İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 181 Hüküm no: 107 Orijinal metin no: [22b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal esnâfından Yorgi v. Kostandi ve Kadınko bt. Yorgi’nin bakkal dükkânındaki hisselerini tütüncü esnâfından Yanko v. Kostandi’ye satmaları Rumelihisârı’nda bakkal mübâya‘ası 4000 guruş Kezâlik teba‘a-i Devlet-i aliyye’nin Rum milletinden ve bakkal esnâfından Yorgi v. Kostandi ve kezâlik teba‘a-i Devlet-i aliyye’nin Rum milleti nisvânından şahsı ta‘rîf-i şer‘î ile mu‘arrefe olan Kadınko bt. Yorgi meclis-i şer‘-i hatîrde teba‘a-i Devlet-i aliyye’nin Rum milletinden olduğu bâ-ilmühaber mütehakkık olan tütüncü esnâfından bâ‘isü’r-rakīm Yanko v. Kostandi muvâcehesinde esnâf-ı merkūme pazarbaşısı Ahmed Efendi tarafından mürsel Yiğitbaşı Sava v. Vasil hâzır olduğu hâlde her biri ikrâr-ı tâm ve takrîr-i kelâm edip mahrûse-i Galata’ya muzâfe İstinye nâhiyesine tâbi‘ Rumelihisârı karyesinde kalaycı dükkânı ittisâlinde vâki‘ Şeyh Mahmud Efendi merhûmun bâ-temessük-i mütevelli bi’l-icâreteyn taht-ı tasarrufunda olan şehriye yedi buçuk guruş kirâlı Ayvaz Efendi dükkânı demekle arîf ma‘lûmu’l-hudûd bir bâb bakkal dükkânı derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûmenin nısf hisse-i şâyi‘ası âharın ve âhar nısf hisse-i şâyi‘ası dahi beş sehm i‘tibârıyla iki sehm hisse-i şâyi‘ası kezâlik âharın ve bir sehm hisse-i şâyi‘ası merkūm Yanko’nun yedlerinde mülkleri olup mâ‘adâ iki sehm hisse-i şâyi‘ası dahi akd-i âti’z-zikrin sudûruna değin yedimizde olup sene-i sâbıka yani bin iki yüz yetmiş sekiz senesi Şa’banü’l-mu‘azzamının on dördüncü günü târihiyle müverraha ve ol târihde Dârü’l-hilâfeti’l-aliyye kādısı olan sudûr-ı izâmdan semâhatlü Mehmed Arif Hilmi Efendi hazretlerinin imzâ ve hatmlarını hâviye işbu bir kıt‘a hüccet-i şer‘iyye ve pazarbaşı-yı mûmâ-ileyhin takdîm eylediği bir kıt‘a ilmühaber mantûklarınca yedimizde ale’l-iştirâki’s-seviy mülkümüz olmağla biz âlât-ı gedik-i mezkûrun hisse-i şâyi‘a-i merkūmesinden ber i‘tibâr-ı merkūm mâlik olduğum iki sehm hisse-i şâyi‘a-i mezkûreyi tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile bâ-izn-i şürekâ dört bin guruşa merkūm Yanko’ya bey‘ ve temlîk ve vech-i lâyıkı üzere teslîm eylediğimizde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semeni olan meblağ-ı merkūm dört bin guruşu tamâmen bize def‘ u teslîm biz dahi yedinden bi’t-tamâm ve’l-kemâl ahz u kabz edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile ibrâ vü ıskāt ve her birimiz ber-vech-i muharrer âharın ibrâsını kabûl eyledik, fîmâ-ba’d âlât-ı gedik-i mezkûrun nısf hisse-i şâyi‘a-i merkūmesinin iki sehm hisse-i şâyi‘a-i mezkûresinde bizim aslâ ve kat‘â alâka ve medhalimiz kalmayıp bir sehm hisse-i şâyi‘ası mukaddemâ ve iki sehm hisse-i şâyi‘ası hâlâ şirâen ki cem‘an üç sehm hisse-i şâyi‘ası merkūm Yanko’nun mülk-i mahz ve hakk-ı sırfı olmuşdur dediklerinde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 14 Muharrem sene 1279 Şuhûdü’l-hâl: Muhzır Osman Ağa b. ( ), Muhzır Süleyman Ağa b. ( ), Muhzır Şakir Ağa b. ( ), Muhzır Feyzullah Ağa b. ( ), ve gayruhum