Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 528 Hüküm no: 636 Orijinal metin no: [111a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yeniçeri Mehmed Beşe b. Abdi’nin alacak iddiasını ispat edemediği Mahmiye-i İstanbul’da Dergâh-ı âlî yeniçerilerinin yirmi dördüncü ağa bölüğüne mahsûs oda yoldaşlarından Mehmed Beşe b. Abdi meclis-i şer‘-i şerîf-i enverde işbu râfi‘ü’l-vesîka Üveys Çelebi b. Osman mahzarında üzerine da‘vâ ve takrîr-i kelâm [edip] mezbûr Üveys Çelebi’ye bundan akdem Vezir-i mükerrem sa‘âdetlü İbrahim Paşa Bağdad muhâfızı iken Bağdad dâhilinde vâki‘ Cağaloğlu demekle ma‘rûf han taht-ı iltizâmımda olmağla kalemiyye olmak üzre paşa-yı müşârün-ileyhe teslîm için elli guruş def‘ ve teslîm ol dahi kabz ve tesellüm eylediğinden sonra meblağ-ı mezbûru paşa-yı müşârün-ileyhe teslîm etmeyip yedinde kalmağın hâlâ taleb ederim suâl olunsun dedikde gıbbe’s-suâl mezbûr Üveys cevâbında kaziyye minvâl-i muharrer üzre olduğunu ikrâr lâkin meblağ-ı mezbûru bi’t-tamâm müşârün-ileyhe teslîm ol dahi kabz ve tesellüm edip yedimde bir akçe bâkī kalmamışdır deyû def‘le mukābele edip ve mezbûr Üveys husûs-ı mezkûrda yemîn ile tasdîk olunur ümenâdan olmağla fi’l-hakīka meblağ-ı mezbûr elli guruşu vech-i meşrûh üzre müşârün-ileyhe [teslîm] edip yedinde bir akçe kalmadığına mezbûr Üveys Çelebi’ye yemîn teklîf olundukda ol dahi hasbe’l-mes’ûl yemîn billâhi te‘âlâ etmeğin mûcebiyle müdde‘î-i mezbûr bî-vech mu‘ârazadan men‘ olunup mâ hüve’l-vâki‘ bi’t-taleb ketb olundu. Fi’l-yevmi’s-sâbi‘ ve’l-ışrîn min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: Hasan Beşe b. Ali, Mehmed b. Üveys, Mustafa b. Ahmed, Mustafa Çelebi b. Abdullah.