İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 229 Hüküm no: 140 Orijinal metin no: [29b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Simon v. İstefan’ın tütüncü dükkânındaki hisselerini duhân tüccârından Karamanlı Cirazoğlu Vasil v. Pandali’ye satması Tütüncü mübâya‘ası 4000 guruş Kez’alik teba‘a-i Devlet-i aliyye’nin Rum milletinden ve tütüncü esnâfından Simon v. el-müteveffâ İstefan v. Pretamos meclis-i şer‘-i şerîf-i hatîrde teba‘a-i Devlet-i aliyye’nin Rum milletinden olduğu bâ-ilmühaber mütehakkık olan duhân tüccârından bâ‘isü’r-rakīm Karamanlı Cirazoğlu Vasil v. Pandali muvâcehesinde tütüncü esnâfının kethüdâsı el-Hâc Mehmed Latif Efendi b. İsmail ile duhân tüccarından mazbûtü’l-esâmî on nefer müslim ve beş nefer hıristiyan lonca ihtiyârları taraflarından mürsel vekîlleri kethüdâ vekîli Ahmed Efendi b. Osman hâzır olduğu hâlde ikrâr-ı tâm ve takrîr-i kelâm edip mahmiye-i İstanbul’da Duhan Gümrüğü kurbünde Zahîreciler sûkunda hasırcı dükkânı ittisâlinde kâin Ayasofya-i Kebîr Câmi‘-i şerîfi evkāfı müsakkafâtından benimle sair ma‘lûmü’l-esâmî kimesnelerin bi’l-icâreteyn taht-ı tasarrufumuzda olan şehriye dört guruş kirâ-yı kadîmelübir bâb tütüncü dükkânı derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûme yüz yirmi sehm i‘tibârıyla seksen sehm hisse-i şâyi‘aları âharların mâ‘adâ kırk hisse-i şâyi‘ası dahi iki bin sekiz yüz seksen sehm i‘tibârıyla iki bin üç yüz yetmiş altı sehm hisse-i şâyi‘aları âharların yedlerinde mülkleri olup mâ‘adâ beş yüz dört sehm hisse-i şâyi‘ası dahi akd-i âti’z-zikrin sudûruna değin yedimde olup bin iki yüz yetmiş altı senesi Şevvali’l-mükerreminin yirmi sekizinci günü târihiyle müverraha ve ol târihde Dârü’l-hilâfeti’l-aliyye kādısı olan Halil Hamid Paşazâde hafîdi semâhatlü es-Seyyid Mustafa Nazif Beyefendi hazretlerinin imzâ ve hatmlarını hâviye işbu bir kıt‘a hüccet-i şer‘iyye ve kethüdâ-yı mûmâ-ileyhin takdîm eylediği bir kıt‘a ilmühaber mantûklarınca yedimde mülk ve hakkım olmağla ben âlât-ı gedik-i mezkûrun kırk sehm hisse-i şâyi‘a-i merkūmesinde ber i‘tibâr-ı merkūm mâlik olduğum beş yüz dört sehm hisse-i şâyi‘a-i merkūmeyi tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile bâ-izn-i şürekâ dört bin guruşa merkūm Vasil’e bey‘ ve temlîk ve vech-i lâyıkıyla teslîm eylediğimde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semeni olan meblağ-ı merkūm dört bin guruşu tamâmen bana def‘ u teslîm ben dahi yedinden bi’t-tamâm ve’l-kemâl ahz u kabz edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile ibrâ vü ıskāt ve her birimiz ber-minvâl-i muharrer âharın ibrâsını kabûl eyledik, ba‘de’l-yevm âlât-ı gedik-i mezkûrun kırk sehm hisse-i şâyi‘a-i mezkûresinin ber i‘tibâr-ı merkūm beş yüz dört sehm hisse-i şâyi‘a-i merkūmesinde benim aslâ ve kat‘â alâka ve medhalim kalmayıp merkūm Vasil’in mülk-i müşterâsı ve hakk-ı sırfı olmuşdur dedikde gıbbe. Fî Gurre-i Zilka‘de sene 1278 Şuhûdü’l-hâl: Muhzır Ahmed Ağa b. ( ), Muhzır Mustafa Ağa b. ( ), Muhzır Şakir Ağa b. ( ), Muhzır el-Hâc Salih Ağa b. ( ), ve gayruhum