İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 162 Hüküm no: 93 Orijinal metin no: [19b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çadırcı esnâfından Halid Ağa b. Hüseyin’in vefât eden annesi Fâtıma Hatun’dan kendisine miras kalan mülkleri satması ve annesinin borçlarını ödemesi Tarafeyn ibrâ Mahmiye-i İstanbul’da Edirnekapısı dâhilinde Keçeci Pîrî mahallesinde sâkin çadırcı esnâfından Halid Ağa b. Hüseyin meclis-i şer‘-i şerîf-i lâzımü’t-teşrîfde mahmiye-i merkūmede Yeni Çeşme civârında Pirinçci Sinan mahallesinde sâkine zâtı ta‘rîf-i şer‘î ile mu‘arrefe olan işbu bâ‘isetü’l-kitâb Hadice Hanım bt. Abdullah mahzarında ikrâr-ı tâm ve takrîr-i kelâm edip vâlidem olup verâseti benimle li-ebeveyn kız karındaşım işbu hâzıra bi’l-meclis Hanife Seribecâ Hanım’a münhasıra olduğu hâlde bundan akdem vefât eden Şerife Fâtıma Hatun bt. Eyüb bin Abdullah hayâtında bin iki yüz yetmiş dört senesi Muharremü’l-harâmının yirminci günü mûmâ-ileyhâ Hadice Hanım’ın mâlından ve yedinden bâ-hüccet-i şer‘iyye istidâne ve kabz ve umûruna sarfla istihlâk eylediği yedi bin guruş ile meblağ-ı merkūmun üç senelik bâ-devr-i şer‘î nemâsı olan üç bin yüz elli guruş ki ciheteyn-i mezkûreteynden cem‘an deyni olan on bin yüz elli guruş mukābelesinde bâ-temessük-i mütevelli bi’l-icâreteyn müstakilleten mutasarrıfe olduğu mârrü’l-beyân Edirnekapısı hâricinde kâin Sultan Bayezid-i Velî Hân hazretleri evkāf-ı celîleleri müstagallâtından her biri ma‘lûmu’l-hudûd fevkānî iki bâb oda ve tahtânî bir bâb samanlık ve bir bâb ahûr ve bir bâb berber dükkânı mûmâ-ileyh Hadice Hanım’a sûret-i kat‘iyyede bâ-re’y-i mütevelli vefâ ba‘de’l-ferâğ meblağ-ı mecmû‘-ı mezkûr on bin yüz elli guruşun edâsına benimle işbu hâzır bi’l-meclis Muhzır Mustafa Ağa b. Mehmed ve bundan akdemce fevt olan Çadırcı Mehmed Ağa b. Mehmed’den her birimiz tarafeynden bi’l-emr ve’l-kabûl kefâlet-i mutlaka-i sahîha-i şer‘iyye ile başka başka kefîl ve zâminler olup ve her birimiz kefâlet cihetiyle âharın zimmetine lâzım gelen meblağa dahi kezâlik tekeffül eylediğimizden sonra nemâ-i merkūm üç bin yüz elli guruşu vâlidem müteveffât-ı mezbûre Şerife Fâtıma Hatun hayâtında mûmâ-ileyhâ Hadice Hatun’a def‘ u teslîm edip mâ‘adâ asl-ı mâl-ı mezkûr yedi bin guruşu edâ ve ifâ etmeksizin vâlidem mezbûre Şerife Fâtıma Hatun fevt olup akārât-ı mezkûre benimle kız karındaşı hâzıra-i merkūmeye intikāl-ı âdî ile münâsefeten intikāl etmişdi el-hâletü hâzihi asl-ı mâl-ı mezkûr yedi bin guruşu ben mûmâ-ileyhâ Hadice Hanım’a bi-hükmi’l-kefâle ve bâ-i‘lâm-ı şer‘î edâ ve ifâ edip akārât-ı mezkûreyi bâ-re’y-i mütevelli fek ve tahlîs eylediğimden sonra akārât-ı mezkûrede intikālen mutasarrıf olduğum nısf hisse-i şâyi‘alarımı hüsn-ı rızâ ve tayyib-i hâtırım ve ferâğ-ı mu‘teber-i kat‘î ile mûmâ-ileyhâ Hadice Hanım’a on iki bin guruş bedel-i medfû‘ ve makbûz mukābelesinde bâ-re’y-i mütevelli ferâğ ve tefvîz eylediğimde ol dahi tefevvüz ve kabûl ve mütevelli-i [va]kf tarafından dahi rey olunarak hâmiş-i temessükât-ı mezkûreye tahrîr ve temhîr olunmağla ol-vechile mûmâ-ileyhâ Hadice Hanım’ın meblağ-ı mahkûmun bih mezkûr yedi bin guruşdan benim yed ve zimmetimde bir akçe ve bir habbe hakkı ve alacağı kalmayıp benim dahi akārât-ı merkūmenin nısf hisse-i şâyi‘alarında aslâ ve kat‘â hakkım ve alâkam kalmadığından sonra ben mâlımdan mûmâ-ileyhâ Hadice Hanım’a bin beş yüz guruş ifrâz ve teslîm eylediğimde ol dahi ber-vech-i muharrer iftirâz ve kabz ve umûruna sarfla istihlâk etmekle meblağ-ı merkūm bin beş yüz guruşdan mâ‘adâ bi’l-cümle husûs-ı merkūme ve ferâğ-ı mezkûrde şurût-ı müfside müdde‘âma ve işbu târih-i kitâba gelince sâir cemî‘ hukūk-ı şer‘iyyeye müte‘allika âmme-i da‘vâdan tarafeynden her birimiz âharın zimmetini ibrâ-yı sahîh-i şer‘î ile ibrâ vü ıskāt ve her birimiz ber-vech-i muharrer âharın ibrâsını kabûl eyledik, dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 20 Safer sene 1279 Şuhûdü’l-hâl: Muhzır Mustafa Ağa b. ( ), Muhzır Ahmed Ağa b. ( ), Muhzır el-Hâc Yusuf Ağa b. ( ), Muhzır Mehmed Ağa b. ( ), Perdeci Hasan Çavuş b. ( ), ve gayruhum