İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 191 Hüküm no: 115 Orijinal metin no: [24a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tüccârdan Dimitri v. Kostandi’den miras kalan mumhânenin kendi mülkleri olduğuna dair hüccet talebi Mumhâne ihbârı Ortaköy’de Âsitâne-i sa‘âdet âşiyâne ve bilâd-ı selâse mahkemelerine bâ-fermân-ı âlî mine’l-kadîm merbût olan duhâncı gediklerinden mâ‘adâ gerek Dersaâdet ve gerek bilâd-ı selâse-i mezkûrede kâin ber-vech-i mülkiyet tasarruf olunmakda bulunan her nev‘ gediklerin mübâya‘a ve ikrâr-ı mülk ve hibe ve irsen intikāl misillü kâffe-i mu‘âmelâtı ve vukū‘ bulan muhâkemâtı münhasıran ve mahsûsan İstanbul Mahkemesi’nden icrâ ve iktizâ eden i‘lâm ve hüccet-i şer‘iyyeleri ancak mahkeme-i mezkûre tarafından i‘tâ olunmak ve gedikât ashâbının rızâ ve muvâfakatları olmadıkça kadîm mülk kirâları tezyîd olunmamak ve senedât-ı sahîha ve mu‘tebere ile ber-vech-i mülkiyet tasarruf olunmakda bulunan gediklerin müstakır oldukları mahalden ihrâc ve imhâsı zımnında mülk sâhibleri tarafından da‘vâya tasaddî olunur ise hükkâm-ı şer‘-i şerîf cânibinden istimâ‘ olunmaması bâlâsı tuğrâ-yı garrâ-yı hazret-i cihân-bânî ile muvaşşah ve müzeyyen bir kıt‘a nizâmnâme ve bâ-fermân-ı âlî müesses olan nizâm-ı müstahsene iktizâsından bulunduğuna binâen mahrûse-i Galata’ya muzâfe Ortaköy’de sâkin iken bundan mukaddem fevt olan tüccârdan Meye ğlu Dimitri v. Kostandi v. Mihal’in verâseti her biri teba‘a-i Devlet-i aliyye’den sulbî kebîr oğulları tüccârdan Kostaki ve Mihalaki ve Gavril ve sulbiye kebîre kızı Loksandire’ye münhasıra ba‘dehû merkūm Kostaki dahi fevt olup verâseti zevce-i metrûkesi teba‘a-i Devlet-i aliyye’nin Rum milleti nisvânından Maryora bt. Tohari ile li-ebeveyn er ve kız karındaşları merkūmûn Mihalaki ve Gavril ve Loksandire’ye münhasıra ba‘dehû merkūm Mihalaki dahi fevt olup verâseti li-ebeveyn karındaşları merkūmân Gavril ve Loksandire’ye münhasıra ve tashîh-i mesele-i mirâsları bi tarîki’l-münâsahati’ş-şer‘iyye iki yüz on sehimden olup sihâm-ı mezkûreden yüz otuz sehmi merkūm Gavril’e ve altmış beş sehmi merkūme Loksandire’ye ve on beş sehmi dahi merkūme Maryora’ya isâbeti lede’ş-şer‘i’l-enver zâhir ve mütehakkık oldukdan sonra bâ‘isetü’r-rakīm nefsinden asîl ve merkūmetân Loksandire ve Maryora taraflarından husûs-ı âti’z-zikrde vekîl-i şer‘îleri merkūm Gavril meclis-i şer‘-i hatîrde mumcu esnâfının kethüdâsı Ömer Ağa b. Süleyman ve yiğitbaşısı Şemseddin Ağa b. diğer Süleyman ve esnâfından Hüseyin Ağa b. Osman hâzır oldukları hâlde bi’l-asâle ve bi’l-vekâle takrîr-i kelâm ve ta‘bîr ani’l-merâm edip sâlifü’z-zikr Ortaköy’de vâki‘ bir tarafdan mîrî selhânesi ve bir tarafdan Yani’nin kasâb dükkânı ve bir tarafdan leb-i deryâ ve taraf-ı râbi‘i tarîk-i âm ile mahdûd İbrahim Paşa kethüdâsı merhûm Mehmed Kethüdâ Vakfı müsakkafâtından altı sehm i‘tibârıyla bir sehm hisse-i şâyi‘ası benim ve beş sehm hisse-i şâyi‘ası dahi müvekkilem merkūme Loksandire’nin bâ-temessükât-ı mütevelli bi’l-icâreteyn taht-ı tasarrufumuzda olan şehriye on guruş kirâ-yı kadîmelü bir bâb mumhâne derûnunda müstakır ve mevcûde beyne’l-esnâf gedik ta‘bîr olunur âlât-ı lâzime-i ma‘lûme babam müteveffâ-yı merkūm Dimitri’nin hayâtında ile’l-fevt yedinde olup bin iki yüz yirmi bir senesi Muharremü’l-harâmının yirmi dokuzuncu günü târihiyle müverraha ve ol târihde mahmiye-i İstanbul’da vâki‘ Mahmudpaşa mahkemesi nâibi Yahyazâde Mehmet Said Efendi merhûmun imzâ ve hatemiyle mahtûme işbu bir kıt‘a hüccet-i şer‘iyye nâtıka olduğu üzere yedinde müstakillen mülk ve hakkı ve ba‘de fevtihî benimle müvekkilelerim merkūmetân Loksandire ve Maryora’ya ber tashîh-i mezkûr mevrûs olup lakin âlât-ı gedik-i mezkûr ber-minvâl-i muharrer benimle müvekkilelerim merkūmetân Loksandire ve Maryora’nın el-yevm mülk-i mevrûsumuz olduğunu nâtık yedimizde sened-i şer‘î olmamağla hakīkat-i hâl husûs-ı mezkûre vukūf-ı tâmları olan kimesnelerden istihbâr ve suâl olunup haberleri tahrîr ve imlâ ile kıbel-i şer‘den âlât-ı gedik-i mezkûr ber-vech-i meşrûh benimle müvekkilelerim merkūmetân Loksandire ve Maryora’nın el-yevm mülk-i mevrûsumuz olduğunu nâtıka yedimize bir kıt‘a hüccet-i şer‘iyye i‘tâ buyurulmak murâdımdır deyu mazmûnu takrîr-i meşrûhuna mutâbık kethüdâ-yı hâzır-ı mezbûr Ömer Ağa ile Rum milleti patrikhânesi taraflarından verilen bir kıt‘a ilmühaberi ibrâz ile bi’l-asâle ve bi’l-vekâle istid‘â etdikde hâl asîl ve vekîl-i merkūm Gavril’in bâlâda bast ve beyân eylediği minvâl üzere olduğunu husûs-ı mezkûre vukūf-ı tâmları olan esnâf-ı hâzirûn-ı merkūmûn ile sâir cerîdede mazbûtü’l-esâmî kimesnelerden her biri alâ tarîki’ş-şehâde haber vermeleriyle vâki‘-i hâl hıfzan li’l-makāl işbu vesîka-i enîka ketb ü imlâ olundu. Fî 5 Rebî‘ülevvel sene 1279 Şuhûdü’l-hâl: Muhzır Osman Ağa b. ( ), Muhzır Süleyman Ağa b. ( ), Muhzır İsmail Ağa b. ( ), Muhzır Feyzullah Ağa b. ( ), ve gayruhum