İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 205 Hüküm no: 125 Orijinal metin no: [26a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefât eden Armavani bt. Mardiros’a ait şerbethâne hisselerinin mirasçıları tarafından Hacı Nazif Ağa Hânı odabaşısı Mardiros v. Vartan’a satılması Şerbethâne mübâya‘ası 5000 guruş Kezâlik mahmiye-i İstanbul hısnı ebvâbından Kumkapı dâhilinde Çadırcı Ahmed Çelebi mahallesinde sâkine iken bundan mukaddem fevt olan teba‘a-i Devlet-i aliyye’nin Ermeni milletinden Armavani bt. Mardiros v. Adam’ın verâseti her biri teba‘a-i Devlet-i aliyye’den zevc-i metrûku berber esnâfından Kirkor v. Nikofor ile sadrî kebîr oğlu şerbethâneci esnâfından Sitrak ve sadriye kebîre kızı Arus b. el-müteveffâ Vartan’a münhasıra olduğu lede’ş-şer‘i’l-enver zâhir ve mütehakkık oldukdan sonra merkūmân Kirkor ve Sitrak ve şahsı ta‘rîf-i şer‘î ile mu‘arrefe olan merkūme Arus hâzıra olduğu hâlde meclis-i şer‘-i şerîf-i hatîrde mahmiye-i mezkûrede Fincancılar nâm mahalde vâki‘ Hacı Nazif Ağa Hanı odabaşısı olup teba‘a-i Devlet-i aliyye’nin Ermeni milletinden olduğu ba ilmühaber mütehakkık olan bâ‘isü’r-rakīm Mardiros v. Vartan muvâcehesinde her biri teba‘a-i Devlet-i aliyye’den esnâf-ı merkūmenin Beyoğlu kolu ustabaşısı Dülbendcioğlu Andon v. Ohannes ve çavuşu Bodos v. Kostandi ve Çorabçı Hânı ustası Avraham v. Pretamos hâzır oldukları hâlde her biri ikrâr-ı tâm ve takrîr-i kelâm edip zikr olunan Çadırcı Ahmed Çelebi mahallesinde Caddeyol’da vâki‘ bir tarafdan çeşme arsası ve ba‘zen Tuhafçı Kosti veled-i Yamandi menzili ve bir tarafdan kale duvarı ve bir tarafdan Dökmeci Kirkor v. Oseb menzili ve ba‘zen Agop v. Manyas menzili ve ba‘zen Serope v. Serkiz menzili ve ba‘zen Ohannes v. Nişan menzili ve taraf-ı râbi‘i tarîk-i âm ile mahdûd merhûmân Baba Mahmud Efendi damadı Mehmed Efendi ve dârü’l-hadîs vakıfları müsakkafâtından Divân-ı hümâyûn kalemi hulefâsından es-Seyyid Ahmed Ratib Efendi b. es-Seyyid el-Hâc Hüseyin ile merkūm Mardiros’un bâ-temessük-i mütevelli bi’l-icâreteyn taht-ı tasarruflarında olan şehriye altmış guruş kirâlı Yeni şerbethâne demekle arîf bir bâb şerbethâne derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûmenin yüz yirmi sehm i‘tibârıyla yirmi sehm hisse-i şâyi‘ası bin iki yüz altmış senesi Cumâdelâhiresinin on yedinci günü tarihiyle müverraha ve ol târihde rüsûm-i zecriye muhassılı olan Mehmed Haşim Efendi’nin mührüyle memhûr işbu bir kıt‘a ve dört sehm bir buçuk pul ve nısf rub‘ pul hisse-i şâyi‘ası dahi bin iki yüz altmış beş senesi Şa‘bânü’l-mu‘azzamının yirmi yedinci günü tarihiyle müverrah ve ol târihde rüsûm-i zecriye muhassılı olan es-Seyyid Yakub Paşa merhûmun mührüyle memhûr bir kıt‘a ki cem‘an iki kıt‘a sûret ve hâlâ Zecriye Nâzırı izzetlü Hüseyin Efendi’nin bir kıt‘ailmühaberi mantûklarınca müteveffât-ı merkūme Armavani’nin hayâtında ile’l-fevt yedinde mülkü ve ba‘de fevtihâ bizimle kızı hâzıra-i merkūme Arus’a mevrûs olmağla biz hâzıra-i merkūme Arus ile ma‘an âlât-ı gedik-i mezkûrdan akd-i âti’z-zikrin sudûruna değin ber-minvâl-i muharrer irsen mâlik olduğumuz cem‘an yirmi dört sehm bir buçuk pul ve nısf rub‘ pul hisse-i şâyi‘a-i mezkûreyi tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile bâ-izn-i şürekâ beş bin guruşa merkūm Mardiros’a bey‘ ve temlîk ve vech-i lâyıkıyla teslîm eylediğimizde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semeni olan meblağ-ı mezkûr beş bin guruşu tamâmen bize def‘ u teslîm biz dahi yedinden bi’t-tamâm ve’l-kemâl ahz u kabz ve bi-kadri’l-hısas beynimizde iktisâm edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz zimmetini ibrâ-yı sahîh-i şer‘î ile ibrâ vü ıskāt ve her birimiz ber-minvâl âharın ibrâsını kabûl eyledik, ba‘de’l-yevm âlât-ı gedik-i mezkûrun cem‘an yirmi dört sehm bir buçuk pul ve nısf rub‘ pul hisse-i şâyi‘a-i mezkûresinde bizimle hâzıra-i merkūme Arus’un aslâ ve kat‘â alâka ve medhalimiz kalmayıp merkūm Mardiros’un mülk-i müşterâsı ve hakk-ı sırfı olmuşdur dediklerinde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 22 Muharrem sene 1279 Şuhûdü’l-hâl: Eş-şahidune’s-sabıkūn