İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 194 Hüküm no: 117 Orijinal metin no: [24b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kebâbcı esnâfından Köstebekoğlu Ahmed Ağa’dan kalan kebâbçı dükkânı hisselerine dair mirasçılarının hüccet talebi Kebâbçı Vezneciler’de ihbârı Kezâlik medîne-i Sinop nevâhisinden Çarşamba nâhiyesine tâbi‘ Ereğli Divânı ahâlisinden olup işbu târih-i vesîkadan dokuz sene mukaddem vefât eden kebâbcı esnâfından Köstebekoğlu Ahmed Ağa b. Mehmed b. Abdullah’ın verâseti Divân-ı mezkûrde sâkinler olan zevce-i menkûha-i metrûkesi Fâtıma Hatun bt. İbrahim ile sulbî kebîr oğlu Mehmed ve sulbî sagīr oğlu Hüseyin ve sulbiye kebîre kızı Şerife Hatun ve sulbiye sagīre kızı Esma’ya münhasıra ba‘dehû sagīr-i mezbûr Hüseyin dahi vefât edip verâseti vâlidesi zevce-i mezbûre Fâtıma Hatun ve li-ebeveyn er ve kız karındaşları mezbûrun Mehmed ve Şerife Hatun ve Esma’ya münhasıra ba‘dehû bint-i sagīre-i mezbûre Esma dahi vefât edip verâseti validesi zevce-i mezbûre Fâtıma Hatun ve li-ebeveyn er ve kız karındaşları mezbûrûn Mehmed ve Şerife Hatun’a münhasıra ve tashîh-i mesele-i mirâsları bi hükmi’l münâsahati’ş-şer‘iyye on bin üç yüz altmış sekiz sehimden olup sihâm-ı merkūmeden iki bin yüz elli yedi sehmi zevce-i mezbûre Fâtıma Hatun’a ve beş bin dört yüz yetmiş dört sehmi dahi mezbûr Mehmed’e ve iki bin yedi yüz otuz yedi sehmi dahi mezbûre Şerife Hatun’a isâbeti tahakkukundan sonra verese-i merkūmûndan nefsinden asîl ve vâlidesi mezbûre Fâtıma Hatun ve li-ebeveyn kız karındaşı mezbûre Şerife Hatun taraflarından yedinde olup sene-i sâbıka yani bin iki yüz yetmiş sekiz senesi Zilhicceti’ş-şerîfesinin on dokuzuncu günü târihiyle müverraha medîne-i merkūme nâibi es-Seyyid Ahmed Rıfat Efendi’nin imzâ ve hatemini hâviye işbu bir kıt‘a vekâlet hücceti nâtıka olduğu üzere husûs-ı âti’l-beyânda vekîl-i şer‘îleri olan bâ‘isü’l-kitâb ibn-i merkūm Mehmed mahmiye-i İstanbul’da meclis-i şer‘-i şerîf-i lâzımü’t-teşrîfde esnâf-ı merkūme kethüdâsı tarafından mürsel vekîli kethüdâ-yı sâbık Ahmed Ağa b. Musa ve esnâf-ı merkūmeden İsmail Ağa b. İbrahim ve Divân-ı mezkûr ahâlisinden Zobuoğlu Hüseyin bin Mehmed ve Mollaoğlu Süleyman bin Süleyman hâzır oldukları hâlde bi’l-asâle ve bi’l-vekâle takrîr-i kelâm ve ta‘bîr ani’l-merâm edip mahmiye-i merkūmede Sultan Bayezid-i Velî Hân aleyhi-rahmetü ve’l-gufrân hazretlerinin Câmi’‘i şerîfi civârında Vezneciler nâm mahalde vâki‘ bir tarafdan Hacı Mustafa Ağa’nın helvâcı dükkânı ve bir tarafdan Hüseyin Efendi’nin ütücü dükkânı ve bir tarafdan menzil bahçesi ve taraf-ı râbi‘i tarîk-i âm ile mahdûd Hekimbaşı Sinan Efendi Vakfı müsakkafatından hâzır-ı mezbûr İsmail Ağa’nın taht-ı tasarrufunda olan şehriye on guruş mülk kirâlı bir bâb vakıf kebâbçı dükkânı derûnunda mevcûde beyne’l-esnâf gedik ta‘bîr olunur bâ-defter-i müfredât âlât-ı lâzime-i ma‘lûmenin yüz yirmi sehm i‘tibârıyla altmış sehm hisse-i şâyi‘ası ber-vech-i vakfiyet âharların mâ‘adâ altmış sehm hisse-i şâyi‘ası dahi pederimiz ve mevrûsumuz müteveffâ-yı evvel-i mezbûrun hayâtında ile’l-vefât yedimde olup bin iki yüz kırk beş senesi Saferi’l-hayrının on dokuzuncu günü târihiyle müverraha ve ol târihde Dârü’l-hilâfeti’l-aliyye kādısı olan Yusuf Paşazâde Mîr Mehmed Nazif Efendi merhûmun imzâ ve hateminihâviye işbu bir kıt‘a mübâya‘a hücceti ve kethüdâ-yı mezbûrun takdîm eylediği bir kıt‘a memhûr ilmühaber mantûklarınca şirâen yedinde mülkü ve ba‘de vefâtihî ber mûceb-i münasaha-i merkūme benimle müvekkilelerim vâlidem ve kız karındaşım mezbûretâna mevrûs olup lakin yedimizde intikāli hâvî sened-i şer‘î olmamağla hakīkat-i hâl husûs-ı mezkûre vukūf-ı tâmları olan kimesnelerden lede’l-istihbâr sâlifü’l-beyân altmış sehm hisse-i şâyi‘a-i âlât-ı gedik-i mezkûr vech-i muharrer üzere pederimiz ve mevrûsumuz müteveffâ-yı evvel-i merkūmdan irsen mülkümüz olduğunu nâtık kıbel-i şer‘den intikāli hâvî yedimize bir kıt‘a hüccet-i şer‘iyye i‘tâ olunmak bi’l-asâle ve bi’l-vekâle murâdımdır dedikde hâl minvâl-i meşrûh üzere olup ve müteveffâ-yı mezbûr Ahmed Ağa’nın verâseti ber mûceb-i münasaha-i merkūme mukırr-ı asîl ve vekîl mezbûr Mehmed ile vâlidesi ve kız karındaşı merkūmetâna münhasıra olduğu husûs-ı mezkûre vukūf-ı tâmları olan hâzirûn-ı merkūmûn alâ tarîki’ş-şehâde haber vermeleriyle vâki‘-i hâl hıfzan li’l-makāl işbu vesîka-i enîka ketb ü imlâ olundu. Fî 6 Rebî‘ülevvel sene 1279 Şuhûdü’l-hâl: Muhzır Mustafa Ağa b. ( ), Muhzır Mehmed Ağa b. ( ), Muhzır el-Hâc Salih Ağa b. ( ), Muhzır Feyzullah Ağa b. ( ), ve gayruhum