İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 199 Hüküm no: 120 Orijinal metin no: [25a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefât eden sepet sandıkçı esnâfından Hacı Hüseyin Ağa b. Abdullah’a ait sandıkçı dükkânının mirasçıları tarafından Mehmed Ali Ağa b. Veliyyüddin’e satılması Sarachâne başında sandıkçı mübâya‘ası Kezâlik mahmiye-i İstanbul’da Cumartesi Pazarı civârında Hoca Üveys mahallesinde sâkin iken bundan mukaddem fevt olan sepet sandıkçı esnâfından el-Hâc Hüseyin Ağa b. Abdullah’ın verâseti sulbî kebîr oğulları Bâb-ı Zabtiyede istintâk odası ketebesinden Mehmed Tevfik Efendi ve esnâf-ı merkūmeden Mehmed Emin Efendi ve sulbiye kebîre kızı Emine Behiye Hanım’a münhasıra olduğu lede’ş-şer‘i’l-enver zâhir ve mütehakkık oldukdan sonra mezbûrân Mehmed Tevfik Efendi ve Mehmed Emin Efendi ve zâtı ta‘rîf-i şer‘î ile mu‘arrefe olan mezbûre Emine Behiye Hanım meclis-i şer‘-i şerîf-i enverde esnâf-ı merkūmeden bâ‘isü’l-kitâb Mehmed Ali Ağa b. Veliyyüddin mahzarında sarrâc esnâfının kethüdâsı el-Hâc İbrahim Ağa bin Mustafa tarafından mürsel vekîli esnâf-ı merkūme yiğitbaşısı es-Seyyid Numan Ağa b. es-Seyyid Mehmed Selim hâzır olduğu hâlde her biri ikrâr-ı tâm ve takrîr-i kelâm edip mahmiye-i mezkûrede Sarachâne derûnunda Tatlıkuyu karşısında birinci odada kâin bir tarafdan mukaddemâ Sarrâc Derviş Mehmed ve el-yevm Sarrâc Heybeci el-Hâc Ahmed Ağa’nın sarrâc dükkânı ve bir tarafdan mezbûr el-Hâc Ahmed Ağa’nın arsası ve bir tarafdan sandıkçı dükkânı ve taraf-ı râbi‘i tarîk-i âm ile mahdûd Ayasofya-i Kebîr Câmi‘-i şerîfi evkāfı müsakkafâtından mezbûr Mehmed Ali Ağa’nın bi’l-icâreteyn taht-ı tasarrufunda olan şehriye altmış para kirâlı bir bâb sandıkçı dükkânı derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûme yedimizde olup bin iki yüz elli senesi Saferi’l-hayrının on dördüncü günü târihiyle müverrah ve ol târihde askerî kassâmı olan sudûr-ı izâmdan Kütahyavîzâde Mehmed Arif Efendi merhûmun hatemiyle mahtûm işbu bir kıt‘a i‘lâm-ı şer‘î ve kethüdâ-yı mûmâ-ileyhin takdîm eylediği bir kıt‘a ilmühaber mantûklarınca pederimiz müteveffâ-yı mezbûr el-Hâc Hüseyin Ağa’nın hayâtında ile’l-vefât yedinde müstakillen mülkü ve ba‘de vefâtihî bize mevrûs olmağla biz akd-i âti’z-zikrin sudûruna değin ber-minvâl-i muharrer irsen mâlik olduğumuz âlât-ı gedik-i mezkûru tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile merkūm Mehmed Ali Ağa’ya dört bin üç yüz otuz altı guruşa bey‘ ve temlîk ve teslîm eylediğimizde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semeni olan meblağ-ı merkūm dört bin üç yüz otuz altı guruşu tamâmen bize def‘ u teslîm biz dahi yedinden bi’t-tamâm ve’l-kemâl ahz u kabz edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile ibrâ vü ıskāt ve her birimiz ber-minvâl-i muharrer âharın ibrâsını kabûl eyledik, ba‘de’l-yevm âlât-ı gedik-i mezkûrde bizim aslâ ve kat‘â alâka ve medhalimiz kalmayıp mezbûr Mehmed Ali Ağa’nın mülk-i müşterâsı ve hakk-ı sırfı olmuşdur dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 10 Rebî‘ülâhir sene 1279 Şuhûdü’l-hâl: Muhzır Süleyman Ağa b. ( ), Muhzır Osman Ağa b. ( ), Muhzır Feyzullah Ağa b. ( ), Muhzır el-Hâc Salih Ağa b. ( ), Muhzır el-Hâc Yusuf Ağa b. ( ), ve gayruhum