İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 227 Hüküm no: 139 Orijinal metin no: [29b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tütüncü esnâfından Simon v. İstefan’ın tütüncü dükkânındaki hisselerini duhân tüccârından Karamanlı Cirazoğlu Vasil v. Pandali’ye satması Tütüncü mübâya‘ası 2500 guruş Âsitâne-i sa‘âdet âşiyâne ve bilâd-ı selâse mahkemelerine bâ-fermân-ı âlî mine’l-kadîm merbût olan duhâncı gedikleriyle sâir gerek Dersaâdet ve gerek bilâd-ı selâse-i mezkûrede kâin ber-vech-i mülkiyet tasarruf olunmakda bulunan her nev‘ gediklerin mübâya‘a ve ikrâr-ı mülk ve hibe ve irsen intikāl misillü kâffe-i mu‘âmelâtı ve vukū‘ bulan muhâkemâtı münhasıran ve mahsûsan İstanbul Mahkemesi’nden icrâ ve iktizâ eden i‘lâm ve hüccet-i şer‘iyyeleri ancak mahkeme-i mezkûre tarafından i‘tâ olunmak ve gedikât ashâbının rızâ ve muvâfakatları olmadıkça kadîm mülk kirâları tezyîd olunmamak ve senedât-ı sahîha ve mu‘tebere ile ber-vech-i mülkiyet tasarruf olunmakda bulunan gediklerin müstakır oldukları mahalden ihrâc ve imhâsı zımnında mülk sâhibleri tarafından da‘vâya tasaddî olunur ise hükkâm-ı şer‘-i şerîf cânibinden istimâ‘ olunmaması bâlâsı tuğrâ-yı garrâ-yı hazret-i cihân-bânî ile muvaşşah ve müzeyyen bir kıt‘a nizâmnâme ve bâ-fermân-ı âlî müesses olan nizâm-ı müstahsene muktezâsından bulunduğuna binâen teba‘a-i Devlet-i aliyye’nin Rum milletinden ve tütüncü esnâfından Simon v. el-müteveffâ İstefan v. Pretamos meclis-i şer‘-i şerîf-i hatîrde teba‘a-i Devlet-i aliyye’nin Rum milletinden olduğu bâ-ilmühaber mütehakkık olan duhân tüccârından bâ‘isü’r-rakīm Karamanlı Cirazoğlu Vasil v. Pandali muvâcehesinde tütüncü esnâfının kethüdâsı el-Hâc Mehmed Latif Efendi b. İsmail ile duhân tüccarından mazbûtü’l-esâmî on nefer müslim ve beş nefer hıristiyan lonca ihtiyârları taraflarından mürsel kethüdâ vekîli Ahmed Efendi b. Osman hâzır olduğu hâlde ikrâr-ı tâm ve takrîr-i kelâm edip mahmiye-i İstanbul hısnı ebvâbından bâb-ı Caferî hâricinde Eyüb iskelesi başında Çobançeşmesi karşısında zahîreci ve limoncu dükkânları beynlerinde kâin Ayasofya-i Kebîr Câmi’-i şerîfi evkāfı müsakkafâtından İstavri’nin bi’l-icâreteyn taht-ı tasarrufunda olan Eshâm Muhâsebesi kaleminde Pretamos ve Yorgi isimlerine mukayyed şehriye dokuz guruş kirâlı bir bâb tütüncü dükkânı derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûmenin yüz yirmi sehm i‘tibârıyla seksen sehm hisse-i şâyi‘asından on yedi sehm yedi pul hisse-i şâyi‘ası iki bin iki yüz seksen sehm i‘tibârıyla iki bin üç yüz yetmiş altı sehm hisse-i şâyi‘ası âharların yedlerinde mülkleri olup mâ‘adâ beş yüz dört sehm hisse-i şâyi‘ası dahi akd-i âti’z-zikrin sudûruna değin yedimde olup bin iki yüz yetmiş altı senesi Şevvali’l-mükerreminin yirmi sekizinci günü târihiyle müverraha ve ol târihde Dârü’l-hilâfeti’l-aliyye kādısı olan sudûr-ı izâmdan Halil Hamid Paşazâde hafîdi semâhatlü Mustafa Nazif Beyefendi hazretlerinin imzâ ve hatmlarıyla mahtûme bir kıt‘a hüccet-i şer‘iyye ve kethüdâ-yı mûmâ-ileyhin takdîm eylediği bir kıt‘a ilmühaber mantûklarınca yedimde mülk ve hakkım olmağla ben âlât-ı gedik-i mezkûrun seksen sehm hisse-i şâyi‘asının on yedi sehm yedi pul hisse-i şâyi‘asından ber i‘tibâr-ı merkūm mâlik olduğum beş yüz dört sehm hisse-i şâyi‘amı tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile bâ-izn-i şürekâ iki bin beş yüz elli guruşa merkūm Vasil’e bey‘ ve temlîk ve vech-i lâyıkıyla teslîm eylediğimde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semeni olan meblağ-ı mezkûr iki bin beş yüz elli guruşu tamâmen bana def‘ u teslîm ben dahi yedinden bi’t-tamâm ve’l-kemâl ahz u kabz edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile kabûlümüzü hâvî ibrâ vü ıskāt eyledik ba‘de’l-yevm âlât-ı gedik-i mezkûrun seksen sehm hisse-i şâyi‘a-i merkūmesinin on yedi sehm yedi pul hisse-i şâyi‘a-i merkūmesinden ber i‘tibâr-ı merkūm beş yüz dört sehm hisse-i şâyi‘a-i merkūmesinde benim aslâ ve kat‘â alâka ve medhalim kalmayıp merkūm Vasil’in mülk-i müşterâsı ve hakk-ı sırfı olmuşdur dedikde gıbbe. Fî Gurre-i Zilka‘de sene 1278 Şuhûdü’l-hâl: Muhzır Süleyman Ağa b. ( ), Muhzır Mustafa Ağa b. ( ), Muhzır el-Hâc Salih Ağa b. ( ), Muhzır Feyzullah Ağa b. ( ), ve gayruhum