Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 529 Hüküm no: 637 Orijinal metin no: [111a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Arita bt. Yani’nin vârislerinin menzil davasında sulh oldukları Mahmiye-i İstanbul’da el-Hâc Timur mahallesinde sâkine iken bundan [akdem] hâlike olan Arita bt. Yani nâm nasrâniyenin hasren vârisleri ve oğlunun oğlu Panayot ve oğlunun kızları Zenile ve Fotini taraflarından husûs-ı âti’l-beyâna vekîl-i sâbitü’l-vekâle[si] olan Andon v. Dimitri nâm zimmî meclis-i şer‘-i hatîr-i enverde işbu bâ‘isü’s-sifr Korda v. Dimitri nâm zimmî mahzarında bi’l-vekâle ikrâr ve takrîr-i kelâm [edip] mahalle-i mezbûrede vâki‘ etrâf-ı erba‘ası bağcı Lorende v. Dimitri ve Yanaki nâm zimmîler mülkleri ve kendi [mülkü] ve tarîk-i hâsla mahdûd büyût-ı adîdeyi müştemil mülk menzil hâlike-i mezbûrenin terekesindendir deyû müvekkilûn-ı mezbûrûn menzil-i mezbûru vâzı‘ü’l-yed olan merkūm Kor[da]’dan taleb ve da‘vâ eylediklerinde ol dahi cevâbında yedimde olan hüccetler nâtıka olduğu üzre hâlike-i merkūme hayâtında menzil-i mezbûrun nısfını semen-i ma‘lûm-ı makbûza bana ve nısf-ı şâyi‘i dahi kayınanam Sultana nâm nasrâniyeye bey‘ ve teslîm ettiklerinden sonra merkūm Sultana dahi hissesini semen-i ma‘lûm mukābelesinde bana bey‘ ve teslîm ben dahi iştirâ ve tesellüm etmekle menzil-i mezbûrun cümlesi benim mülküm olmuşdur deyû merkūm Korda def‘le mukābele etmekle beynlerinde nizâ‘-ı küllî vukū‘undan sonra muslihûn tavassut edip da‘vâ-yı mezkûreden merkūm Korda ile yirmi guruşa bi’l-vekâle sulh olduğumuzda ol dahi sulh-i mezbûru kabûl edip bedel-i sulh olan meblağ-ı mezbûr yirmi guruşu mezbûr Korda’dan bi’t-tamâm ahz u kabz ettiğimden sonra zikr olunan menzile ve semenine müte‘allika da‘vâdan mezbûr Korda’nın bi’l-vekâle zimmetini ibrâ ve iskāt eyledim min [ba‘d] menzil-i mezbûr merkūm Korda ile Sultana ile da‘vâları kalmamışdır dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâlis min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: Ahmed b. Abdullah, Siyavuş, el-Hâc Ali, İbrahim Çelebi, Anastas v. ( ), Yani v. ( ), Yani v. Manol, Yuvan v. Mosi, Panayot v. Dimitri, Hürmüz v. Serkis.