İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 137 Hüküm no: 76 Orijinal metin no: [15b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çörekci Mehmed Beşe b. Ahmed’in mirasçılarından Hayriye’nin yanmış çörekçi dükkânındaki hisselerinin müzâyede yoluyla satılması Eyüp’de muhterik çörekçi mubayâ‘ası Kezâlik medîne-i Hazret-i Ebâ Eyüb el-Ensârî radiye anhü’l-bârî mahallâtından Câmi’-i kebîr mahallesinde sâkin iken bundan mukaddem vefât eden Çörekci Mehmed Beşe b. Ahmed bin Abdullah’ın verâseti sulbî kebîr oğulları Mustafa Efendi ve İbrahim Efendi’ye münhasıra ve ba‘dehû mezbûr Mustafa Efendi dahi vefât edip verâseti sulbî kebîr oğlu ve hasran vârisi Hafız Ali Efendi’ye münhasıra ba‘dehû mezbûr İbrahim Efendi dahi vefât edip verâseti sulbî kebîr oğlu ve hasran vârisi Türbedâr es-Seyyid Hafız İsmail Efendi’ye ba‘dehû mezbûr es-Seyyid Hafız İsmail Efendi dahi vefât edip verâseti zevce-i menkûha-i metrûkesi Fâtıma Hatun bt. İsmail ile sulbîye kebîre kızı Vahide Hatun ve sulbîye murâhıka kızı Hayriye Hanım ve li-ebeveyn ammi oğlu mezbûr Hafız Ali Efendi’ye ba‘de’l-inhisâr tashîh-i mesele-i mîrâsları bi-hükmi’l-münasahati’ş-şer‘iyye kırk sekiz sehimden olup sihâm-ı mezkûreden üç sehmi zevce-i mezbûre Fâtıma Hatun’a ve sekiz sehimden on altı sehmi bintân-ı mezbûretân Vahide Hatun ve Hayriye Hanım’a ve yirmi dokuz sehmi dahi mezbûr Hafız Ali Efendi’ye isâbeti tahakkukundan sonra murâhıka-i mezbûrenin vâlidesi ve tesviye-i umûruna kıbel-i şer‘den bâ-hüccet-i şer‘iyye vasi-i mansûbesi olup zâtı ta‘rîf-i şer‘î ile mu‘arrefe olan mezbûre Fâtıma Hatun kezâlik zâtı ta‘rîf-i şer‘î ile mu‘arrefe olan mezbûre Vahide Hatun ve mezbûr Hafız Ali Efendi’den her biri hâzır oldukları hâlde meclis-i şer‘-i şerîf-i enverde Anadolu Kalemi divân muhzırânından işbu bâ‘isü’l-kitâb el-Hâc Ebubekir Ağa b. İsmail mahzarında ikrâr-ı tâm ve takrîr-i kelâm edip medîne-i mezkûrede İskele-i Kebîre’de vâki‘ma‘lûmu’l-hudûd bir bâb mühterik çörekci dükkânı derûnunda müstahlas beyne’l-esnâf çörekci gediği ta‘bîr olunur bâ-defter-i müfredât âlât-ı lâzime-i ma‘lûme mûrisimiz müteveffâ-yı evvel mezbûr Mehmed Beşe’nin ile’l-vefât yedimizde olup bin iki yüz on beş senesi Cumâdelevveli’nin on üçüncü günü târihiyle müverraha ve ol târihde medîne-i Eyüb mahkemesinde nâibü’ş-şer‘ bulunan Mehmed Sadık Efendi merhûmun imzâ ve hatemini hâviye işbu bir kıt‘a hüccet-i şer‘iyye nâtıka olduğu üzere yedinde müstakillen mülkü olup ba‘de fevtihim ber mûceb-i münâsaha-i mezkûre benimle vasîsi olduğum murâhıka-i mezbûre ve hâzıran-ı mezbûrân Vahide Hatun ve es-Seyyid Hafız Ali Efendi’ye mevrûs olup lakin hâzırân-ı mezbûrân mârru’z-zikr âlât-ı gedikde olan hisse-i şâyi‘alarını âhara bey‘ etmek murâd edip murâhıka-i mezbûrenin hisse-i irsiye-i merkūmesi dahi ma‘an semen-i misliyle lede’l-müzâyede âhara bey‘ olunmak murâhıka-i mezbûrenin hakkında min külli’l-vücûh enfa‘ ve evlâ olduğu bi’l-ihbâr mütehakkık olmağın âlât-ı gedik-i mezkûr münâdî yediyle müddet-i medîde mahallinde ve sâir sûk-ı sultânî ve mecma‘-ı nâs olan mahallerde beyne’t-tâlibin nidâ ve müzâyede olunup ragabât-ı nâs bi’l-külliye münkatı‘a oldukdan sonra on bin guruşa mezbûr el-Hac Ebubekir Ağa üzerinde karâr ve ziyâde ile tâlib-i âharı zuhûr etmeyip ve meblağ-ı mezkûr âlât-ı gedik-i mezkûrun el-yevm semen-i misli idüğü medîne-i mezbûre mahkemesinden verilen işbu bir kıt‘a ilmühaber mûcebince bi’l-ihbâr mütehakkık oldukdan sonra âlât-ı gedik-i mezkûru tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile meblağ-ı mezkûr on bin guruşa mezbûr el-Hac Ebubekir Ağa’ya bey‘ ve temlîk ve vech-i lâyıkıyla teslîm eylediğimizde ol dahi ber-vech-i muharrer iştirâ ve temellük ve tesellüm ve kabz u kabûl ve İstanbul’da Kapan-ı Dakîk kapısı hâricinde kâin merhûm Ahi Çelebi Vakfı’ndan bâ-temessük-i mütevelli bi’l-icâreteyn müstakillen taht-ı tasarrufunda bulunan bilâ gedik bir bâb mağaza arsası üzerinde bu def‘a mâlından kârgîr olmak üzere binâ ve inşâ eylediği bir bâb çörekci fırınına nakline ta‘ahhüd eyledikden sonra semeni olan meblağ-ı mezkûr on bin guruşu bize tamâmen def‘ u teslîm biz dahi yedinden bi’l-asâle ve bi’l-vesâye tamâmen ve kâmilen ahz u kabz ve beynimizde ber mûceb-i münasaha-i mezkûre taksîm etmemizle mebî‘-i mezkûrun tağrîr ve gabnine müte‘allika da‘vâdan ben ancak nefsimden bi’l-asâle ve hâzırân-ı mezbûrân dahi kezâlik bi’l-asâle müşterî-i mezbûr el-Hac Ebubekir Ağa’nın zimmetini ol dahi benimle hazırân-ı mezbûrân ve murâhıka-i mezbûrenin zimmetlerini her birimiz ibrâ-yı sahîh-i şer‘î ile ibrâ vü ıskāt ve her birimiz ber-vech-i muharrer âharın ibrâsını kabûl eyledik, ba‘de’l-yevm âlât-ı gedik-i mezkûrde benimle vasîsi olduğum murâhıka-i mezbûre ve hazırân-ı mezbûrânın aslâ ve kat‘â alâka ve medhallerimiz kalmayıp mezbûr el-Hac Ebubekir Ağa’nın müstakillen mülk-i müşterâsı ve hakk-ı sırfı olmuşdur dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 10 Muharrem sene 1279 Şuhûdü’l-hâl: Muhzır el-Hâc Salih Ağa b. ( ), Eyüp Mahkemesi muhzırbaşısı el-Hâc Mustafa Ağa b. ( ), esnâf-ı merkūmeden Eyüblü Mustafa Ağa b. ( ), Çavuş Rüstem Ağa b. ( ), Yiğitbaşı Halil Efendi b. ( ), Çörekciler kethüdâsı rif‘atlü Ömer Cemaleddin Ağa b. ( ), Muhzır Feyzullah Ağa b. ( ), Muhzır Şakir Ağa b. ( ), Muhzır Ahmet Ağa b ( ), Muhzır Süleyman Ağa b. ( ), ve gayruhum