İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 178 Hüküm no: 105 Orijinal metin no: [22a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Veliyyüddin Ağa b. Ali’nin mirasçılarına kalan kalaycı dükkânı hisselerinin müzâyede yoluyla satılması Kalaycı mübâya‘ası 12000 guruş Âsitâne-i sa‘âdet âşiyâne ve bilâd-ı selâse mahkemelerine bâ-fermân-ı âlî mine’l-kadîm merbût olan duhâncı gediklerinden mâ‘adâ gerek Dersaâdet ve gerek bilâd-ı selâse-i mezkûrede kâin ber-vech-i mülkiyet tasarruf olunmakda bulunan her nev‘ gediklerin mübâya‘a ve ikrâr-ı mülk ve hibe ve irsen intikāl misillü kâffe-i mu‘âmelâtı ve vukū‘ bulan muhâkemâtı münhasıran ve mahsûsan İstanbul Mahkemesi’nden icrâ ve iktizâ eden i‘lâm ve hüccet-i şer‘iyyeleri ancak mahkeme-i mezkûre tarafından i‘tâ olunmak ve gedikât ashâbının rızâ ve muvâfakatları olmadıkça kadîm mülk kirâları tezyîd olunmamak ve senedât-ı sahîha ve mu‘tebere ile ber-vech-i mülkiyet tasarruf olunmakda bulunan gediklerin müstakır oldukları mahalden ihrâc ve imhâsı zımnında mülk sâhibleri tarafından da‘vâya tasaddî olunur ise hükkâm-ı şer‘-i şerîf cânibinden istimâ‘ olunmaması bâlâsı tuğrâ-yı garrâ-yı hazret-i cihân-bânî ile muvaşşah ve müzeyyen bir kıt‘a nizâmnâme ve bâ-fermân-ı âlî müesses olan nizâm-ı müstahsene iktizâsından bulunduğuna binâen mahmiye-i İstanbul’da Sultan Bayezid-i Veli Hân hazretleri Câmi‘-i şerîfi mahallesinde sâkin iken bundan mukaddem vefât eden kalaycı esnâfından Veliyyüddin Ağa b. Ali bin Abdullah’ın verâseti zevce-i menkûha-i metrûkesi Emine Hatun bt. Hasan ile zevce-i merkūmeden mütevellidler sulbî sagīr oğlu Mehmed Nuri ve sulbiye kebîre kızları Hanife Hanım ve Hadice Hanım’a münhasıra olduğu lede’ş-şer‘i’l-enver zâhir ve mütehakkık oldukdan sonra sagīr-i mezbûrun vâlidesi ve tesviye-i umûruna kıbel-i şer‘den mansûbe vasîsi zâtı ta‘rîf-i şer‘î ile mu‘arrefe olan zevce-i mezbûre Emine Hatun kezâlik zâtları ta‘rîf-i şer‘î ile mu‘arrefeler olan mezbûretân Hanife Hanım ve Hadice Hanım hâzır oldukları hâlde meclis-i şer‘-i şerîf-i enverde Kısmet-i Askerîye mahkemesi muhzırânı rüfekâsından Kara Hasan Ağa b. Halil mahzarında esnâf-ı merkūme kethüdâsı Ali Ağa b. Osman ve esnâfından İsmail Ağa b. Mustafa ve Mustafa Ağa b. Mehmed ve Mehmed Ağa b. Abdullah ve müteveffâ-yı mezbûrun li-ebeveyn er karındaşı İbrahim Ağa hâzır oldukları hâlde bi’l-asâle ve bi’l-vesâye ikrâr-ı tâm ve takrîr-i kelâm edip zikr olunan Sultan Bayezid-i Veli Hân hazretleri Câmi‘i şerîfi havlusunda vâki‘ bir tarafdan İbrahim Efendi’nin kazgancı dükkânı ve bir tarafdan Yani’nin kazgancı meremmetçisi dükkânı ve bir tarafdan câmi‘-i şerîf-i mezkûr memşâları ve taraf-ı râbi‘i tarîk-i âm ile mahdûd merhûm-ı müşârün-ileyh Sultan Bayezid-i Veli Hân hazretlerinin evkāf-ı celîleleri müsakkafâtından on iki sehm i‘tibârıyla beş sehm hisse-i şâyi‘ası âharın ve yedi sehm hisse-i şâyi‘ası zevcim müteveffâ-yı mezbûrun fevtiyle intikālinden sagīr-i mezbûr ile hâzıratân-ı mezbûretânın taht-ı tasarruflarında olan şehriye üç guruş kirâlı bir bâb kalaycı dükkânı derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûme dört sehm i‘tibârıyla bir buçuk sehm hisse-i şâyi‘ası hâzır-ı mezbûr İbrahim Ağa’nın yedinde mülkü olup mâ‘adâ iki buçuk sehm hisse-i şâyi‘ası dahi müteveffâ-yı mezbûr Veliyyüddin Ağa’nın hayâtında ile’l-vefât yedinde olup bin iki yüz yetmiş dört senesi Şa‘bânü’l-mu‘azzamının beşinci günü târihiyle müverraha ve ol târihde mahmiye-i mezkûrede vâki‘ Ahi Çelebi mahkemesi nâibi olan İstanbul pâye-i refî‘asıyla mübâhî Süleyman Efendizâde fazîletlü es-Seyyid Ahmed Reşid Efendi hazretlerinin imzâ ve hatemini hâviye işbu bir kıt‘a mübâya‘a hücceti nâtıka olduğu üzere yedinde mülkü ve ba‘de vefâtihî benimle vasîsi olduğum sagīr-i mezbûr Mehmed Nuri ve hâzıratân-ı mezbûretân Hanife Hanım ve Hatice Hanım’a mevrûs olmağla ben bi’l-asâle ve bi’l-vesâye ve hâzıratân-ı mezbûretân Hanife Hanım ve Hatice Hanım dahi bi’l-asâle iki buçuk sehm hisse-i şâyi‘a-i âlât-ı gedik-i mezkûru şehr-i sâbık Saferi’l-hayrın yirmi dokuzuncu günü târihiyle müverrah hâlâ askerî kassâmı Çarşambavîzâde fazîletlü es-Seyyid Mehmed Said Efendi hazretlerinin hatemleri [ile] mahtûm bir kıt‘a ve kethüdâ-yı hâzır-ı mezbûr Ali Ağa’nın takdîm eylediği bir kıt‘a ki cem‘an iki kıt‘a ilmühaber mantûklarınca münâdî yediyle sûk-ı sultânî ve mecma‘-ı nâs olan mahallerde lede’l-müzâyede ve gıbbe inkıtâ‘ı’r-rağbe el-yevm semen-i misli idüğü hâzırûn-ı mezbûrûn ile sâir cerîdede mazbûtü’l-esâmî müslimînden her biri alâ tarîki’ş-şehâde ihbârlarıyla zâhir ve mütehakkık olan on iki bin beş yüz guruşa tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile hâzır-ı mezbûr İbrahim Ağa’nın izniyle mezbûr Kara Hasan Ağa’ya bey‘ ve temlîk ve vech-i lâyıkı üzere teslîm eylediğimizde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semeni olan meblağ-ı merkūm on iki bin beş yüz guruşu bize def‘ u teslîm biz dahi yedinden bi’l-asâle ve bi’l-vesâye tamâmen ahz u kabz ve müteveffâ-yı mezbûrun defter-i kassâmına idhâl eyledik ba‘de’l-yevm iki buçuk sehm hisse-i âlât-ı gedik-i mezkûrde benimle vasîsi olduğum sagīr-i mezbûr Mehmed Nuri ve hâzıratân-ı mezbûretân Hanife Hanım ve Hatice Hanım’ın aslâ ve kat‘â alâka ve medhalimiz kalmayıp merkūm Kara Hasan Ağa’nın mülk-i müşterâsı ve hakk-ı sırfı olmuşdur dedikde gıbbe’t-tasdîk mezbûr Kara Hasan Ağa meclis-i şer‘-i hatîrde bâ‘isetü’l-kitâb zevce-i mezbûre Emine Hatun mahzarında ikrâr-ı tâm ve takrîr-i kelâm edip ben dahi ber-minvâl-i muharrer ânifen şirâen mâlik olduğum iki buçuk sehm âlât-ı gedik-i mezkûru tarafeynden bi’l-îcâb ve’l-kabûl bâtten ve sahîhan bi-safkatin vâhide hâzır-ı mezbûr İbrahim Ağa’nın izniyle kezâlik on iki bin beş yüz guruş semen-i medfû‘ ve makbûza mezbûre Emine Hanım’a bey‘ ve temlîk ve vech-i lâyıkı üzere teslîm eylediğimde ol dahi ber-vech-i muharrer iştirâ ve temellük ve tesellüm ve kabz u kabûl edip fîmâ-ba’d iki buçuk sehm hisse-i şâyi‘a-i âlât-ı gedik-i mezkûr mezbûre Emine Hanım’ın mülk-i müşterâsı ve hakk-ı sırfı olup benim aslâ ve kat‘â alâka ve medhalim kalmamışdır dedikde gıbbe. Fî Gurre-i Rebî‘ülevvel sene 1279 Şuhûdü’l-hâl: Muhzır Osman Ağa b. ( ), Muhzır Süleyman Ağa b. ( ), Muhzır İsmail Ağa b. ( ), Muhzır Ahmed Ağa b. ( ), Muhzır Feyzullah Ağa b. ( ), ve gayruhum