İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 196 Hüküm no: 118 Orijinal metin no: [24b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hanım bt. Mehmed Tahir’in boşandığı eşi İbrahim İffet Efendi’ye üç yaşındaki kızları için aylık 150 kuruş nafaka bağlattırması Nafaka-i sagīre 50 guruş İstanbul’da Aksaray kurbünde Kızıl Minare mahallesinde sâkine zâtı ta‘rîf-i şer‘î ile mu‘arrefe olan işbu bâ‘isetü’l-kitâb Âişe Hanım bt. Mehmed Tahir meclis-i şer‘-i şerîf-i lâzımü’t-teşrîfde zevc-i sâbıkı olup Havâss-ı Refî‘a kazasına muzâfe kasaba-i Hasköy’de Südlüce’de Mahmud Ağa mahallesinde sâkin Tersâne-i âmirede cerîde odası ketebesinden İbrahim İffet Efendi b. el-Hâc Hasan mahzarında ikrâr-ı tâm ve takrîr-i kelâm edip mûmâ-ileyh İbrahim İffet Efendi ile mukaddemâ zevciyet beynimizde kāime iken mûmâ-ileyhin firâşından hâsıla ve benden mütevellide bi-hakkı’l-hıdâne hacr ve terbiyemde olan sulbiye kızı tahmînen üç yaşında Şefika nâm sagīrenin aslâ mâlı olmayıp nafaka ve kisveye eşedd-i ihtiyâç ile muhtâce olmağla sagīre-i mezbûrenin nafaka ve kisve ve sâir levâzım-ı zarûriyesi için pederi mûmâ-ileyh İbrahim İffet Efendi üzerine kıbel-i şer‘den kadr-ı ma‘rûf meblağ farz ve takdîr buyurulmak bi’l-hıdâne matlûbumdur dedikde gıbbe’t-tasdîki’ş-şer‘î hâkim-i hâsim-i vâlâ-cenâbi’l-muvakki‘ ismuhû fî sadri’l-kitâb tûbâ lehû ve hüsnü me‘âb efendi hazretleri dahi sagīre-i mezbûrenin nafaka ve kisve ve sâir levâzım-ı zarûriyesi için pederi mûmâ-ileyh İbrahim İffet Efendi üzerine işbu târih-i kitâbdan i‘tibâren bi’t-terâzi beher şehr yüz ellişer guruş nafaka farz ve takdîr buyurub meblağ-ı mefrûz-ı mezkûr beher şehr yüz ellişer guruşu sagīre-i mezbûrenin nafaka ve kisve ve sâir levâzım-ı zarûriyesine harc u sarfa ve lede’l-iktizâ istidâneye ve inde’z-zafer pederi mûmâ-ileyh İbrahim İffet Efendi üzerine rucû‘a vâlidesi ve hâdinesi mezbûre Âişe Hanım’a izin vermeğin mâ-vaka‘a bi’t-taleb ketb olundu. Fi 2 Rebî‘ülâhir sene 1279 Şuhûdü’l-hâl: Muhzır Mustafa Ağa b. ( ), Muhzır Yusuf Ağa b. ( ), Muhzır Ahmed Ağa b. ( ), Muhzır Salih Ağa b. ( ), ve gayruhum