İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 193 Hüküm no: 116 Orijinal metin no: [24a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerbethâneci esnâfından Yanko v. Yorgi’nin şerbethânesini Beyoğlu kolu ustabaşısı Andon v. Ohannes’e satması Şerbethâne mübâya‘ası Galata’da Bereketzâde mahallesinde 10000 guruş Âsitâne-i sa‘âdet âşiyâne ve bilâd-ı selâse mahkemelerine bâ-fermân-ı âlî mine’l-kadîm merbût olan duhâncı gediklerinden mâ‘adâ gerek Dersaâdet ve gerek bilâd-ı selâse-i mezkûrede kâin ber-vech-i mülkiyet tasarruf olunmakda bulunan her nev‘ gediklerin mübâya‘a ve ikrâr-ı mülk ve hibe ve irsen intikāl misillü kâffe-i mu‘âmelâtı ve vukū‘ bulan muhâkemâtı münhasıran ve mahsûsan İstanbul Mahkemesi’nden icrâ ve iktizâ eden i‘lâm ve hüccet-i şer‘iyyeleri ancak mahkeme-i mezkûre tarafından i‘tâ olunmak ve gedikât ashâbının rızâ ve muvâfakatları olmadıkça kadîm mülk kirâları tezyîd olunmamak ve senedât-ı sahîha ve mu‘tebere ile ber-vech-i mülkiyet tasarruf olunmakda bulunan gediklerin müstakır oldukları mahalden ihrâc ve imhâsı zımnında mülk sâhibleri tarafından da‘vâya tasaddî olunur ise hükkâm-ı şer‘-i şerîf cânibinden istimâ‘ olunmaması bâlâsı tuğrâ-yı garrâ-yı hazret-i cihân-bânî ile muvaşşah ve müzeyyen bir kıt‘a nizâmnâme ve bâ-fermân-ı âlî müesses olan nizâm-ı müstahsene iktizâsından bulunduğuna binâen teba‘a-i Devlet-i aliyye’nin Rum milletinden ve şerbethâneci esnâfından Yanko v. Yorgi meclis-i şer‘-i şerîf-i hatîrde esnâf-ı merkūmenin Beyoğlu kolu ustabaşısı teba‘a-i Devlet-i aliyye’nin Ermeni milletinden olduğu bâ-ilmühaber mütehakkık olan bâ‘isü’r-rakīm Andon v. Ohannes muvâcehesinde her biri teba‘a-i Devlet-i aliyye’den ve esnâf-ı merkūmenin Samatya kolu ustabaşısı Haci Delot v. Yakut ve mahrûse-i Galata ustabaşısı Civelek Andon v. Yani ve esnâfından Anat v. Yorgi hâzır oldukları hâlde ikrâr-ı tâm ve takrîr-i kelâm edip mahrûse-i Galata’da Bereketzâde mahallesinde françalacı fırını kurbünde vâki‘ bir tarafdan Terzibaşı Levi zevcesi Losika mağazası ve bir tarafdan Haffâf Mayil ve Yanako mağazaları ve bir tarafdan Hasan Bey mağazaları ve taraf-ı râbi‘i tarîk-i âm ile mahdûd merhûm Hayreddin Ağa Vakfı müsakkafâtından li-ebeveyn kız karındaşım Maryora’nın bâ-temessük-i mütevelli bi’l-icâreteyn taht-ı tasarrufunda olan şehriye elli guruş kirâlı Eski İngiliz şerbethânesi demekle ma‘rûf bir bâb şerbethâne derûnunda mevcûde beyne’l-esnâf gedik ta‘bîr olunur akd-i âti’z-zikrin sudûruna değin bin iki yüz altmış senesi Rebi’ulahiri’nin yedinci ve şehr-i mezkûrun on altıncı günleri târihiyle müverrahlar ve ol târihde rüsûm-i zecriye muhassılı olan Mehmed Münib Efendi’nin mührüyle memhûr işbu dört kıt‘a sûret ve hâlâ Zecriye Nâzırı izzetlü Hüseyin Efendi’nin mührüyle memhûr bir kıt‘a ilmühaber mantûklarınca yedimde müstakillen mülk ve hakkım olan âlât-ı lâzime-i ma‘lûmeyi tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı [24b] sahîh-i şer‘î ve safka-i vâhide ile merkūm Andon’a yüz bin guruşa bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semeni olan meblağ-ı merkūm yüz bin guruşu tamamen bana def‘ u teslîm ben dahi yedinden bi’t-tamâm ve’l-kemâl ahz u kabz eyledim fîmâ-ba’d âlât-ı gedik-i mezkûr merkūm Andon’un mülk-i müşterâsı ve hakk-ı sırfı olup benim aslâ ve kat‘â alâka ve medhalim kalmamağla mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile ibrâ vü ıskāt ve her birimiz ber-vech-i muharrer âharın ibrâsını kabûl eyledik, dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi 9 Rebî‘ülevvel sene 1279 Şuhûdü’l-hâl: Muhzır Süleyman Ağa b. ( ), Muhzır Şakir Ağa b. ( ), Muhzır el-Hâc Salih Ağa b. ( ), Muhzır Feyzullah Ağa b. ( ), ve gayruhum