İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 177 Hüküm no: 104 Orijinal metin no: [21b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yanko v. Yorgi’nin duhân tüccârından Panayot v. Manol’dan aldığı borç karşılığında tütüncü dükkânını rehin vermesi İdâne 30000 guruş Meblâğ-ı mezkûr edâ olunmağla mûcib-i inhâ kaydı terkîn olunmuşdur Fî Rebî‘ülâhir sene [1]285 Teba‘a-i Devlet-i aliyye’nin Rum milletinden ve tütüncü esnâfından Yanko v. Bıyıklı A‘ma Yorgi meclis-i şer‘-i şerîf-i hatîrde teba‘a-i Devlet-i aliyye’nin Rum milletinden ve duhân tüccârından bâ‘isü’r-rakīm Dukaoğlu Panayot v. Manol v. Adam’ın şerîki ve tarafından husûs-ı âti’l-beyânda vekîl olduğu esnâf-ı merkūme yazıcısı Ahmed Efendi b. el-Hâc Mehmed ile teba‘a-i Devlet-i aliyye’nin Rum milletinden ve esnâf-ı merkūmeden Haralambo v. Panayot şehâdetleriyle ber-nehc -i şer‘î sâbit olan teba‘a-i Devlet-i aliyye’nin Rum milletinden ve duhân tüccârından Haralambos v. Mihal muvâcehesinde esnâf-ı merkūme kethüdâsı el-Hâc Mehmed Latif Efendi b. İsmail ile duhân tüccârından mazbûtü’l-esâmî on nefer müslim ve beş nefer hıristiyan lonca ihtiyârları taraflarından mürsel mezbûr Ahmed Efendi hâzır olduğu hâlde ikrâr-ı tâm ve takrîr-i kelâm edip vekîl-i merkūm Haralambos müvekkil-i merkūm Panayot’un mâlından bana otuz bin guruş bi’l-vekâle idâne ve teslîm ben dahi yedinden istidâne ve kabz ve umûruma sarfla istihlâk edip meblağ-ı merkūm otuz bin guruş ile semeni işbu târih-i rakīmden üç sene tamâmına değin müeccel ve mev‘ûduna müvekkil-i merkūm Panayot’un mâlından ve vekîl-i merkūm Haralambos yedinden bi-safkatin vâhidetin iştirâ ve kabz eylediğim üç aded hilâlî koyun sâ‘ati semenlerinden dahi on üç bin beş yüz guruş ki ciheteyn-i merkūmeteynden cem‘an kırk üç bin beş yüz guruş zimmetimde müvekkil-i merkūm Panayot’a vâcibü’l-edâ ve lâzimü’l-kazâ sahîhan deynim olup meblağ-ı mecmû‘-ı merkūm kırk üç bin beş yüz guruş mukābelesinde mahmiye-i İstanbul’da Aksaray Çarşısı nâm mahalde vâki‘ bir tarafdan Halil Ağa’nın manav dükkânı ve bir tarafdan Çörekci İbrahim Ağa’nın menzili ve bir tarafdan Hacı Ohannes’in haffâf dükkânı ve taraf-ı râbi‘i tarîk-i âm ile mahdûd ve bâ-irâde-i seniyye Hazine-i Evkāf-ı hümâyûna mülhak evkāfdan merhûmân Arakiyeci Üveys ve zevcesi Zeyneb Hatun vakıfları müsakkafâtından Ârif Efendi’nin kız karındaşı Âişe Hanım ile babam merkūm Yorgi’nin bi’l-icâreteyn taht-ı tasarruflarında olan Eshâm Muhâsebesi kaleminde el-Hâc Ahmed ismine mukayyed şehriye altı guruş kirâ-yı kadîmelübir bâb tütüncü dükkânı derûnunda mevcûde beyne’l-esnâf gedik ta‘bîr olunur şehr-i hâlin yirmi beşinci günü tarihiyle müverraha İstanbul Mahkemesi’nden verilen bir kıt‘a hüccet-i şer‘iyye ve kethüdâ-yı mûmâ-ileyhin takdîm eylediği bir kıt‘a ilmühaber nâtıklar olduğu üzere yedimde müstakillen mülk ve hakkım olan âlât-ı lâzime-i ma‘lûmeyi rehn vaz‘ ve vekîl-i merkūm Haralambos’a teslîm eylediğimde ol dahi ber-vech-i muharrer irtihân ve tesellüm ve kabz u kabûl eyledikden sonra ben ecel-i mezkûr hulûlünde deyn-i mecmû‘-ı merkūm kırk üç bin beş yüz guruşu edâ ile âlât-ı gedik-i mezkûru rehniyetden fek ve tahlîs edemez isem âlât-ı gedik-i mezkûru rehniyetden ba‘de’l-fek semen-i misliyle âhara bey‘e ve kabz-ı semene ve makbûzundan deyn-i mecmû‘-ı merkūm kırk üç bin beş yüz guruşu müvekkil-i merkūm Panayot’a edâya ve fazla kalır ise fazlasını bana teslîme ve husûs-ı mezkûrun mütevakkıf olduğu umûrun küllisine küllemâ azeltüke fe-ente vekîli mefhûmu üzere azl ve in‘izâlden masûne ve akd-i rehinde meşrûta vekâlet-i devriye-i sahîha-i şer‘iyye ile tarafımdan vekîl-imerkūm Haralambos’u vekîl ve nâib-i menâb nasb ve ta‘yîn eylediğimde ol dahi ber-vech-i muharrer vekâlet-i mezkûreyi kabûl ve merâsimini kemâ-yenbagī edâya ta‘ahhüd ve iltizâm eyledi dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 26 Safer sene 1279 Şuhûdü’l-hâl: Muhzır Mustafa Ağa b. ( ), Muhzır Ahmed Ağa b. ( ), Muhzır el-Hâc Salih Ağa b. ( ), Muhzır Feyzullah Ağa b. ( ), ve gayruhum