İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 217 Hüküm no: 132 Orijinal metin no: [27b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tütün tüccârından İbrahim Halil Efendi ve Mehmed Emin Efendi’nin kârgîr tütüncü mağazasını Hacı Paşazâde Seyyid Hacı Ahmed Efendi’ye satmaları Kârgîr tütüncü mağazası 10000 guruş Kezâlik dühân tüccârından İbrahim Halil Efendi ve Mehmed Emin Efendi b. Mustafa meclis-i şer‘-i şerîf-i enverde Hayriye tüccârından bâ‘isü’l-kitâb Hacı Paşazâde es-Seyyid el-Hâc Ahmed Efendi b. es-Seyyid Mehmed Emin Efendi mahzarında tütüncü esnâfının kethüdâsı el-Hâc Mehmed Latif Efendi b. İsmail ile duhân tüccarından mazbûtü’l-esâmî on nefer müslim ve beş nefer hıristiyan taraflarından mürsel vekîlleri esnâf-ı merkūme yazıcısı Mehmed Efendi b. el-Hâc Mehmed hâzır olduğu hâlde her biri ikrâr-ı tâm ve takrîr-i kelâm edip mahmiye-i İstanbul duhân gümrüğü civârında Sırık hammâlânı sûkunda vâki‘ bir tarafdan mukaddemâ Küçük Yorgaki ve el-yevm el-Hâc Ebubekir Ağa mağazası ve bir tarafdan mukaddemâ Françko ve el-yevm Tiryakioğlu Bedros mağazası ve bir tarafdan mûmâ-ileyh es-Seyyid el-Hâc Ahmed Efendi mağazası ve taraf-ı râbi‘i tarîk-i âm ile mahdûd merhûm Rüstem Paşa Vakfı müsakkafâtından mûmâ-ileyh es-Seyyid el-Hâc Ahmed Efendi bâ-temessük-i mütevelli bi’l-icâreteyn taht-ı tasarrufunda olan şehriye on guruş kirâ-yı kadîmelü fevkānîsinde iki bâb oda ve bir sofa ve bir memşâ ve vustânîde bir bâb odayı müştemil tahtânî mukaddemâ iki bâb ve el-yevm bir bâb kebîr kârgîr tütüncü mağazası derûnunda mevcûde beyne’l-esnâf gedik ta‘bîr olunur akd-i âti’z-zikrin sudûruna değin yedimizde olup bin iki yüz yetmiş altı senesi Recebi’l-ferdinin on sekizinci günü târihiyle müverraha ve ol târihde Dârü’l-hilâfeti’l-aliyye kādısı olan sudûr-ı izâmdan el-Hâc Hüseyin Hulusi Efendi merhûmun imzâ ve hateminihâviye işbu bir kıt‘a mübâya‘a hücceti ve kethüdâ-yı mûmâ-ileyhin takdîm eylediği bir kıt‘a ilmühaber nâtıklar olduğu üzere yedimizde seviyyen mülk ve hakkımız olan iki kıt‘a mülk âlât-ı lâzime-i ma‘lûmeyi tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile yüz bin guruşa mûmâ-ileyh es-Seyyid el-Hâc Ahmed Efendi’ye bey‘ ve temlîk ve teslîm eylediğimizde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semeni olan meblağ-ı merkūm yüz bin guruşu tamâmen bize def‘ u teslîm biz dahi yedinden bi’t-tamâm ve’l-kemâl ahz u kabz edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile kabûlümüzü hâvî ibrâ vü ıskāt eyledik ba‘de’l-yevm iki kıt‘a âlât-ı gedik-i mezkûrlerde bizim aslâ ve kat‘â alâka ve medhalimiz kalmayıp mûmâ-ileyh es-Seyyid el-Hâc Ahmed Efendi’nin mülk-i müşterâsı ve hakk-ı sırfı olmuşdur dediklerinde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi 7 Rebî‘ülâhir sene 1279 Şuhûdü’l-hâl: Eş-şahidune’s-sabıkūn