‘vâya tasaddî olunur ise hükkâm-ı şer‘-i şerîf cânibinden istimâ‘ olunmaması bâlâsı tuğrâ-yı garrâ-yı hazret-i cihân-bânî ile muvaşşah ve müzeyyen bir kıt‘a nizâmnâme ve bâ-fermân-ı âlî müesses olan nizâm-ı müstahsene iktizâsından bulunduğuna binâen mahrûse-i Galata’da Câmi’-i kebîr mahallesinde sâkine nefsinden asîl ve Esma Hanım bt. Ahmed bin Abdullah tarafından husûs-ı âti’l-beyânda vekîl olduğu zâtını ârifân mukaddemâ Teberdâr el-Hâc İbrahim Efendi b. Mustafa ve mahrûse-i Galata’da vâki‘ oturakçı esnâfının kethüdâsı İdris Ağa b. Veliyyüddin şehâdetleriyle ber-nehc -i şer‘î sâbit olup zâtı ta‘rîf-i şer‘î ilemu‘arrefe olan Behiye Hanım bt. Abdullah meclis-i şer‘-i şerîf-i enverde bâ‘isü’l-kitâb Abacı Said Ağa b. Abdullah mahzarında kethüdâ-yı mezbûr İdris Ağa hâzır olduğu hâlde ikrâr-ı tâm ve takrîr-i kelâm edip mahrûse-i mezkûrede Bât pazarı nâm mahalde Tulumba sûkunda köşe başında vâki‘ bir tarafdan Abdülkadir Ağa dükkânı ve bir tarafdan Celeb Pavli dükkânı ve ba‘zen Âişe Hanım dükkânı ve bir tarafdan tarîk-i hâs ve taraf-ı râbi‘i tarîk-i âm ile mahdûd bâ-irâde-i seniyye Hazine-i Evkāf-ı hümâyûn tarafından nezâret olunan evkāfdan merhûm Efdalzâde Hamidüddin Vakfı müsakkafâtından beher şehr iki para icâreli mezbûr Said Ağa’nın bâ-temessük-i mütevelli bi’l-icâreteyn taht-ı tasarrufunda olan şehriye yüz yirmi parakirâ-yı kadîmelüfevkinde bir bâb odayı müştemil bir bâb oturakçı dükkânı derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûmenin dört sehm i‘tibârıyla bir sehm hisse-i şâyi‘asısene-i sâbıka yani bin iki yüz yetmiş sekiz senesi Cumâdelûlâsının on dördüncü günü târihiyle müverraha İstanbul Mahkemesi’nden verilen işbu bir kıt‘a hüccet-i şer‘iyye mantûkunca mezbûr Said Ağa’nın mülkü olup mâ‘adâ üç sehm hisse-i şâyi‘ası dahi akd-i âti’z-zikrin sudûruna değin yedimde olup işbu sene-i mübâreke Muharremü’l-haramının on ikinci günü târihiyle müverraha mahkeme-i mezkûreden verilen işbu diğer bir kıt‘a hüccet-i şer‘iyye ve kethüdâ-yı mezbûrun takdîm eylediği bir kıt‘a ilmühaber mantûklarınca benimle müvekkilem merkūme Esma Hanım’ın seviyyen yedimizde mülk ve hakkımız olmağla ben müvekkilem mezbûre Esma Hanım ile ma‘an âlât-ı gedik-i mezkûrdan ber-minvâl-i muharrer mâlik olduğumuz üç sehm hisse-i şâyi‘a-i mezkûreyi tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile mezbûr Said Ağa’ya altı bin guruşa bi’l-asâle ve bi’l-vekâle bey‘ ve temlîk ve vech-i lâyıkıyla teslîm eylediğimde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semeni olan meblağ-ı merkūm altı bin guruşu tamâmen bana def‘u teslîm ben dahi yedinden bil’l-asâle ve bi’l vekâle tamamen ahz u kabz edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile kabûlümüzü hâvî bi’l-asâle ve izâfetle bi’l-vekâle ibrâ vü ıskāt eyledik ba‘de’l-yevm âlât-ı gedik-i mezkûrun üç sehm hisse-i şâyi‘a-i merkūmesinde benimle müvekkilem merkūme Esma Hanım’ın aslâ ve kat‘â alâka ve medhalimiz kalmayıp mecmû‘-ı âlât-ı gedik-i mezkûr mezbûr Said Ağa’nın mülk-i mahzı ve hakk-ı sırfı olmuşdur dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 17 Safer sene 1279 Şuhûdü’l-hâl: Muhzır Mustafa Ağa b( ), Muhzır Süleyman Ağa b. ( ) Muhzır el-Hâc Salih Ağa b( ), Muhzır Feyzullah Ağa b. ( ), ve gayruhum