İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 161 Hüküm no: 92 Orijinal metin no: [19a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerbethâneci esnâfından Ohannes v. Mikayil ve Foti v. Tanaş’ın şerbethâne hisselerini Ofoğlu Andon v. Anderya’ya satmaları Şerbethâne mübâya‘ası Ortaköy’de 5000 guruş. Kayd-ı ihrâc şüd fî 16 Muharrem sene [1]326 Kezâlik teba‘a-i Devlet-i aliyye’nin Ermeni milletinden ve şerbethâneci esnâfından Ohannes v. Mikayil yine teba‘a-i Devlet-i aliyye’nin Rum milletinden ve esnâf-ı merkūmeden Foti v. Tanaş hâzır olduğu hâlde meclis-i şer‘-i şerîf-i hatîrde teba‘a-i Devlet-i aliyye’nin Rum milletinden olduğu bâ-ilmühaber mütehakkık olan esnâf-ı merkūmeden bâ‘isü’r-rakīm Ofoğlu Andon v. Anderya muvâcehesinde teba‘a-i Devlet-i aliyye’nin Ermeni milletinden ve esnâf-ı merkūme ustabaşılarından Ohannes v. Mıgır hâzır olduğu hâlde ikrâr-ı tâm ve takrîr-i kelâm edip mahrûse-i Galata’ya muzâfe Ortaköy’de Köprübaşında bakkal dükkânı karşısında Kasavet Sokağı ağzı nâm mahalde kâin bir tarafdan Osman Ağa’nın berber dükkânı ve bir tarafdan Berber Hüseyin Ağa’nın berber dükkânı ve bir tarafdan mezbûr Osman Ağa’nın diğer berber dükkânı taraf-ı râbi‘i tarîk-i âm ile mahdûd merhûm Çoban Çavuş Vakfı müsakkafâtından Abdullah Efendi’nin bi’l-icâreteyn taht-ı tasarrufunda olan şehriye elli guruş kirâlı Yuvan ve İlya şerbethânesi demekle arîf bir bâb şerbethâne derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûmenin yüz yirmi sehm i‘tibârıyla altmış sehm hisse-i şâyi‘ası âharların yedlerinde mülkleri olup ve otuz sehm hisse-i şâyi‘ası bin iki yüz altmış yedi senesi Şevvali’l-mükerreminin yirmi altıncı günü târihiyle müverrah ve ol târihde rüsûm-i zecriye muhassılı olan es-Seyyid Yakub Paşa merhûmun mührüyle memhûr işbu bir kıt‘a sûret ve hâlâ Zecriye Nâzırı izzetlü Hüseyin Efendi’nin bir kıt‘a ilmühaberi mantûklarınca benim ve mâ‘adâ âhar otuz sehm hisse-i şâyi‘ası dahi bin iki yüz altmış bir senesi Cumâdelâhiresi selhi târihiyle müverrah ve ol târihde rüsûm-i zecriye muhassılı olan Mehmed Haşim Bey’in ve bin iki yüz altmış sekiz senesi Muharremü’l-haramının yedinci günü târihiyle müverrah merhûm-ı mûmâ-ileyh Yakub Paşa’nın mührüyle memhûr iki kıt‘a sûret ve nâzırı mûmâ-ileyh Hüseyin Efendi’nin bir kıt‘a ilmühaberi mantûklarınca hâzır-ı merkūm Foti’nin yedimizde mülkümüz olmağla ben âlât-ı gedik-i mezkûrdan akd-i âti’z-zikrin sudûruna değin mâlik olduğum otuz sehm hisse-i şâyi‘a-i merkūmeyi bâ-izn-i şürekâ bi-safkatin vâhidetin dört bin guruşa hâzır-ı merkūm Foti dahi kezâlik âlât-ı gedik-i mezkûrdan akd-i âti’z-zikrin sudûruna değin ber-vech-i muharrer mâlik olduğu âhar otuz sehm hisse-i şâyi‘a-i mezkûreyi bâ-izn-i şürekâ bi-safkatin vâhidetin beş bin guruşa ve tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ile merkūm Andon’a bey‘ ve temlîk ve vech-i lâyıkı üzere teslîm eylediğimizde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semenleri olan cem‘an dokuz bin guruşu tamâmen bize def‘ u teslîm biz dahi yedinden bi’t-tamâm ve’l-kemâl ahz u kabz edip mebî‘-i mezkûrların tağrîr ve gabnlarına müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile ibrâ vü ıskāt ve yine her birimiz ber-vech-i muharrer âharın ibrâsını kabûl eyledik, ba‘de’l-yevm âlât-ı gedik-i mezkûrun cem‘an altmış sehm hisse-i şâyi‘a-i mezkûresinde benimle hâzır-ı merkūm Foti’nin aslâ ve kat‘â alâka ve medhalimiz kalmayıp merkūm Andon’un mülk-i müşterâsı ve hakk-ı sırfı olmuşdur dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 9 Safer sene 1279 Şuhûdü’l-hâl: Muhzır Mustafa Ağa b. ( ), Muhzır İsmail Ağa b.( ), Muhzır Şakir Ağa b.( ), Muhzır el-Hâc Salih Ağa b.( ), ve gayruhum