İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 202 Hüküm no: 123 Orijinal metin no: [25b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Akabi bt. Agop’a ait şerbethâne hisselerinin mirasçıları tarafından Mardiros v. Vartan’a satılması Şerbethâne mübâya‘ası 1200 guruş Kezâlik mahmiye-i İstanbul hısnı ebvâbından Kumkapı dâhilinde Çadırcı Ahmed Çelebi mahallesinde sâkine iken bundan mukaddem fevt olan teba‘a-i Devlet-i aliyye’nin Ermeni milleti nisvânından Akabi bt. Agop v. Adam’ın verâseti her biri teba‘a-i Devlet-i aliyye’den sadrî oğlu olup kendüden mukaddem fevt olan Vartan v. Makar’ın sulbî kebîr oğlu şerbethâneci esnâfından Sitrak ve sulbîye kebîre kızı Arus’a münhasıra olduğu lede’ş-şer‘i’l-enver zâhir ve mütehakkık oldukdan sonra merkūm Sitrak ve şahsı ta‘rîf-i şer‘î ile mu‘arrefe olan merkūme Arus meclis-i şer‘-i şerîf-i hatîrde mahmiye-i mezkûrede Fincancılariçi nâm mahalde vâki‘ Hacı Nazif Ağa Hanı odabaşısı olup teba‘a-i Devlet-i aliyye’nin Ermeni milletinden olduğu ba ilmühaber mütehakkık olan bâ‘isü’r-rakīm Mardiros v. Vartan muvâcehesinde her biri teba‘a-i Devlet-i aliyye’den ve esnâf-ı merkūmenin Beyoğlu kolu ustabaşısı Dülbendcioğlu Andon v. Ohannes ve çavuşu Bodos v. Kostandi ve Çorabcı Hânı şerbethânesi ustası Avraham v. Pretamos hâzır oldukları hâlde ikrâr-ı tâm ve takrîr-i kelâm edip zikr olunan Çadırcı Ahmed Çelebi mahallesinde Caddeyol’da vâki‘ bir tarafdan çeşme arsası ve ba‘zen Tuhafçı Kosti v. Yamandi menzili ve bir tarafdan kale duvarı ve bir tarafdan Dökmeci Kirkor v. Oseb menzili ve ba‘zen Agop v. Manyas menzili ve ba‘zen Serope v. Serkiz menzili ve ba‘zen Ohannes v. Nişan menzili ve taraf-ı râbi‘i tarîk-i âm ile mahdûd merhûmân Baba Mahmud Efendi damadı Mehmed Efendi ve dârü’l-hadîs vakıfları müsakkafâtından Divân-ı hümâyûn kalemi hulefâsından es-Seyyid Ahmed Ratib Efendi b. es-Seyyid el-Hâc Hüseyin ile merkūm Mardiros’un bâ-temessük-i mütevelli bi’l-icâreteyn taht-ı tasarruflarında olan şehriye altmış guruş kirâlı Yeni şerbethâne demekle arîf bir bâb şerbethâne derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûmenin yüz yirmi sehm i‘tibârıyla beş buçuk sehm bir pul ve bir buçuk rub‘ pul hisse-i şâyi‘ası bin iki yüz altmış beş senesi Şa‘bânü’l-mu‘azzamının yirmi yedinci günü tarihiyle müverrah ve ol târihde rüsûm-i zecriye muhassılı olan es-Seyyid Yakub Paşa merhûmun mührüyle memhûr işbu bir kıt‘a sûret ve hâlâ Zecriye Nâzırı izzetlü Hüseyin Efendi’nin bir kıt‘a ilmühaberi mantûklarınca mûrisemiz müteveffât-ı merkūme Akabi’nin hayâtında ile’l-fevt yedinde mülkü ve ba‘de fevtihâ beş buçuk sehm bir pul ve bir buçuk rub‘ pul hisse-i şâyi‘a-i âlât-ı gedik-i mezkûr bize mevrûs olmağla biz âlât-ı gedik-i mezkûrdan akd-i âti’z-zikrin sudûruna değin ber-minvâl-i muharrer mâlik olduğumuz beş buçuk sehm bir pul ve bir buçuk rub‘ pul hisse-i şâyi‘a-i mezkûreyi tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile bâ-izn-i şürekâ bin iki yüz guruşa merkūm Mardiros’a bey‘ ve temlîk ve vech-i lâyıkıyla teslîm eylediğimde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semeni olan meblağ-ı merkūm bin iki yüz guruşu tamâmen bize def‘ u teslîm biz dahi yedinden bi’t-tamâm ve’l-kemâl ahz u kabz edip mebî‘-i mezkûrun tağrîr ve gabnine müte‘allika da‘vâdan biz merkūm Mardiros’un zimmetini ibrâ-yı sahîh-i şer‘î ile ibrâ vü ıskāt eylediğimizde ol dahi kezâlik mebî‘-i mezkûrun tağrîr ve gabnine müte‘allika da‘vâdan bizim zimmetimizi ibrâ-yı sahîh-i şer‘î ile ibrâ vü ıskāt ve tarafeynden her birimiz ber-minvâl-i muharrer âharın ibrâsını kabûl eyledik, ba‘de’l-yevm âlât-ı gedik-i mezkûrun beş buçuk sehm bir pul ve bir buçuk rub‘ pul hisse-i şâyi‘a-i mezkûresinde bizim aslâ ve kat‘â alâka ve medhalimiz kalmayıp merkūm Mardiros’un mülk-i müşterâsı ve hakk-ı sırfı olmuşdur dediklerinde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 20 Muharrem sene 1279 Şuhûdü’l-hâl: Muhzır Osman Ağa b. ( ), Muhzır el-Hâc Yusuf Ağa b. ( ), Muhzır Feyzullah Ağa b. ( ), Muhzır Şaban Ağa b. ( ), Muhzır el-Hâc Salih Ağa b. ( ), ve gayruhum