İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 160 Hüküm no: 91 Orijinal metin no: [19a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Ağa b. İsmail’in çilingir dükkânındaki hisselerini çilingir esnâfından kardeşinin oğlu Salih Ağa b. müteveffâ Ahmed’e satması Çilingir mübâya‘ası Galata’da 30000 guruş. Kaydı ihrâc şüd fî 25 Cumâdelûlâ sene 1293 Kezâlik mahrûse-i Galata’ya muzâfe kasaba-i Tophane’de Mimi mahallesinde sâkin Ali Ağa b. İsmail meclis-i şer‘-i şerîf-i enverde li-ebeveyn er karındaşı oğlu çilingir esnâfından bâ‘isü’l-kitâb Salih Ağa b. el-müteveffâ Ahmed mahzarında esnâf-ı merkūme kethüdâsı Ali Ağa b. el-Hâc Ahmed ve yiğitbaşısı Ömer Ağa b. İsmail ve esnâfından İbrahim Efendi b. Hüseyin ve sandıkçı esnâfı çavuşu Ahmed Ağa b. Abdullah ve esnâfından Ömer Efendi b. Hüseyin ve Mahmud Ağa b. el-Hâc Mustafa hâzır oldukları hâlde ikrâr-ı tâm ve takrîr-i kelâm edip mahrûse-i merkūmede Kemankeş Kara Mustafa Paşa mahallesinde Sandıkçılarbaşı nâm mahalde vâki‘ bir tarafdan mukaddemâ Sofu Mustafa ve el-yevm Sandıkçı Mehmed Ağa’nın sandık dükkânı ve bir tarafdan mukaddemâ el-Hâc Hasan’ın ve el-yevm sandıkçı esnâfı kethüdâsı el-Hâc İsmail Ağa’nın sandıkdükkânı ve bir tarafdan Arab Abdullah Ağa menzili ve taraf-ı râbi‘i tarîk-i âm ile mahdûd merhûm Tercümân Yunus Bey Vakfı müsakkafâtından nısf-ı hisse-i şâyi‘ası li-ebeveyn er karındaşım esnâf-ı merkūmeden Çakıroğlu el-Hâc Abdurrahman Ağa’nın bilâ veled vefâtıyla mahlûlünden cânib-i vakf-ı mezkûrun ve rub‘ hisse-i şâyi‘ası gāibe ani’l-meclis Ümmügülsüm Hanım bt. Mustafa’nın ve diğer rub‘ hisse-i şâyi‘ası kezâlik gāib ani’l-meclis el-Hâc Mehmed Ağa b. Emir Osman’ın taht-ı tasarruflarında olan şehriye üç guruş kirâlı bir bâb çilingir dükkânı derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûmenin nısf hisse-i şâyi‘ası ber-vech-i vakfiyyet hâzır-ı mezbûr İbrahim Efendi ile gāib-i mezbûr el-Hâc Mehmed Ağa’nın bi’l-icâreteyn taht-ı tasarruflarında olup mâ‘adâ âhar nısf hisse-i şâyi‘ası dahi işbu şehr-i hâlin yirmi üçüncü günü târihiyle müverraha İstanbul Mahkemesi’nden verilen bir kıt‘a hüccet-i şer‘iyye ve zikr olunan Kemankeş Kara Mustafa Paşa mahallesi imâm ve muhtârânı ve kethüdâ-yı mezbûr Ali Ağa’nın takdîm eyledikleri bir kıt‘a ilmühaber nâtıklar olduğu üzere karındaşım müteveffâ-yı mezbûr el-Hâc Abdurrahman Ağa’dan mevrûs olarak dört sehm i‘tibârıyla üç sehm hisse-i şâyi‘ası benim bir sehm hisse-i şâyi‘ası zevcesi gāibe ani’l-meclis Hâce Saliha Hanım bt. Osman’ın el-yevm yedimizde mülkümüz olmağla ben nısf hisse-i şâyi‘a-i âlât-ı gedik-i mezkûrdan akd-i âti’z-zikrin sudûruna değin ber-minvâl-i muharrer mâlik olduğum üç sehm hisse-i şâyi‘a-i mezkûremi tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve bi-safkatin vâhidetin ve gāibeti mezbûr Hâce Saliha Hanım’ın izniyle mezbûr Salih Ağa’ya otuz bin guruşa bey‘ ve temlîk ve vech-i lâyıkıyla teslîm eylediğimde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semeni olan meblağ-ı merkūm otuz bin guruşu tamâmen bana def‘ u teslîm ben dahi yedinden bi’t-tamâm ve’l-kemâl ahz u kabz eyledim fîmâ-ba’d nısf hisse-i şâyi‘a-i âlât-ı gedik-i mezkûrun üç sehm hisse-i şâyi‘a-i merkūmesinde benim aslâ ve kat‘â alâka ve medhalim kalmayıp mezbûr Salih Ağa’nın mülk-i müşterâsı olup benim aslâ ve kat‘â alâka ve medhalim kalmamağla mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile kabûlümüzü [hâvî] ibrâ vü ıskāt eyledik dedikde gıbbe. Fî 24 Safer sene 1279 Şuhûdü’l-hâl: Eş-şahidune’s-sabıkūn