İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 207 Hüküm no: 126 Orijinal metin no: [26a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerbethâneci İstefani v. Mike’nin, İmâret Kâtibi merhûm Mahmud Raif Efendi nukūd-ı mevkûfesinden borç alması Asıl târih-i hüccet Galata mahkemesinde. İdâne İşbu sebt-i hâmiş olunan hüccet derûnunda ismi mezkûr şerbethâneci İstefani v. Mike meclis-i şer‘-i şerîf-i lâzımü’t-teşrîfde ashâb-ı hayrâtdan İmâret Kâtibi merhûm Mahmud Raif Efendi nukūd-ı mevkûfesinin bi’l-meşrûta mütevellisi vâkıf-ı müteveffâ-yı mûmâ-ileyhin sulbî sagīr oğlu Mehmed Hasib Efendi’nin vâlidesi ve tesviye-i umûruna kıbel-i şer‘den mansûbe vasîsi ve umûr-ı vakfı rü’yete dahi kezâlik kıbel-i şer‘den bâ-hüccet-i kāimmakāmı olup zâtı ta‘rîf-i şer‘î ile mu‘arrefe olan Cemile Hanım bt. Abdullah mahzarında ikrâr-ı tâm ve takrîr-i kelâm edip derûn-ı hâmiş-i hüccet-i mezkûrlerde tafsîl ve zikr ve beyân olunduğu üzere benim nukūd-ı mevkûfe-i mûmâ-ileyhe zimmetimde asl-ı mâl ve bâ-devr-i şer‘î nemâ cem‘an beş bin yüz yetmiş beş guruşdan nemâ-i merkūm altı yüz yetmiş beş guruşu kāimmakām-ı mütevelliye-i mûmâ-ileyhâya def‘ u teslîm eylediğimde ol dahi yedimden bi’t-tevliye ahz u kabz etmekle mâ‘adâ asl-ı mâl-ı mezkûr dört bin beş yüz guruş ile semeni işbu târih-i hâmişden i‘tibâren iki sene tamâmına değin müeccel ve mev‘ûduna vakf-ı mezbûrun mâlından ve kāimmakām-ı mütevelliye-i mûmâ-ileyhâ yedinden bi-safkatin vâhidetin iştirâ ve kabz eylediğim iki aded hilâlî sâ‘at semeninden dahi bin üç yüz elli guruş ki ciheteyn-i mezkûreteynden cem‘an beş bin sekiz elli guruş nukūd-ı vakf-ı mezkûre zimmetimde vâcibü’l-edâ ve lâzimü’l-kazâ deynimdir dedikde gıbbe’t-tasdîk mukırr-ı merkūmun sulbî kebîr oğlu şerbethâneci Anderyas ve diğer oğlu tüccâr hizmetkârı Aleksandri ve Büyükdere karyesi muhbiri Yorgi v. Dimitri’den her biri meclis-i ma‘kūd-ı mezkûrde kāimmakām-ı mütevelliye-i mûmâ-ileyhâ Cemile Hanım mahzarında her biri ikrâr-ı tâm ve takrîr-i kelâm edip mukırr-ı merkūm İstefan’ın nukūd-ı vakf-ı mezkûra zimmetinde vâcibü’l-edâ sahîhâ deyni olan meblağ-ı mecmû‘-ı mezkûr beş bin sekiz yüz elli guruşun edâsına biz dahi tarafeynden bi’l-emr ve’l-kabûl kefâlet-i mutlaka-i sahîha-i şer‘iyye ile kefîl bi’l-mâl ve zâminler olup ve her birimiz cihet-i kefâlet-i mezkûreden âharın zimmetine lâzım gelen meblağa dahi kezâlik tarafeynden bi’l-emr ve’l-kabul kefâlet-i mutlaka-i sahîha-i şer‘iyye ile kefîl ve zâminiz dediklerinde gıbbe’t-tasadiki’ş-şer‘î mâ-vaka‘a bi’t-taleb ketb olundu. Fî 25 Safer sene 1279 Şuhûdü’l-hâl: Muhzır Mustafa Ağa b. ( ), Muhzır Süleyman Ağa b. ( ), Muhzır Ahmed Ağa b. ( ), Muhzır el-Hâc Yusuf Ağa b. ( ), ve gayruhum