İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 208 Hüküm no: 127 Orijinal metin no: [26b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vaktiyle ekmekçi esnâfı kethüdâsı Hüseyin Hüsnü Efendi’ye ait ekmek fırını ve değirmeni hisselerinin müzâyede yoluyla satılması ve Zahîre Hazinesi’ne olan borçlarının ödenmesi Balık pazarı hâricinde habbâz fırını mübâya‘ası. Nushateyn. Muahharan tashîh olunmuşdur ihrâc şüd fî 25 L sene 300 Âsitâne-i sa‘âdet âşiyâne ve bilâd-ı selâse mahkemelerine mine’l-kadîm bâ-fermân-ı âlî merbût olan duhâncı gediklerilerinden mâ‘adâ gerek Dersaâdet ve gerek bilâd-ı selâse-i mezkûrede kâin ber-vech-i mülkiyet tasarruf olunmakda olan her nev‘ gediklerin mübâya‘a ve ikrâr-ı mülk ve hibe ve irsen intikāl misillü kâffe-i mu‘âmelâtı ve vukū‘ bulan muhâkemâtı münhasıran ve mahsûsan İstanbul Mahkemesi’nden icrâ ve iktizâ eden i‘lâm ve hüccet-i şer‘iyyeleri ancak mahkeme-i mezkûre tarafından i‘tâ olunmak ve gedikât ashâbının rızâ ve muvâfakatları olmadıkça kadîm mülk kirâları tezyîd olunmamak ve senedât-ı sahîha ve mu‘tebere ile ber-vech-i mülkiyet tasarruf olunmakda bulunan gediklerin müstakır oldukları mahalden ihrâc ve imhâsı zımnında mülk sâhibleri tarafından da‘vâya tasaddî olunur ise hükkâm-ı şer‘-i şerîf cânibinden istimâ‘ olunmaması bâlâsı tuğrâ-yı garrâ-yı hazret-i cihân-bânî ile muvaşşah ve müzeyyen bir kıt‘a nizâmnâme ve bâ-fermân-ı âlî müesses olan nizâm-ı müstahsene iktizâsından bulunduğuna binâen mahmiye-i İstanbul’da Hoca Paşa mahallesinde sâkin iken bundan mukaddem vefât eden mukaddemâ ekmekçi esnâfı kethüdâsı Hüseyin Hüsnü Efendi b. Mehmed Tahir b. zu‘amâdan Ömer Ağa’nın verâseti zevce-i menkûha-i metrûkesi Fâtıma Dilber Hanım bt. Abdullah ile sulbî sagīr oğlu Hasan Tahsin Bey ve sulbiye kebîre kızı Emine Nefise Perver Hanım ve sulbiye sagīre kızı Fâtımatü’z-zehra’ya münhasıra olduğu lede’ş-şer‘i’l-enver zâhir ve mütehakkık oldukdan sonra sagīrân-ı mezbûrânın tesviye-i umûrlarına kıbel-i şer‘den bâ-hüccet-i şer‘iyye vasiyy-i mansûbları el-Hâc Mehmed Efendi b. Ahmed mezbûre Fâtıma Dilber Hanım tarafından husûs-ı âti’z-zikrde vekîl-i müseccel-i şer‘îsi es-Seyyid Abdülhalim Ağa b. Süleyman ile zâtı ta‘rîf-i şer‘î ile mu‘arrefe olan mûmâ-ileyhâ Emine Nefise Perver Hanım hâzır oldukları hâlde meclis-i şer‘-i şerîf-i enverde bâ‘isü’l-kitâb nefsinden asîl ve li-ebeveyn er karındaşı Balmumcuzâde es-Seyyid Mehmed Nuri Efendi b. es-Seyyid el-Hâc Mehmed Emin tarafından husûs-ı câi’z-zikrde tasdîka vekîl-i şer‘îsi Hayriye tüccârı mu‘teberânından es-Seyyid Süleyman Eşref Efendi mahzarında esnâf-ı merkūme kethüdâsı İbrahim Ağa b. Ahmed ile sâir mazbûtü’l-esâmî nizâm ustaları taraflarından mürsel vekîlleri esnâf-ı merkūme yiğitbaşısı es-Seyyid İsmail Efendi b. es-Seyyid Mehmed Emin hâzır olduğu hâlde bi’l-vesâye ikrâr-ı tâm ve takrîr-i kelâm edip mahmiye-i mezkûre hısnı ebvâbından Balık pazarı kapısı hâricinde aşçı ve kaynarcı dükkânları beynlerinde vâki‘ merhûm Rüstem Paşa Vakfı müsakkafâtından asîl ve vekîl-i mûmâ-ileyh es-Seyyid Süleyman Eşref Efendi ile karındaşı müvekkil-i mûmâ-ileyh es-Seyyid Mehmed Nuri Efendi’nin bi’l-icâreteyn taht-ı tasarruflarında olan şehriye otuz guruş kirâlı bir bâb habbâz fırını ve şehriye otuz guruş kirâlı altı horoslu bir bâb habbâz değirmeni derûnlarında mevcûde beyne’l-esnâf gedik ta‘bîr olunur yirmi dört re’s bârgir ve onlara tâbi‘ sâir âlât-ı lâzime-i ma‘lûmenin on iki re’s bârgir ve onlara isâbet eden âlât-ı sâiresi âharların ve dörder re’s bârgirden on iki re’s bârgir ve onlara iktizâ eden âlât-ı sâiresi dahi müteveffâ-yı mûmâ-ileyh Hüseyin Hüsnü Efendi ve asîl ve vekîl-i mûmâ-ileyh es-Seyyid Süleyman Eşref Efendi ve Haçuk’un yedlerinde olup bin iki yüz altmış sekiz senesi Zilka‘deti’ş-şerîfesinin onuncu günü târihiyle müverraha ve ol târihde Dârü’l-hilâfeti’l-aliyye kādısı olan sudûr-ı izâmdan Yasincizâde semâhatlü es-Seyyid Mehmed İlmi Efendi hazretlerinin imzâ ve hatmlarını hâviye işbu bir kıt‘a mübâya‘a hüccet-i nâtıka olduğu üzere yedlerinde mülkleri iken müteveffâ-yı mûmâ-ileyh Hüseyin Hüsnü Efendi hayâtında ve asîl ve vekîl-i mûmâ-ileyh es-Seyyid Süleyman Eşref Efendi ve merkūm Haçuk ber-minvâl-i muharrer mâlik oldukları on iki re’s bârgir ve onlara iktizâ eden âlât-ı sâiresinin üçer re’s bârgirden dokuz re’s bârgir ve onlara isâbet eden âlât-ı sâiresini yedlerinde bi’l-ibkā mâ‘adâ üç re’s bârgir ve onlara îcâb eden âlât-ı sâiresini bin iki yüz yetmiş bir senesi Şevvali’l-mükerreminin on beşinci günü es-Seyyid Mehmed Salih Efendi bâ-hüccet-i şer‘iyye ve merkūm Haçuk’un ber-vech-i muharrer yedinde ibkā eylediği sâlifü’l-beyân üç re’s bârgir ve onlara isâbet eden âlât-ı sâiresini dahi mezbûr es-Seyyid Mehmed Nuri Efendi’ye kezâlik bâ-hüccet-i şer‘iyye bey‘ ve teslîm ettiklerinden sonra müteveffâ-yı mûmâ-ileyh Hüseyin Hüsnü Efendi ber-minvâl-i muharrer yedinde ibkā eylediği üç re’s bârgir ve onlara îcâb eden âlât-ı sâiresi yedinde mülkü olduğu hâlde vefât etdikde zikr olunan üç re’s ve onlara îcâb eden âlât-ı sâire sagīrân-ı mezbûrân ile müvekkile-i mezbûre Fâtıma Dilber Hanım ve hâzıra-i mûmâ-ileyhâ Emine Nefise Perver Hanım’a mevrûs olmağla ben bi’l-vesâye hâzır-ı vekîl-i mezbûr es-Seyyid Abdülhalim Ağa müvekkilesi mezbûre Fâtıma Dilber Hanım’a izâfetle bi’l-vekâle ve hâzıra-i mûmâ-ileyhâ Emine Nefise Perver Hanım dahi bi’l-asâle zikr olunan üç re’s bârgir ve onlara îcâb eden âlât-ı sâireyi münâdî yediyle sûk-ı sultânî ve mecma‘-ı nâs olan mahallerde lede’l-müzâyede ve gıbbe inkıtâ‘ı’r-rağbe el-yevm semen-i misli idüğü cerîdede mazbûtü’l-esâmî müslimin ihbârlarıyla zâhir ve mütehakkık olan yetmiş dört bin dört yüz guruşa tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile bâ-izn-i şürekâ ve bâ-ilmühaber asîl ve vekîl ve müvekkil-i mûmâ-ileyhümâ es-Seyyid Süleyman Eşref Efendi ve es-Seyyid Mehmed Nuri Efendi’ye bey‘ ve temlîk ve vech-i lâyıkı üzere teslîm eylediğimizde onlar dahi ber-vech-i muharrer seviyyen iştirâ ve temellük ve tesellüm ve kabz u kabûl eylediklerinden sonra müteveffâ-yı mûmâ-ileyh Hüseyin Hüsnü Efendi’nin hayâtında Zahîre Hazinesi’ne zimmetinde yirmi altı bin doksan guruş deyni olduğu mütehakkık olmağla semen-i mezkûr yetmiş dört bin dört yüz guruşun yirmi altı bin doksan guruşu deyn-i mezkûra mahsûben hazine-i mezkûrede kabza memûre edâ etmek üzere ben bi’l-vesâye ve vekîl-i hâzır-ı mezbûr es-Seyyid Abdülhalim Ağa bi’l-vekâle ve hâzıra-i mûmâ-ileyhâ Emine Nefise Perver Hanım dahi bi’l-asâle asîl ve vekîl ve müvekkil-i mûmâ-ileyhümâ es-Seyyid Süleyman Eşref Efendi ve es-Seyyid Mehmed Nuri Efendi’ye emr ve tarafımızdan tevkîl eylediğimizde onlar dahi kabûl ve ber-vech-i meşrûh edâ-i deyne ta‘ahhüd edip semen-i mezkûrun mâ‘adâsı olan kırk sekiz bin üç yüz on guruşu tamâmen bize def‘ u teslîm biz dahi yedlerinden bi’l-vesâye ve bi’l-vekâle ve bi’l-asâle ahz u kabz ve müteveffâ-yı mûmâ-ileyhin defter-i kassâmına idhâl eyledik ba‘de’l-yevm zikr olunan üç re’s bârgir ve onlara îcâb eden âlât-ı sâirede vasîleri olduğumuz sagīrân-ı mezbûrân Hasan Tahsin Bey ve Fâtımatü’z-zehra Hanım ve müvekkile-i mezbûre Fâtıma Dilber Hanım ve hâzıra-i mûmâ-ileyha Emine Nefise Perver Hanım’ın aslâ ve kat‘â alâka ve medhalleri kalmayıp asîl ve vekîl ve müvekkil-i mûmâ-ileyhümâ es-Seyyid Süleyman Eşref Efendi ve es-Seyyid Mehmed Nuri Efendi’nin ale’l-iştirâki’s-seviy mülk-i müşterâları ve hakk-ı sırfları olmuşdur dedikde gıbbe’t-tasâduki’ş-şer‘î mâ-vaka‘a bi’t-taleb ketb olundu. Fî 20 Muharrem sene 1279 Şuhûdü’l-hâl: Muhzır Osman Ağa b. ( ), Muhzır İsmail Ağa b. ( ), Muhzır el-Hâc Yusuf Ağa b. ( ), Muhzır Feyzullah Ağa b. ( ), Tahtacı el-Hâc Salih Ağab. ( ), ve gayruhum