İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 204 Hüküm no: 124 Orijinal metin no: [25b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerbethâneci esnâfından Sitrak v. Vartan ve kız kardeşi Arus’un sahip oldukları şerbethâne hisselerini Mardiros v. Vartan’a satmaları Şerbethâne mübâya‘ası Kezâlik mahmiye-i İstanbul hısnı ebvâbından Kumkapı dâhilinde Çadırcı Ahmed Çelebi mahallesinde sâkin teba‘a-i Devlet-i aliyye’nin Ermeni milletinden ve şerbethâneci esnâfından Sitrak v. Vartan li-ebeveyn kız karındaşı teba‘a-i Devlet-i aliyye’nin Ermeni milleti nisvânından şahsı ta‘rîf-i şer‘î ile mu‘arrefe olan Arus hâzır olduğu hâlde meclis-i şer‘-i şerîf-i hatîrde mahmiye-i mezkûrede Fincancılariçi nâm mahalde vâki‘ Hacı Nazif Ağa Hanı odabaşısı teba‘a-i Devlet-i aliyye’nin Ermeni milletinden olduğu ba ilmühaber mütehakkık olan bâ‘isü’r-rakīm Mardiros v. Vartan muvâcehesinde her biri teba‘a-i Devlet-i aliyye’den ve esnâf-ı merkūmenin Beyoğlu kolu ustabaşısı Dülbendcioğlu Andon v. Ohannes ve çavuşu Bodos v. Kostandi ve Çorabcı Hânı şerbethânesi ustası Avraham v. Pretamos hâzır oldukları hâlde ikrâr-ı tâm ve takrîr-i kelâm edip zikr olunan Çadırcı Ahmed Çelebi mahallesinde Caddeyol’da vâki‘ bir tarafdan çeşme arsası ve ba‘zen Tuhafçı Kosti v. Yamandi menzili ve bir tarafdan kale duvarı ve bir tarafdan Dökmeci Kirkor v. Oseb menzili ve ba‘zen Agop v. Minas menzili ve ba‘zen Serope v. Serkiz menzili ve ba‘zen Ohannes v. Nişan menzili ve taraf-ı râbi‘i tarîk-i âm ile mahdûd merhûmân Baba Mahmud Efendi damadı Mehmed Efendi ve dârü’l-hadîs vakıfları müsakkafâtından Divân-ı hümâyûn kalemi hulefâsından es-Seyyid Ahmed Ratib Efendi b. es-Seyyid el-Hâc Hüseyin ile merkūm Mardiros’un bâ-temessük-i mütevelli bi’l-icâreteyn taht-ı tasarruflarında olan şehriye altmış guruş kirâlı Yeni şerbethâne demekle arîf bir bâb şerbethâne derûnunda mevcûde beyne’l-esnâf gedik ta‘bîr [26a] olunur âlât-ı lâzime-i ma‘lûmenin yüz yirmi sehm i‘tibârıyla on altı buçuk sehm hisse-i şâyi‘ası yedimde olup bin iki yüz altmış beş senesi Şa‘bani’l-mu‘azzamının yirmi yedinci günü tarihiyle müverrah ve ol târihde rüsûm-i zecriye muhassılı olan es-Seyyid Yakub Paşa merhûmun mührüyle memhûr bir kıt‘a sûret mantûkunca benim ve sekiz sehm bir pul hisse-i şâyi‘ası dahi târih-i merkūm ile müverrah ve muhassıl-ı mûmâ-ileyhin mührüyle memhûr işbu diğer bir kıt‘a sûret mantûkunca kız karındaşım hâzıra-i merkūme Arus’un akd-i âti’z-zikrin sudûruna değin yedimizde mülk ve hakkımız olmağla ben hâzıra-i merkūme Arus ile ma‘an âlât-ı gedik-i mezkûrde ber-minvâl-i muharrer mâlik olduğumuz cem‘an yirmi dört buçuk sehm bir pul hisse-i şâyi‘a-i mezkûreyi bâ-ilmühaber-i Zecriye tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile bâ-izn-i şürekâ dört bin sekiz yüz guruşa merkūm Mardiros’a bey‘ ve temlîk ve vech-i lâyıkıyla teslîm eylediğimizde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semeni olan meblağ-ı merkūm dört bin sekiz yüz guruşu tamâmen bize def‘ u teslîm biz dahi yedinden bi’t-tamâm ve’l-kemâl ahz u kabz ve bi-kadri’l-hısas beynimizde iktisâm edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile ibrâ vü ıskāt ve her birimiz ber-minvâl âharın ibrâsını kabûl eyledik, ba‘de’l-yevm âlât-ı gedik-i mezkûrun cem‘an yirmi dört buçuk sehm bir pul hisse-i şâyi‘a-i mezkûresinde benimle hâzıra-i mezbûre Arus’un aslâ ve kat‘â alâka ve medhalimiz kalmayıp merkūm Mardiros’un mülk-i müşterâsı ve hakk-ı sırfı olmuşdur dedikde gıbbe. Fî 23 Muharrem sene 1279 Şuhûdü’l-hâl: Eş-şahidune’s-sabıkūn