.:: İstanbul Kadı Sicilleri ::.


İstanbul Mahkemesi 211 Numaralı Sicil (H. 1278-1279 / M. 1862-1863)
cilt: 98, sayfa: 214
Hüküm no: 130
Orijinal metin no: [27a-2]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Doğramacı esnâfından Artin v. Serkiz’in şerbethâne hisselerini şerbethâneci esnâfından Haci Bunyad v. Yuvan’a satması

Habbâz

Kezâlik teba‘a-i Devlet-i aliyye’nin Ermeni milletinden ve doğramacı esnâfından Artin v. Serkiz meclis-i şer‘-i hatîrde teba‘a-i Devlet-i aliyye’nin Rum milletinden ve şerbethâneci esnâfından bâ‘isü’r-rakīm Haci Bunyad v. Yuvan muvâcehesinde her biri teba‘a-i Devlet-i aliyye’den Çarşı kolu ustabaşısı Avraham v. Kiryako ve Langa kolu ustabaşısı Anaştaş v. Yanko hâzır oldukları hâlde ikrâr-ı tâm ve takrîr-i kelâm edip mahmiye-i İstanbul’da Tavuk pazarı civârında Atîkalipaşa mahallesinde kâin Ayasofya-i Kebîr Câmi’-i şerîfi evkāfı müsakkafâtından Farine bt. Lefter ve Tomaoğlu Avraham ve Zatyaoğlu Hoca Yorgi’nin bâ-temessükât-ı mütevelli bi’l-icâreteyn taht-ı tasarruflarında olan şehriye yüz seksen yedi buçuk guruş kirâlı Baklalı Hân şerbethânesi demekle arîf ve meşhûr bir bâb şerbethâne derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûmenin yüz yirmi sehm i‘tibârıyla yüz on sekiz sehm hisse-i şâyi‘ası âharların yedlerinde mülkleri olup mâ‘adâ iki sehm hisse-i şâyi‘ası dahi akd-i âti’z-zikrin sudûruna değin sene-i sâbıka Saferi’l-hayrının sekizinci günü târihiyle müverrah ve ol târihde rüsûm-i zecriye nâzırı olan sa‘âdetlü Nazif Beyefendi’nin mührüyle memhûr işbu bir kıt‘a sûret ve Zecriye Nâzırı izzetlü Hüseyin Efendi’nin mührüyle memhûr işbu bir kıt‘a ilmühaber mantûklarınca yedimde mülk ve hakkım olmağla ben ber-minvâl-i muharrer mâlik olduğum iki sehm hisse-i şâyi‘a-i âlât-ı gedik-i mezkûru tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile bâ-izn-i şürekâ merkūm Haci Bunyad’a [27b] üç bin guruşa bey‘ ve temlîk ve vech-i lâyıkıyla teslîm eylediğimde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semeni olan meblağ-ı merkūm üç bin guruşu tamamen bana def‘ u teslîm ben dahi yedinden bi’t-tamâm ve’l-kemâl ahz u kabz edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile kabûlümüzü hâvî ibrâ vü ıskāt eyledik ba‘de’l-yevm iki sehm hisse-i şâyi‘a-i âlât-ı gedik-i mezkûrde benim aslâ ve kat‘â alâka ve medhalim kalmayıp merkūm Haci Bunyad’ın mülk-i müşterâsı ve hakk-ı sırfı olmuşdur dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu.

Fî 11 Rebî‘ülâhir sene 1279

Şuhûdü’l-hâl: Muhzır Osman Ağa b. ( ), Muhzır Feyzullah Ağa b. ( ), Tahtacı el-Hâc Salih Ağa b. ( ), ve gayruhum