İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 183 Hüküm no: 108 Orijinal metin no: [22b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal esnâfından Yorgi v. Dimitri’nin bakkal dükkânındaki hisselerini tütüncü esnâfından Yanko v. Kostandi’ye satması Mahall-i mezkûrde bakkal mübâya‘ası 2000 guruş Kezâlik teba‘a-i Devlet-i aliyye’nin Rum milletinden ve bakkal esnâfından Yorgi v. Dimitri meclis-i şer‘-i şerîf-i hatîrde teba‘a-i Devlet-i aliyye’nin Rum milletinden olduğu bâ-ilmühaber mütehakkık olan tütüncü esnâfından bâ‘isü’r-rakīm Yanko v. Kostandi muvâcehesinde bakkal esnâfı pazarbaşısı Ahmed Efendi tarafından mürsel vekîli Yiğitbaşı Aleksi v. Kostandi hâzır olduğu hâlde ikrâr-ı tâm ve takrîr-i kelâm edip mahrûse-i Galata’ya muzâfe İstinye nahiyesine tâbi‘ Rumelihisârı karyesinde kalaycı dükkânı ittisâlinde vâki‘ Ayvaz Efendi dükkânı demekle arîf Şeyh Mahmud Efendi merhûmun bâ-temessük-i mütevelli bi’l-icâreteyn taht-ı tasarrufunda bulunan şehriye yedi buçuk guruş kirâlı ma‘lûmu’l-hudûd bir bâb bakkal dükkânı derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûmenin nısf hisse-i şâyi‘ası âharın ve âhar nısf hisse-i şâyi‘ası dahi beş sehm i‘tibârıyla dört sehm hisse-i şâyi‘ası kezâlik âharın yedlerinde mülkleri olup mâ‘adâ bir sehm hisse-i şâyi‘ası dahi akd-i âti’z-zikrin sudûruna değin yedimde olup sene-i sâbıka yani bin iki yüz yetmiş sekiz senesi Şa‘banü’l-mu‘azzamı’nın on altıncı günü târihiyle müverraha ve ol târihde Dârü’l-hilâfeti’l-aliyye kādısı olan sudûr-ı izâmdan semâhatlü Mehmed Arif Hilmi Efendi hazretlerinin imzâ ve hatmlarını hâviye işbu bir kıt‘a mübâya‘a hücceti ve pazarbaşı-yı mûmâ-ileyhin takdîm eylediği bir kıt‘a ilmühaber nâtıklar olduğu üzere yedimde mülk ve hakkım olmağla ben âlât-ı gedik-i mezkûrun âhar nısf hisse-i şâyi‘a-i mezkûresinden ber-minvâl-i muharrer mâlik olduğum bir sehm hisse-i şâyi‘asını tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile bâ-izn-i şürekâ iki bin guruşa merkūm Yanko’ya bey‘ ve temlîk ve vech-i lâyıkı üzere teslîm eylediğimde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semeni olan meblağ-ı merkūm iki bin guruşu tamamen bana def‘ u teslîm ben dahi yedinden bi’t-tamâm ve’l-kemâl ahz u kabz edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile ibrâ vü ıskāt ve her birimiz ber-vech-i muharrer âharın ibrâsını kabûl eyledik, ba‘de’l-yevm âlât-ı gedik-i mezkûrun âhar nısf hisse-i şâyi‘a-i merkūmesinin bir sehm hisse-i şâyi‘a-i mezkûresinde benim aslâ ve kat‘â alâka ve medhalim kalmayıp merkūm Yanko’nun mülk-i müşterâsı ve hakk-ı sırfı olmuşdur dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 13 Muharrem sene 1279 Şuhûdü’l-hâl: Eş-şahidune’s-sabıkūn