İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 191 Hüküm no: 114 Orijinal metin no: [23b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Refi‘a Hanım bt. Hüseyin’in boşandığı eşi Osman Efendi’ye yedi aylık kızları için aylık 80 kuruş nafaka bağlattırması Nafaka-i sagīre 80 guruş Mahmiye-i İstanbul’da Zeyrek kurbünde Şah Hûbân mahallesinde sâkine zâtı ta‘rîf-i şer‘î ile mu‘arrefe olan işbu bâ‘isetü’l-kitâb Refi‘a Hanım bt. Hüseyin meclis-i şer‘-i şerîf-i lâzımü’t-teşrîfde zevc-i mutallıkı Asâkir-i Hâssa-i Şâhâne beşinci şişhâne taburu yüzbaşılarından Osman Efendi’nin (…) ve tarafından husûs-ı âti’l-beyânda vekîl olduğu Hallâc İsmail Ağa b. Ahmed ve Yorgancı İbrahim Ağa b. Ahmed şehâdetleriyle sâbit olan Mehmed Ağa b. Ahmed mahzarında takrîr-i kelâm edip müvekkil-i mezbûr Osman Efendi ile mukaddemâ zevciyyet beynimizde kāime iken müvekkil-i mezbûrun firâşından hâsıla ve benden mütevellide ve bi-hakkı’l-hıdâne hâlâ hacr ve terbiyemde olan sulbiye kızı tahmînen yedi aylık Saniye nâm sagīrenin aslâ mâlı olmayıp nafaka ve kisveye eşedd-i ihtiyâc ile muhtâce olmağla sagīre-i mezbûrenin nafaka ve kisve ve sâir levâzım-ı zarûriye bahâsı için pederi müvekkil-i mezbûr Osman Efendi üzerine kıbel-i şer‘den kadr-ı ma‘rûf meblağ farz ve takdîr buyurulmak bi’l-hıdâne matlûbumdur dedikde gıbbe’t-tasdîk hâkim-i hâsim-i vâlâ-cenâbi’l-muvakki‘ ismuhu fî sadri’l-kitâb tûbâ lehû ve hüsnü me’âb efendi hazretleri [24a] dahi sagīre-i mezbûrenin nafaka ve kisve ve sâir levâzım-ı zarûriyesi için pederi müvekkil-i mezbûr Osman Efendi üzerine işbu târih-i kitâbdan i‘tibâren bi’t-terâzi beher şehr seksener guruş farz ve takdîr buyurup meblağ-ı mefrûz-ı mezkûr beher şehr seksen guruşu sagīre-i mezbûrenin nafaka ve kisve ve sâir levâzım-ı zarûriyesine harc u sarfa ve lede’l-iktizâ istidâneye ve inde’z-zafer pederi müvekkil-i mezbûr üzerine rucû‘a vâlidesi ve hâdinesi mezbûre Refi‘a Hanım’a izin vermeğin mâ-vaka‘a bi’t-taleb ketb olundu. Fî gurre-i Rebî‘ülûlâ sene 1279 Şuhûdü’l-hâl: Muhzır Ahmed Ağa b. ( ), Muhzır Süleyman Ağa b. ( ), Muhzır el-Hâc Yusuf Ağa b. ( ), Muhzır Salih Ağa b. ( ), Muhzır Feyzullah Ağa b. ( ), ve gayruhum