İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 218 Hüküm no: 133 Orijinal metin no: [27b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halil Hocaoğlu Seyyid İbrahim Ağa’nın tütüncü dükkânındaki hisselerini Şerife Esma Hanım bt. Hacı Paşazâde Seyyid Mehmed Emin’e satması Tütüncü dükkânı 6000 guruş Kezâlik duhân tüccârından Halil Hocaoğlu es-Seyyid İbrahim Ağa b. es-Seyyid Mustafa meclis-i şer‘-i şerîf-i enverde mahmiye-i mezkûrede Süleymaniye Câmi‘-i şerîfi kurbünde Şeyh Muhyiddin mahallesinde sâkine duhân tüccârından Mehmed Hüsnü Efendi zevcesi bâ‘isetü’l-kitâb Şerife Esma Hanım bt. Hacı Paşazâde es-Seyyid Mehmed Emin Efendi tarafından husûs-ı âti’l-beyânda tasdîka vekîl-i şer‘îsi teba‘adan Ali Ağa b. Salih mahzarında tütüncü esnâfının kethüdâsı el-Hâc Mehmed Latif Efendi b. es-Seyyid İsmail ile duhân tüccarından mazbûtü’l-esâmî on nefer müslim ve beş nefer hıristiyan lonca ihtiyârları taraflarından mürsel vekîlleri esnâf-ı mezkûre yazıcısı es-Seyyid Ahmed Efendi b. el-Hâc Mehmed hâzır olduğu hâlde ikrâr-ı tâm ve takrîr-i kelâm edip mahmiye-i mezkûrede Kadırga limanı nâm mahalde ahûr ve enserci dükkânları beynlerinde vâki‘ Tütüncü Ohannes’in taht-ı tasarrufunda olan şehriye beş guruş kirâlı Eshâm Muhâsebesi Kaleminde Mardiros v. Vartan ismine mukayed bir bâb tütüncü dükkânı derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûmenin nısf hisse-i şâyi‘ası müvekkile-i mûmâ-ileyhâ Şerife Esma Hanım’ın bâ-hüccet-i şer‘iyye yedinde mülkü olup mâ‘adâ âhar nısf hisse-i şâyi‘ası dahi yedimde olup bin iki yüz yetmiş senesi Cumâdelâhiresi’nin ikinci günü târihiyle müverraha ve ol târihde Dârü’l-hilâfeti’l-aliyye kādısı olan İsmet Beyzâde semâhatlü es-Seyyid Abdullah Refet Beyefendi hazretlerinin imzâ ve hatmlarıyla mahtûme bir kıt‘a hüccet-i şer‘iyye ve kethüdâ-yı mûmâ-ileyhin takdîm eylediği bir kıt‘a ilmühaber mantûklarınca yedimde mülk ve hakkım olmağla ben âlât-ı gedik-i mezkûrdan akd-i âti’z-zikrin sudûruna değin ber-minvâl-i muharrer mâlik olduğum âhar nısf hisse-i şâyi‘a-i mezkûresini tarafeynden îcâb ve kabûlü hâvî [28a] şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile müvekkile-i mûmâ-ileyhâ Şerife Esma Hanım’a altı bin guruşa bey‘ ve temlîk ve vech-i lâyıkı üzere teslîm eylediğimde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semeni olan meblağ-ı merkūm altı bin guruşu tamâmen bize def‘ u teslîm ben dahi yedinden bi’t-tamâm ve’l-kemâl ahz u kabz edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile kabûlümüzü hâvî ibrâ vü ıskāt eyledik ba‘de’l-yevm âlât-ı gedik-i mezkûrun âhar nısf hisse-i şâyi‘a-i merkūmesinde benim aslâ ve kat‘â alâka ve medhalim kalmayıp mecmû‘-ı âlât-ı gedik-i mezkûr müvekkile-i mûmâ-ileyhâ Şerife Esma Hanım’ın mülk-i mahzı ve hakk-ı sırfı olmuşdur dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 14 Rebî‘ülahir sene 1279 Şuhûdü’l-hâl: Duhân tüccârından Mehmed Salih Ağa b. Ali Ruşen, Muhzır Feyzullah Ağa b. ( ), Muhzır Edirneli Ahmed Ağa b. ( ), Muhzır İsmail Ağa b. ( ), Tahtacı el-Hâc Salih Ağa b. ( ), ve gayruhum