İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 210 Hüküm no: 128 Orijinal metin no: [26b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefât eden ekmekçi esnâfı kethüdâsı Hüseyin Hüsnü Efendi’ye ait ekmek fırını ve değirmeni hisselerinin müzâyede yoluyla satılması ve Zahîre Hazinesi’ne olan borçlarının ödenmesi Habbâz fırını. Kaydı ihrâc şüd fî 29 Safer sene 1301. Muahharan tashîh olunmuşdur. Nushateyn Kezâlik mahmiye-i İstanbul’da Hoca Paşa mahallesinde sâkin iken bundan mukaddem vefât eden mukaddemâ ekmekçi esnâfı kethüdâsı Hüseyin Hüsnü Efendi b. el-Hâc Mehmed Tahir b. zu‘amâdan Ömer Ağa’nın verâseti zevce-i menkûha-i metrûkesi Fâtıma Dilber Hanım bt. Abdullah ile sulbî sagīr oğlu Hasan Tahsin Bey ve sulbîye kebîre kızı Emine Nefise Perver Hanım ve sulbîye sagīre kızı Fâtımatü’z-zehrâ’ya münhasıra olduğu lede’ş-şer‘i’l-enver zâhir ve mütehakkık oldukdan sonra sagīrân-ı mezbûrânın tesviye-i emirlerine kıbel-i şer‘den bâ-hüccet-i şer‘iyye vasiyy-i mansûbları el-Hâc Mehmed Efendi b. Ahmed zevce-i mezbûre Fâtıma Dilber Hanım tarafından husûs-ı âti’l-beyânda vekîl-i müseccel-i şer‘îsi es-Seyyid Abdülhalim Ağa b. Süleyman ile zâtı ta‘rîf-i şer‘î ile mu‘arrefe olan bint-i mûmâ-ileyhâ Emine Nefise Perver Hanım hâzır oldukları hâlde meclis-i şer‘-i şerîf-i enverde bâ‘iseyi’l-kitâb nefsinden asîl ve li-ebeveyn er karındaşı Balmumcuzâde es-Seyyid Mehmed Nuri Efendi b. es-Seyyid el-Hâc Mehmed Emin tarafından husûs-ı âti’z-zikrde tasdîka vekîl-i şer‘îsi Hayriye tüccârı mu‘teberânından es-Seyyid Süleyman Eşref Efendi mahzarında esnâf-ı merkūme kethüdâsı İbrahim Ağa b. Ahmed ile sâir mazbûtü’l-esâmî nizâm ustaları taraflarından mürsel vekîlleri esnâf-ı merkūme yiğitbaşısı es-Seyyid İsmail Efendi b. es-Seyyid Mehmed Emin hâzır olduğu hâlde bi’l-vesâye ikrâr-ı tâm ve takrîr-i kelâm edip Havâss-ı Refî‘a kazasına muzâfe kasaba-i Hasköy’de Selhâne İskelesi’nde vâki‘ bir tarafdan ba‘zen Yahudi şerbethânesi ve ba‘zen leb-i deryâ ve bir tarafdan tarîk-i hâs ve bir tarafdan ba‘zen kömürcü mağazası ve ba‘zen helvâcı dükkânı ve taraf-ı râbi‘i tarîk-i âm ile mahdûd merhûme Hadice Sultan ve Saray-ı Cedîd-i Sultanî kethüdâsı merhûme Hanfeza Kadın vakıfları müsakkafâtından müteveffâ-yı mûmâ-ileyh Hüseyin Hüsnü Efendi ve asîl ve vekîl-i mûmâ-ileyh es-Seyyid Süleyman Eşref Efendi ve li-ebeveyn er karındaşı es-Seyyid Mehmed Nuri Efendi’nin taht-ı tasarruflarında olan şehriye otuz guruş kirâlı bir bâb habbâz fırını ve şehriye yirmi guruş kirâlı dört horoslu bir bâb ekmekçi değirmeni derûnlarında mevcûde beyne’l-esnâf gedik ta‘bîr olunur on altı re’s bârgir ve onlara tâbi‘ sâir âlât-ı lâzime-i ma‘lûmenin beş re’s bârgir sekiz mıh ve onlara isâbet eden âlât-ı sâiresi asîl ve vekîl-i mûmâ-ileyh es-Seyyid Süleyman Eşref Efendi’nin ve beş re’s bârgir sekiz mıh ve onlara iktizâ eden âlât-ı sâiresi gāib ani’l-meclis Haçuk’un ve diğer beş re’s bârgir sekiz mıh ve onlara iktizâ eden âlât-ı sâiresi dahi müteveffâ-yı mûmâ-ileyh Hüseyin Hüsnü Efendi’nin hayâtında yedlerinde olup bin iki yüz yetmiş bir senesi Şevvali’l-mükerreminin on dördüncü günü târihiyle müverraha ve ol târihde Dârü’l-hilâfeti’l-aliyye kādısı olan sudûr-ı izâmdan Sirozîzâde semâhatlü es-Seyyid Mehmed Tahir Efendi hazretlerinin imzâ ve hatmleriyle mahtûme işbu bir kıt‘a hüccet-i şer‘iyye nâtıka olduğu üzere yedlerinde mülk ve hakları iken asîl ve vekîl-i mûmâ-ileyh es-Seyyid Süleyman Eşref Efendi ve gāib-i merkūm Haçuk ve müteveffâ-yı mûmâ-ileyh Hüseyin Hüsnü Efendi hayâtında ber-minvâl-i muharrer mâlik oldukları âlât-ı gedik-i mezkûrun dörder re’s bârgirden cem‘an on iki re’s bârgir ve onlara isâbet eden âlât-ı sâiresini yedlerinde bi’l-ibkā mâ‘adâ dört re’s bârgir ve onlara îcâb eden âlât-ı sâiresini şehr-i mezkûrun on beşinci günü ber mûceb-i zahr-ı hüccet-i mezkûre asîl ve vekîl-i mûmâ-ileyhin [27a] biraderi es-Seyyid Mehmed Salih Efendi’ye bâ-hüccet-i şer‘iyye ve merkūm Haçuk ber-vech-i muharrer yedinde ibkā eylediği dört re’s bârgir ve onlara isâbet eden âlât-ı sâiresini dahi mezbûr es-Seyyid Mehmed Nuri Efendi’ye kezâlik bâ-hüccet-i şer‘iyye bey‘ ve teslîm etmeleriyle müteveffâ-yı mûmâ-ileyh Hüseyin Hüsnü Efendi sâlifü’l-beyân dört re’s bârgir ve onlara îcâb eden âlât-ı sâire yedinde mülkü olduğu hâlde vefât edip sâlifü’l-beyân dört re’s bârgir ve onlara îcâb eden âlât-ı sâire vasileri olduğum sagīrân-ı mezbûrân Hasan Tahsin Bey ve Fâtımatü’z-zehra Hanım’a ve zevcesi müvekkile-i mezbûre Fâtıma Dilber Hanım ve kızı hâzıra-i mûmâ-ileyhâ Emine Nefise Perver Hanım’a mevrûs olmağla ben bi’l-vesâye hâzır ve vekîl-i mezbûr es-Seyyid Abdülhalim Ağa müvekkilesi mezbûre Fâtıma Dilber Hanım’a izâfetle bi’l-vekâle ve hâzıra-i mûmâ-ileyhâ Emine Nefise Perver Hanım dahi bi’l-asâle zikr olunan sâlifü’l-beyân dört re’s bârgir ve onlara îcâb eden âlât-ı sâireyi münâdî yediyle sûk-ı sultânî ve mecma‘-ı nâs olan mahallerde lede’l-müzâyede ve gıbbe inkıtâ‘ı’r-rağbe el-yevm semen-i misli idüğü bî-garaz sikât-ı müslimînden cerîdede mazbûtü’l-esâmî kimesnelerin alâ tarîki’ş-şehâde ihbârlarıyla zâhir ve mütehakkık olan otuz altı bin guruşa tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile bâ-izn-i şerîkan ve bâ-ilmühaber asîl ve vekîl ve müvekkil-i mûmâ-ileyhümâ es-Seyyid Süleyman Eşref Efendi ve es-Seyyid Mehmed Nuri Efendi’ye bey‘ ve temlîk ve vech-i lâyıkı üzere teslîm eylediğimizde onlar dahi ber-vech-i muharrer seviyyen iştirâ ve temellük ve tesellüm ve kabz u kabûl eylediklerinden sonra müteveffâ-yı mûmâ-ileyh Hüseyin Hüsnü Efendi’nin hayâtında Zahîre Hazinesi’ne on dört bin dokuz yüz on guruş deyni olduğu mütehakkık olmağla semen-i mezkûr otuz altı bin guruşun on dört bin dokuz yüz on guruşunu deyn-i mezkûre mahsûben hazine-i mezkûrede kabza memûra edâ etmek üzere ben bi’l-vesâye ve hâzır vekîl-i mezbûr es-Seyyid Abdülhalim Ağa bi’l-vekâle ve hâzıra-i mûmâ-ileyhâ Emine Nefise Perver Hanım dahi bi’l-asâle asîl ve vekîl ve müvekkil-i mûmâ-ileyhümâ es-Seyyid Süleyman Eşref Efendi ve es-Seyyid Mehmed Nuri Efendi’ye emr ve tarafımızdan tevkîl eylediğimizde onlar dahi kabûl ve ber-vech-i meşrûh edâ-i deyne ta‘ahhüd edip semen-i mezkûrun mâ‘adâsı olan yirmi bir bin doksan guruşu tamâmen bize def‘ u teslîm biz dahi yedlerinden bi’l-vesâye ve bi’l-vekâle ve bi’l-asâle ahz u kabz ve müteveffâ-yı mûmâ-ileyhin defter-i kassâmına idhâl eyledik ba‘de’l-yevm sâlifü’l-beyân dört re’s bârgir ve onlara îcâb eden âlât-ı sâiresinde vasileri olduğum sagīrân-ı mezbûrân Hasan Tahsin Bey ve Fâtımatü’z-zehra Hanım ve müvekkile-i mezbûre Fâtıma Dilber Hanım ve hâzıra-i mûmâ-ileyhâ Emine Nefise Perver Hanım’ın aslâ ve kat‘â alâka ve medhalimiz kalmayıp asîl ve vekîl ve müvekkil-i mûmâ-ileyhümâ es-Seyyid Süleyman Eşref Efendi ve es-Seyyid Mehmed Nuri Efendi’nin ale’l-iştirâki’s-seviy mülk-i müşterâları ve hakk-ı sırfları olmuşdur dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 20 Muharrem sene 1279 Şuhûdü’l-hâl: Eş-şahidune’s-sabıkūn