İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 201 Hüküm no: 122 Orijinal metin no: [25b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Marya bt. Hacı İlya’nın şerbethâne hisselerini şerbethâneci esnâfından İftad v. Yosef’e satması Şerbethâne mübâya‘ası 4000 guruş Kezâlik mahmiye-i İstanbul hısnı ebvâbından Langa Yenikapısı dâhilinde Bahçeiçi nâm mahalde sâkin teba‘a-i Devlet-i aliyye’nin Rum milleti nisvânından şahsı ta‘rîf-i şer‘î ile mu‘arrefe olan Marya bt. Hacı İlya meclis-i şer‘-i hatîrde teba‘a-i Devlet-i aliyye’nin Rum milletinden olduğu ba ilmühaber mütehakkık olan şerbethâneci esnâfından bâ‘isü’r-rakīm Çiçekioğlu İftad v. Yosef muvâcehesinde her biri teba‘a-i Devlet-i aliyye’nin Rum milletinden ve esnâf-ı merkūmenin Beyoğlu kolu ustabaşısı Dülbendcioğlu Andon v. Ohannes ve Tarabya karyesi ustabaşısı Vasil v. Nikola ve Çavuş Bodos v. Kostandi ve merkūme Marya’nın zevci Manifaturacı Kilimandos v. Sarafim hâzır oldukları hâlde ikrâr-ı tâm ve takrîr-i kelâm edip mahmiye-i mezkûre hısnı ebvâbından Kapan-ı dakîk kapısı hâricinde vâki‘ bir tarafdan bakkal dükkânı ve iki tarafdan cidâr-ı hısn ve taraf-ı râbi‘i tarîk-i âm ile mahdûd şehriye altmış guruş kirâlı Yeni Dünya şerbethânesi demekle arîf bir bâb vakıf şerbethâne derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûme yüz yirmi sehm i‘tibârıyla yüz on beş buçuk sehm hisse-i şâyi‘ası âharların yedlerinde mülkleri olup mâ‘adâ dört buçuk sehm hisse-i şâyi‘ası dahi akd-i âti’z-zikrin sudûruna değin yedimde olup bin iki yüz yetmiş altı senesi Saferi’l-hayrının üçüncü günü târihiyle müverrah ve ol târihde rüsûm-i zecriye muhassılı olan Nazif Beyefendi’nin mührüyle memhûr işbu bir kıt‘a sûret ve hâlâ Zecriye Nâzırı izzetlü Hüseyin Efendi’nin bir kıt‘a ilmühaberi mantûklarınca yedimde mülk ve hakkım olmağla ben âlât-ı gedik-i mezkûrdan ber-minvâl-i muharrer mâlike olduğum dört buçuk sehm hisse-i şâyi‘a-i mezkûreyi tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile bâ-izn-i şürekâ dört bin guruşa merkūm İftad’a bey‘ ve temlîk ve vech-i lâyıkıyla teslîm eylediğimde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semeni olan meblağ-ı merkūm dört bin guruşu tamâmen bana def‘ u teslîm ben dahi yedinden bi’t-tamâm ve’l-kemâl ahz u kabz edip mebî‘-i mezkûrun tağrîr ve gabnine müte‘allika da‘vâdan tarafeyndenher birimiz âharın zimmetini ibrâ-yı sahîh-i şer‘î ile ibrâ vü ıskāt ve her birimiz ber-vech-i muharrer âharın ibrâsını kabûl eyledik, ba‘de’l-yevm âlât-ı gedik-i mezkûrun dört buçuk sehm hisse-i şâyi‘a-i mezkûresinde benim aslâ ve kat‘â alâka ve medhalim kalmayıp merkūm İftad’ın mülk-i müşterâsı ve hakk-ı sırfı olmuşdur dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 21 Muharrem sene 1279 Şuhûdü’l-hâl: Muhzır Osman Ağa b. ( ), Muhzır İsmail Ağa b. ( ), Muhzır Süleyman Ağa b. ( ), Muhzır Feyzullah Ağa b. ( ), ve gayruhum