Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 529 Hüküm no: 638 Orijinal metin no: [111b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Nazlı bt. Zinor’un vârislerinin terekenin taksiminde anlaştıkları Vilâyet-i Anadolu’da Eğin kazâsına tâbi‘ Kâfirkâb nâm karye sâkinelerinden olup bundan akdem hâlike olan Nazlı bt. Zinor nâm nasrâniyenin verâseti sadriye kebîre kızı Osekli bt. Canem nâm nasrâniye ile li ebeveyn er karındaşı oğlu Markos v. Manos nâm zimmîye münhasıra oldukdan sonra mezbûre Osekli meclis-i şer‘-i şerîf-i enverde işbu bâ‘isü’l-vesîka mezbûr Markos mahzarında bi tav‘ihâ ikrâr ve takrîr-i kelâm edip vâlidesi hâlike-i mezbûre terekesinden bi hasebi’l-irsi’ş-şer‘î bana isâbet eden nısf hisse-i şâyi‘am mukābelesinde alâ tarîki’t-tehârüc hissemden ezyed mezbûr Markos benimle otuz guruş üzerine müsâlaha olup ben dahi ber vech-i muharrer sulh-i mezbûru kabûl ve bedel-i sulh olan meblağ-ı mezbûru merkūm Markos yedinden tamâmen ahz u kabz eylediğimden sonra vâlidem hâlike mezbûrenin akār ve nukūd ve menkūl cemî‘ terekesine müte‘allika âmme-i da‘vâdan mezbûr Markos’un zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-hâdi aşer min şehri Ramazâni’l-mübârek li sene seb‘a ve tis‘în ve elf. Şuhûdü’l-hâl: İbrahim Çelebi b. Ahmed, Mehmed Çelebi b. Yusuf, Mehmed b. İdris, Ali b. Bâli ve gayruhüm.