İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 215 Hüküm no: 131 Orijinal metin no: [27b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dühân tüccârından İbrahim Halil Efendi ve Mehmed Emin Efendi’nin tütüncü mağazasını Hayriye tüccârından Hacı Paşazâde Seyyid Hacı Ahmed Efendi’ye satmaları Tütüncü mağazası 13000[0] guruş Âsitâne-i sa‘âdet âşiyâne ve bilâd-ı selâse mahkemelerine bâ-fermân-ı âlî mine’l-kadîm merbût olan tütüncü gedikleriyle gerek Dersaâdet ve gerek bilâd-ı selâse-i mezkûrede kâin ber-vech-i mülkiyet tasarruf olunmakda olan her nev‘ gediklerin mübâya‘a ve ikrâr-ı mülk ve hibe ve irsen intikāl misillü kâffe-i mu‘âmelâtı ve vukū‘ bulan muhâkemâtı münhasıran ve mahsûsan İstanbul Mahkemesi’nden icrâ ve iktizâ eden i‘lâm ve hüccet-i şer‘iyyeleri ancak mahkeme-i mezkûre tarafından i‘tâ olunmak ve gedikât ashâbının rızâ ve muvâfakatları olmadıkça kadîm mülk kirâları tezyîd olunmamak ve senedât-ı sahîha ve mu‘tebere ile ber-vech-i mülkiyet tasarruf olunmakda bulunan gediklerin müstakır oldukları mahalden ihrâc ve imhâsı zımnında mülk sâhibleri tarafından da‘vâya tasaddî olunur ise hükkâm-ı şer‘-i şerîf cânibinden istimâ‘ olunmaması bâlâsı tuğrâ-yı garrâ-yı hazret-i cihân-bânî ile muvaşşah ve müzeyyen bir kıt‘a nizâmnâme ve bâ-fermân-ı âlî müesses olan nizâm-ı müstahsene iktizâsından bulunduğuna binâen dühân tüccârından İbrahim Halil Efendi ve Mehmed Emin Efendi b. Mustafa meclis-i şer‘-i şerîf-i enverde Hayriye tüccârından bâ‘isü’l-kitâb Hacı Paşazâde es-Seyyid el-Hâc Ahmed Efendi b. es-Seyyid Mehmed Emin Efendi mahzarında tütüncü esnâfının kethüdâsı el-Hâc Mehmed Latif Efendi b. İsmail ile duhân tüccarından mazbûtü’l-esâmî on nefer müslim ve beş nefer hıristiyan lonca ihtiyârları taraflarından mürsel vekîlleri esnâf-ı merkūme yazıcısı es-Seyyid Ahmed Efendi b. el-Hâc Mehmed hâzır olduğu hâlde ikrâr-ı tâm ve takrîr-i kelâm edip mahmiye-i İstanbul hısnı ebvâbından bâb-ı Caferî hâricinde duhân gümrüğü civârında Tulumba sûkunda vâki‘ bir tarafdan Hüsnü Efendi mağazası ve bir tarafdan Mustafa Şükrü Efendi mağazası ve bir tarafdan mûmâ-ileyh es-Seyyid el-Hâc Ahmed Efendi mağazası ve taraf-ı râbi‘i tarîk-i âm ile mahdûd merhûme Âişe Sultan Vakfı müsakkafâtından mûmâ-ileyh es-Seyyid el-Hâc Ahmed Efendi’nin bâ-temessük-i mütevelli bi’l-icâreteyn taht-ı tasarrufunda olan Eshâm Muhâsebesi kaleminde Kalyoncuzâde Mehmed Ağa ismine mukayyed şehriye on altı guruş kirâ-yı kadîmelü fevkānîsinde bir bâb oda ve bir sofa ve bir memşâ ve vustânîsinde bir bâb kebîr mağazayı müştemil ve esnâf-ı mezkûrenin şurût ve nizâmlarında dâhil bir bâb tütüncü mağazası derûnunda mevcûde beyne’l-esnâf gedik ta‘bîr olunur akd-i âti’z-zikrin sudûruna değin yedimizde olup bin iki yüz yetmiş altı senesi Recebi’l-ferdinin on sekizinci günü târihiyle müverraha ve ol târihde Dârü’l-hilâfeti’l-aliyye kādısı olan sudûr-ı izâmdan el-Hâc Hüseyin Hulusi Efendi merhûmun imzâ ve hatemini hâviye işbu bir kıt‘a mübâya‘a hücceti ve kethüdâ-yı mûmâ-ileyhin takdîm eylediği bir kıt‘a ilmühaber mantûklarınca yedimizde seviyyen mülk ve hakkımız olan âlât-ı lâzime-i ma‘lûmeyi tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile yüz otuz bin guruşa mûmâ-ileyh es-Seyyid el-Hâc Ahmed Efendi’ye bey‘ ve temlîk ve teslîm eylediğimizde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semeni olan meblağ-ı merkūm yüz otuz bin guruşu tamâmen bize def‘ u teslîm biz dahi yedinden bi’t-tamâm ve’l-kemâl ahz u kabz edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile kabûlümüzü hâvî ibrâ vü ıskāt eyledik ba‘de’l-yevm âlât-ı gedik-i mezkûrde bizim aslâ ve kat‘â alâka ve medhalimiz kalmayıp mûmâ-ileyh es-Seyyid el-Hâc Ahmed Efendi’nin mülk-i müşterâsı ve hakk-ı sırfı olmuşdur dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 7 Rebî‘ülâhir sene 1279 Şuhûdü’l-hâl: Duhân tüccârından Mehmed Salih Ağa b. Ali Ruşen, Tüccâr-ı mezkûreden Varnalı Hasan Efendi b. Ali, Tüccâr-ı mezkûreden el-Hâc Hüseyin Çavuş b. MehmedHüseyin Bey b. Ali Ruşen, Tahtacı el-Hâc Salih Ağa b. Hayrullahve gayruhum