İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 180 Hüküm no: 106 Orijinal metin no: [22a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bahçıvan esnâfından Nikola’nın bahçe hisselerinin bir kısmını erkek kardeşinin oğlu Yorgi’ye satması Bahçe mübâya‘ası 8000 guruş Kezâlik teba‘a-i Devlet-i aliyye’nin Rum milletinden ve bahçıvan esnâfından Nikola v. Istapan? meclis-i şer‘-i hatîrde li-ebeveyn er karındaşı oğlu teba‘a-i Devlet-i aliyye’nin Rum milletinden olduğu bâ-ilmühaber mütehakkık olan esnâf-ı merkūmeden bâ‘isü’r-rakīm Yorgi v. el-müteveffâ Yanaki muvâcehesinde esnâf-ı merkūme kethüdâsı Mehmed Şakir Bey tarafından mürsel vekîli teba‘a-i Devlet-i aliyye’den esnâf-ı merkūmenin Hasköy kasabası kolu yiğitbaşısı Yorgi v. Yani ve esnâfından Kasımpaşalı Dimitri v. Hıristo ve yine Kasımpaşalı Nikola v. Tarayko hâzır oldukları hâlde ikrâr-ı tâm ve takrîr-i kelâm edip Havâss-ı Refî‘a kazasına muzâfe kasaba-i Hasköy’de vâki‘ bir tarafdan Şalcı Kemal menzili ve bahçesi ve ba‘zen diğer bahçesi ve ba‘zen merkūm Kemal ile Nişlioğlu Haham Yuda arsası ve ba‘zen tahtında tarîk-i hâs ve fevkinde merhûm Mahmud Çavuş Vakfı müsakkafâtından Nasib Kadın menzili ve ba‘zen Eşref Efendi Yahudhânesi ve ba‘zen Angeliko Yahudhânesi ve ba‘zen yine Angeliko Yahudhânesi ve ba‘zen Said Ağa menzili ve bahçesi Kiremidçi Ahmed Çelebi kabristanı ve ba‘zen tarîk-i âm ve bir tarafdan ba‘zen tarîk-i hâs ve ba‘zen Yorgi ve Panayot ve Mihal uhdelerinde olan bostan ve bir tarafdan yine merkūmûn Yorgi ve Panayot ve Mihal bostanı ve ba‘zen tarîk ve ba‘zen SinoriYahudhânesi açıklığı ba‘zen Hayim Yahudi hânesi bahçesi ve ba‘zen Bağdadlı Saret bahçesi ve Yahudhânesi ve ba‘zen merkūm Şalcı Kemal Yahudhânesiyle mahdûd merhûm-ı mûmâ-ileyh Mahmud Çavuş Vakfı müsakkafâtından merkūm Yorgi’nin bâ-temessük-i mütevelli bi’l-icâreteyn taht-ı tasarrufunda olan senevî yüz altmış iki buçuk guruş kirâlı Mahkeme bahçesi demekle arîf bir bâb bahçe derûnunda mevcûd beyne’l-esnâf gedik ta‘bîr olunur âlât-ı lâzime-i ma‘lûme yüz yirmi sehm i‘tibârıyla elli sehm hisse-i şâyi‘ası benim ve diğer elli sehm hisse-i şâyi‘ası merkūm Yorgi’nin babası karındaşım müteveffâ-yı merkūm Yanaki’den mevrûs merkūm Yorgi’nin ve yirmi sehm hisse-i şâyi‘ası dahi diğer karındaşım gāib ani’l-meclis Benob’un yedimizde olup bin iki yüz kırk senesi şehr-i Ramazani’l-mübâreki’nin dokuzuncu ve bin iki yüz kırk bir senesi Muharremü’l-harâmının yirmi üçüncü günleri târihleriyle müverrahalar ve ol târihlerde Havâss-ı Refî‘a kazası kādısı olan Hüseyin Hıfzı Efendi’nin imzâ ve hatemiyle mahtûmeler işbu iki kıt‘a mübâya‘a hücceti ve kethüdâ-yı mûmâ-ileyhin takdîm eylediği bir kıt‘a ilmühaber nâtıklar olduğu üzere yedimizde mülkümüz olmağla ben âlât-ı gedik-i mezkûrdan akd-i âti’z-zikrin sudûruna değin ber-minvâl-i muharrer mâlik olduğum elli sehm hisse-i şâyi‘a-i mezkûrenin yirmi sehm hisse-i şâyi‘asını yedimde bi’l-ibkā mâ‘adâ otuz sehm hisse-i şâyi‘asını tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile bâ izn-i şerîk-i merkūm sekiz bin guruşa merkūm Yorgi’ye bey‘ ve temlîk ve vech-i lâyıkıyla teslîm eylediğimde ol dahi ber-vech-i muharrer iştirâ ve temellük ve tesellüm ve kabz u kabûl [eyledikden] sonra semeni olan meblağ-ı merkūm sekiz bin guruşu tamâmen bana def‘ u teslîm ben dahi yedinden bi’t-tamâm ve’l-kemâl ahz u kabz eyledim ba‘de’l-yevm otuz sehm hisse-i şâyi‘a-i âlât-ı gedik-i [mezkûrde] benim aslâ ve kat‘â alâka ve medhalim kalmayıp âlât-ı gedik-i mezkûrun elli sehm hisse-i şâyi‘ası mukaddemâ irsen ve otuz sehm hisse-i şâyi‘ası dahi hâlâ şirâen [ki cem‘an] seksen sehm hisse-i şâyi‘a-i âlât-ı gedik-i mezkûr merkūm Yorgi’nin mülk-i mahzı ve hakk-ı sırfı olmağla mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile ibrâ vü ıskāt ve her birimiz ber-vech-i muharrer âharın ibrâsını kabûl eyledik, dedikde gıbbe. Fî 10 Rebî‘ülevvel sene 1279 Şuhûdü’l-hâl: Muhzır Osman Ağa b. ( ), Muhzır İsmail Ağa b. ( ), Muhzır Süleyman Ağa b. ( ), Muhzır Feyzullah Ağa b. ( ), ve gayruhum